રાજકોટમાં તસ્કરો બેફામ : રાષ્ટ્રીય શાળા પાસે પ્રેસની ઓફિસમાં 76.90 લાખની ચોરી, જાણો શું છે સમગ્ર મામલો
રાજકોટમાં તસ્કરો જાણે કે બેફામ બની ગયા હોય તેવી રીતે દરરોજ કોઈને કોઈ વિસ્તારમાં નાની-મોટી ચોરીને અંજામ આપી રહ્યા છે. આવી જ એક મોટી ચોરી પ્રેસની ઓફિસમાં થઈ જતાં પોલીસમાં દોડધામ થઈ પડી હતી. રવિવારે મધરાત્રે એકલા આવેલા તસ્કરે રાષ્ટ્રીય શાળા રોડ ઉપર આવેલા અબતક પ્રેસને નિશાન બનાવી માલિકની ચેમ્બરમાં રાખેલી તિજોરીમાંથી 76.90 લાખના ઘરેણા-રોકડ ચોરી કરતાં પોલીસના ધાડેધાડા ઉતરી પડ્યા હતા.
શું છે સમગ્ર ઘટના?
આ અંગે પ્રેસના મેનેજર રાહુલભાઈ ગુણવંતરાય મહેતાએ નોંધાવેલી ફરિયાદમાં જણાવ્યું કે તેઓ સોમવારે સવારે આઠેક વાગ્યે પ્રેસની ઓફિસ પર નોકરીએ આવ્યા હતા. આ વેળાએ પ્રેસમાં કેમેરામેન તરીકે નોકરી કરતાં કરણભાઈ જોગલે આવીને તેમને કહ્યું હતું કે પ્રેસની ઓફિસમાં એક તિજોરી તૂટેલી જોવા મળી રહી છે. આ પછી રાહુલભાઈએ જઈને તપાસ કરતાં પ્રેસના માલિકની ચેમ્બર કે જ્યાં તિજોરી પડી હતી તે તૂટેલી હતી. ત્યારબાદ પ્રેસના અન્ય કર્મચારીઓ પણ આવી જતાં તેમને આ અંગેની જાણ કરાઈ હતી. તમામે પ્રેસની ઓફિસની અલગ-અલગ ચેમ્બર્સમાં જઈને તપાસ કરતા તમામ ખાના ખુલ્લા જોવા મળ્યા હતા મતલબ કે તસ્કરે આ તમામ ખાના ફંફોસ્યા હોવાનું ધ્યાન પર આવ્યું હતું.
આ ઉપરાંત અગાસી ઉપર જઈને જોતાં અગાસીની બારીનો હુકમ તૂટી ગયો હતો અને પહેલાં માળે પ્રેસના માલિકની ચેમ્બરનો કાચનો દરવાજો પણ તૂટેલો હતો અને તેમની ચેમ્બરનો સામાન વેરવિખેર હાલતમાં જોવા મળ્યો હતો. પ્રેસના માલિકના ટેબલના ખાનામાં તપાસ કરતાં લોક તૂટેલો હતો. આ ખાનામાં પ્રેસના માલિકે તેમના મિત્રએ ધારીથી રાજકોટના કારીગરો પાસે કામ કરાવવા માટે આપેલું સોનુ, બે સોનાની બંગડી સહિત 540 ગ્રામ સોનું જેની કિંમત અંદાજે 51.50 લાખ રૂપિયા જેવી થાય છે તે ગાયબ થઈ ગયું હતું. આ સિવાય પ્રેસના માલિકની સોનાની 12 ગ્રામની વીંટી, 110 ગ્રામની લક્કી કે જે 10.25 લાખની કિંમતના હતા તે, 1.25 લાખની કિંમતના ચાંદીના સોનાના દસેક સિક્કા, 3.50 લાખની રોકડ, ટેબલની બાજુમાં પડેલા બીજા ટેબલના ખાનામાં પ્રેસના કર્મચારીઓને પગાર આપવા માટે બનાવાયેલા 70 કવર કે જેમાં દસ લાખ રૂપિયા પડ્યા હતા તે પણ જોવા મળ્યા નહોતા. આ સિવાય 40 હજારની રોકડ પણ ગાયબ થઈ જતાં કુલ 76.90 લાખની ચોરી થયાનું સામે આવ્યું હતું.
આ ચોરીની જાણ થતાં જ ડીસીપી, એસીપી, ક્રાઈમ બ્રાન્ચ પીઆઈ, એસઓજી પીઆઈ ઉપરાંત એ-ડિવિઝન પીઆઈ, એલસીબી ટીમ સહિતના પોલીસ અધિકારીઓ સહિતના દોડી ગયા હતા અને તસ્કરનું પગેરું મેળવવા ચક્રો ગતિમાન કર્યા હતા.
46 દિવસમાં એ-ડિવિઝન વિસ્તારમાં બીજી મોટી ચોરી
એ-ડિવિઝન પોલીસ મથક વિસ્તારમાં તસ્કરોને જાણે મોકળું મેદાન મળી ગયું હોય તેમ 46 દિવસમાં બીજી મોટી ચોરીને અંજામ આપ્યો હતો. આ પહેલાં 17 એપ્રિલે ત્રિકોણબાગ પાસે આવેલા ટાઈટન ઘડિયાળના શો-રૂમમાં 66 લાખની ઘડિયાળ ચોરી થવા પામી હતી જે ચોરીમાં સામેલ તસ્કરને પકડી પાડી અમુક ઘડિયાળ કબજે કરવામાં આવી હતી. આ ચોરીમાં સામેલ અન્ય આરોપીઓ અને ઘડિયાળ હજુ પોલીસને હાથ લાગ્યા નથી ત્યાં હવે પ્રેસની ઓફિસમાંથી 76.80 લાખની ચોરી થતાં પોલીસમાં દોડધામ થઈ જવા પામી હતી.
