બ્રિટનના વડાપ્રધાન પદેથી સર કિયર સ્ટાર્મરનું અંતે રાજીનામું

લેબર નેતા એન્ડી બર્નહેમ સૌથી મજબૂત દાવેદાર

બ્રિટનના વડાપ્રધાન અને લેબર પાર્ટીના નેતા સર કિયર સ્ટાર્મરે સોમવારે પોતાના પદ પરથી રાજીનામાની જાહેરાત કરી હતી. પાર્ટીની અંદર વધતા વિરોધ અને સાંસદોના દબાણ વચ્ચે સ્ટાર્મરે સ્વીકાર્યું કે આગામી સામાન્ય ચૂંટણી સુધી પાર્ટીને નેતૃત્વ આપવા માટે હવે તેઓ શ્રેષ્ઠ વિકલ્પ નથી. 10 ડાઉનિંગ સ્ટ્રીટ બહાર ભાવુક સંબોધનમાં તેમણે દેશના હિતને હંમેશા પ્રથમ સ્થાન આપ્યું હોવાનું અને હવે પાર્ટીના નિર્ણયને સન્માનપૂર્વક સ્વીકારી રહ્યા હોવાનું જણાવ્યું હતું.

63 વર્ષીય સ્ટાર્મરે જણાવ્યું કે નવા લેબર નેતાની પસંદગી ન થાય ત્યાં સુધી તેઓ વડાપ્રધાન તરીકે કામગીરી ચાલુ રાખશે. તેમણે રાજા ચાર્લ્સ ત્રીજાને પોતાના નિર્ણયની જાણ કરી હોવાનું પણ કહ્યું. પાર્ટીની નેશનલ એક્ઝિક્યુટિવ કમિટીને સપ્ટેમ્બરમાં સંસદનું સત્ર શરૂ થાય તે પહેલાં નવા નેતાની પસંદગી પ્રક્રિયા પૂર્ણ કરવાની સૂચના આપવામાં આવી છે.

આ પણ વાંચો: સૌરાષ્ટ્ર યુનિવર્સિટીના સાત દિવસીય સમર કોચિંગ કેમ્પ યોજાયો

સ્ટાર્મરે પોતાના કાર્યકાળ દરમિયાન આર્થિક વૃદ્ધિ, મોંઘવારી અને જાહેર સેવાઓમાં સુધારાના વચનો પૂરાં કરવામાં પડેલી મુશ્કેલીઓનો સામનો કર્યો હતો. છેલ્લા કેટલાક મહિનાઓથી લેબર પાર્ટીની લોકપ્રિયતા ઘટી રહી હતી. તાજેતરમાં આંતરિક હરીફ અને પૂર્વ ગ્રેટર મેનચેસ્ટર મેયર એન્ડી બર્નહેમની રાજકીય સફળતા બાદ સ્ટાર્મર પર દબાણ વધુ વધ્યું હતું. બર્નહેમ હવે નવા લેબર નેતા અને વડાપ્રધાન પદના સૌથી મજબૂત દાવેદાર માનવામાં આવે છે. ભાવુક ભાષણમાં સ્ટાર્મરે પત્ની વિક્ટોરિયાનો આભાર માનતાં કહ્યું કે વડાપ્રધાનનું પદ છોડ્યા બાદ હવે તેઓ સારા પતિ અને પિતા તરીકે વધુ સમય વિતાવવા ઇચ્છે છે.

દસ વર્ષમાં છ વડાપ્રધાન

બ્રિટનમાં છેલ્લા દસ વર્ષ દરમિયાન રાજકીય અસ્થિરતાના કારણે વડાપ્રધાન પદે સતત ફેરફારો જોવા મળ્યા છે. ડેવિડ કેમેરોન બાદ થેરેસા મે એ બ્રેક્ઝિટ મુદ્દે દબાણમાં આવી પદ છોડવું પડ્યું હતું. ત્યારબાદ બોરિસ જોન્સન કોરોના કાળ અને વિવિધ વિવાદોમાં ઘેરાયા. તેમના પછી માત્ર 44 દિવસ સત્તામાં રહેનારી લિઝ ટ્રસ બ્રિટનના સૌથી ટૂંકા કાર્યકાળ ધરાવતા વડાપ્રધાન બન્યા. તેમના અનુગામી તરીકે ઋષિ સુનકે લગભગ 20 મહિના સુધી દેશનું નેતૃત્વ કર્યું હતું. 2024ની ચૂંટણીમાં લેબરની ભવ્ય જીત બાદ કિયર સ્ટાર્મર વડાપ્રધાન બન્યા, પરંતુ હવે પાર્ટીનું સમર્થન ગુમાવતા તેમને પણ પદ છોડવું પડ્યું છે. નવા નેતાની પસંદગી સાથે બ્રિટનને દસ વર્ષમાં સાતમા વડાપ્રધાન મળશે.