LPG ટેન્કર ‘દિશા’ પર મિસાઇલ હુમલો: 20% ઓઈલ-ગેસ સપ્લાયને અસર, 28 ભારતીય નાવિકો સુરક્ષિત
વિશ્વના સૌથી વ્યસ્ત અને સંવેદનશીલ દરિયાઈ માર્ગ હોર્મુઝ સ્ટ્રેટમાં ફરી ગોળીબાર જેવી સ્થિતિ સર્જાઈ છે. શુક્રવારે ઈરાનની જળસીમામાં મોઝામ્બિકના ધ્વજવાળા LPG ટેન્કર પર અજ્ઞાત મિસાઇલનો પ્રહાર થતા આંતરાષ્ટ્રીય સ્તરે ચિંતા ફેલાઈ છે. સદનસીબે જહાજ પર સવાર તમામ ભારતીયો સુરક્ષિત હોવાના સમાચારથી રાહત મળી છે, પરંતુ આ ઘટનાએ ફરી એકવાર વૈશ્વિક ઊર્જા સુરક્ષા પર સવાલ ઉઠાવ્યા છે.
‘દિશા‘ ટેન્કર પર અજ્ઞાત હુમલો
તેહરાન સ્થિત ભારતીય દૂતાવાસે X પર જાહેરાત કરી કે મોઝામ્બિકના ધ્વજ ધરાવતા ‘દિશા’ નામના LPG ટેન્કર પર શુક્રવારે હોર્મુઝ સ્ટ્રેટ નજીક હુમલો થયો. ‘ફોરવર્ડ સીમેન્સ યુનિયન ઑફ ઇન્ડિયા’ના જણાવ્યા મુજબ, જ્યારે ટેન્કર પર્સિયન ગલ્ફ તરફ આગળ વધી રહ્યું હતું ત્યારે એક અજ્ઞાત મિસાઇલે તેને નિશાન બનાવ્યું. આ હુમલાની જવાબદારી હજુ સુધી કોઈએ સ્વીકારી નથી.
સૌથી મહત્વની વાત એ છે કે આ જહાજ પર સવાર તમામ 28 ભારતીય નાવિકો સંપૂર્ણપણે સુરક્ષિત છે. દૂતાવાસે કહ્યું કે તેઓ સંબંધિત ઈરાની અધિકારીઓ સાથે સત સંપર્કમાં છે અને સમગ્ર પરિસ્થિતિ પર ઝીણવટભરી નજર રાખી રહ્યા છે. ભારતીય નાગરિકોની સુરક્ષા માટે તમામ જરૂરી પગલાં લેવાશે તેવી ખાતરી પણ આપી છે.
હોર્મુઝ સ્ટ્રેટ: વિશ્વના 20% ઓઈલ-ગેસનું ગળું
ઈરાન અને ઓમાન વચ્ચે આવેલો હોર્મુઝ સ્ટ્રેટ વૈશ્વિક વેપાર માટે લાઈફલાઈન સમાન છે. વિશ્વના લગભગ 20% ક્રૂડ ઓઈલ અને ગેસની સપ્લાય આ જ સાંકડા જળમાર્ગમાંથી પસાર થાય છે. આવી સ્થિતિમાં અહીં થતો કોઈપણ હુમલો સીધો આંતરાષ્ટ્રીય બજાર અને ઊર્જા ભાવને અસર કરે છે.
જુલાઈની શરૂઆતમાં અમેરિકા અને ઈરાન વચ્ચે થયેલો અસ્થાયી યુદ્ધવિરામ તૂટ્યા બાદ આ વિસ્તારમાં તણાવ ફરી વધ્યો છે. અમેરિકા ઈરાનના સૈન્ય મથકો પર હુમલા કરી રહ્યું છે, તો બદલામાં ઈરાન પણ મધ્ય પૂર્વમાં આવેલા અમેરિકી મથકોને નિશાન બનાવી રહ્યું છે. આ બંને દેશો વચ્ચેના વધતા સંઘર્ષને કારણે વ્યાપારી જહાજોની સુરક્ષા પર સૌથી મોટું જોખમ તોળાઈ રહ્યું છે.
આ હુમલા બાદ નૌવહન કંપનીઓ અને વૈશ્વિક નેતાઓએ હોર્મુઝની સુરક્ષા અંગે ગંભીર ચિંતા વ્યક્ત કરી છે. ભારત સહિત અનેક દેશો માટે આ માર્ગ ઊર્જા આયાતનો સૌથી મહત્વનો રસ્તો હોવાથી સરકાર આ ઘટનાને ખૂબ ગંભીરતાથી જોઈ રહી છે.
