ટ્રમ્પનો નેતન્યાહૂને આકરો ઠપકો એ તો પ્રેમીઓનો ઝઘડો: ઈઝરાયેલી રાજદૂત

ટ્રમ્પની ચેતવણી બાદ ઈઝરાયેલી હુમલા બંધ

અમેરિકા અને ઈઝરાયલ વચ્ચે ઈરાન મુદ્દે તણાવ વધ્યો હોવાના અહેવાલોને ઈઝરાયલે નકારી કાઢ્યા છે. અમેરિકામાં ઈઝરાયલના રાજદૂત યેચિએલ લેઈટરે દાવો કર્યો છે કે અમેરિકાના રાષ્ટ્રપતિ ડોનાલ્ડ ટ્રમ્પ અને ઈઝરાયલના વડાપ્રધાન બેન્જામિન નેતન્યાહૂ વચ્ચેના સંબંધો અત્યંત ગાઢ છે અને મીડિયા બંને નેતાઓ વચ્ચેના મતભેદોને વધારીને રજૂ કરી રહ્યું છે. તેમણે ટ્રમ્પ અને નેતન્યાહૂ વચ્ચે થયેલી તીવ્ર ચર્ચાને “પ્રેમીઓ વચ્ચેનો ઝઘડો” ગણાવી હતી.

ઈરાન અને ઈઝરાયલે તાજેતરમાં એકબીજા પર કરેલા હુમલાઓ બાદ હાલ શત્રુતા થંભી હોવાનો દાવો કર્યો છે. મીડિયા અહેવાલો મુજબ ટ્રમ્પે નેતન્યાહૂને વધુ હુમલા ન કરવા માટે ચેતવણી આપી હતી અને જણાવ્યું હતું કે જો ઈઝરાયલ ફરીથી તેહરાન સામે આક્રમક કાર્યવાહી કરશે તો તેને વોશિંગ્ટનના સમર્થનનું જોખમ ઊભું થઈ શકે છે. ત્યારબાદ ઈઝરાયલે હુમલાઓ રોક્યા હોવાનું કહેવાય છે.

આ પણ વાંચો: લક્ષદ્વીપમાં ૪૭ વર્ષ જૂની દારૂબંધીનો અંત: ટુરિઝમને વેગ આપવા લેવાયો ઐતિહાસિક નિર્ણય

જો કે રાજદૂત લેઈટરે આ વાતને જુદી રીતે રજૂ કરતાં કહ્યું કે ટ્રમ્પની વિનંતી બાદ ઈઝરાયલે સૈન્ય કાર્યવાહીનું તાપમાન ઘટાડવાનો નિર્ણય લીધો હતો, પરંતુ અમેરિકન નેતૃત્વ સારી રીતે સમજે છે કે ઈઝરાયલ પોતાના દેશમાં પડતા બેલિસ્ટિક મિસાઇલ હુમલાઓનો જવાબ આપ્યા વિના રહી શકતું નથી.

બીજી તરફ ટ્રમ્પે તાજેતરમાં ઈરાન અને ઈઝરાયલ બંનેને ગોળીબાર બંધ કરવા અપીલ કરી હતી અને શાંતિ તરફની અંતિમ વાટાઘાટો અજ્ઞાનતા કે મૂર્ખતાના કારણે ખોરવાઈ ન જાય તેવી આશા વ્યક્ત કરી હતી. તેના જવાબમાં નેતન્યાહૂએ સ્પષ્ટ કર્યું હતું કે ઈઝરાયલને આત્મરક્ષાનો સંપૂર્ણ અધિકાર છે અને દેશની સુરક્ષા માટે જે જરૂરી હશે તે પગલાં લેવામાં આવશે.

આ દરમિયાન ઈઝરાયલી સૈન્યના એક અધિકારીએ જણાવ્યું હતું કે જરૂર પડશે ત્યાં સુધી કાર્યવાહી ચાલુ રાખવાની તૈયારી છે. બીજી તરફ ઈરાને પણ કડક વલણ અપનાવતાં સંકેત આપ્યા છે કે લાંબા ગાળાના સંઘર્ષ માટે તે તૈયાર છે. ઈરાની સંસદના અધ્યક્ષ મહંમદ બાકેર ગાલીબાફે અમેરિકા અને ઈઝરાયલ પ્રત્યેનો અવિશ્વાસ જ ભવિષ્યમાં પણ પ્રાદેશિક તણાવ અને અથડામણોનું કારણ બનશે એવી ચેતવણી આપી હતી.

નેતન્યાહૂથી ટ્રમ્પ હવે થાક્યા…

અમેરિકન મીડિયા અહેવાલો મુજબ ડોનાલ્ડ ટ્રમ્પ છેલ્લા કેટલાક સમયથી બેન્જામિન નેતન્યાહૂના આક્રમક વલણથી નારાજ અને હતાશ બન્યા છે. ટ્રમ્પે જાહેરમાં અનેક વખત ઈરાન અને ઈઝરાયલ બંનેને સંયમ રાખવાની સલાહ આપી છે અને મધ્ય પૂર્વમાં શાંતિ સ્થાપવા માટેની વાટાઘાટોને આગળ વધારવાનો પ્રયાસ કર્યો છે. જોકે ઈઝરાયલ સતત સૈન્ય કાર્યવાહી ચાલુ રાખવા તરફ ઝૂકી રહ્યું હોવાથી બંને નેતાઓ વચ્ચે મતભેદો ઉભા થયા હોવાનું કહેવાય છે. તેમ છતાં બંને દેશો વચ્ચેની વ્યૂહાત્મક ભાગીદારી અને સુરક્ષા સહયોગમાં કોઈ તિરાડ પડી નથી અને બંને પક્ષો જાહેરમાં એકબીજા પ્રત્યે વિશ્વાસ વ્યક્ત કરી રહ્યા છે.