10 નવા ચહેરા સાથે આમિર ખાનની ફિલ્મ સિતારે જમીન પરનું ફર્સ્ટ પોસ્ટર રીલીઝ, જાણો ક્યારે રીલીઝ થશે ફિલ્મ
વર્ષો પહેલા સિનેમાઘરોમાં આમિર ખાનની ફિલ્મ તારે જમીન પર રીલીઝ થઈ હતી. તેની ભવ્ય સફળતા બાદ આમિર ખાન જેમને બોલિવૂડના મિસ્ટર પરફેક્શનિસ્ટ પણ કહેવામાં આવે છે એકવાર મોટા પડદા પર પાછા ફરી રહ્યા છે. ત્યારે આજે આમિર ખાને તેની ફિલ્મ સિતારે જમીન પરનું ફર્સ્ટ લુક પોસ્ટર રિલીઝ કર્યું છે અને તેની સાથે તેણે ફિલ્મની રિલીઝ ડેટ પણ જાહેર કરી છે.
2007ની સુપરહિટ ફિલ્મ ‘તારે જમીન પર’ ની સિક્વલ
મિસ્ટર પરફેક્શનિસ્ટ લાંબા સમય બાદ ફિલ્મી દુનિયામાં પાછા ફરી રહ્યા છે. વર્ષ 2022 માં ‘લાલ સિંહ ચઢ્ઢા’ નિષ્ફળ ગયા બાદ અભિનેતાએ ફિલ્મોમાંથી બ્રેક લીધો હતો પરંતુ આ દરમિયાન તે પોતાની આગામી ફિલ્મ પર સતત કામ કરી રહ્યો હતો. આમિર તેની 2007 ની સુપરહિટ ફિલ્મ ‘તારે જમીન પર’ ની સિક્વલ ‘સિતાર જમીન પર’ લઈને આવી રહ્યો છે, જેની પહેલી ઝલક સામે આવી છે.
‘સિતાર જમીન પર’ ની પહેલી ઝલક બહાર આવી
‘આમિર ખાન પ્રોડક્શન્સ’ એ ‘સિતાર જમીન પર’ નું પહેલું સત્તાવાર પોસ્ટર રિલીઝ કર્યું છે. જેમાં અભિનેતા બાસ્કેટબોલ કોચની ભૂમિકા ભજવતો જોવા મળે છે. તેમની સાથે, 10 અન્ય કલાકારો પણ છે, જેમને જોઈને લાગે છે કે તેઓ કદાચ ફિલ્મમાં અભિનેતાના વિદ્યાર્થીઓની ભૂમિકા ભજવશે.
‘સિતાર જમીન પર’ ની સ્ટોરી શું છે ?
આમિર ખાને થોડા સમય પહેલા તેની આગામી ફિલ્મ ‘સિતારે જમીન પર’ ની સ્ટોરીનો ઉલ્લેખ કર્યો હતો. તેમની આ ફિલ્મ સ્પેનિશ ફિલ્મ ‘ચેમ્પિયન્સ’ ની રિમેક છે, જેમાં તેઓ ‘ખૂબ જ અસંસ્કારી’ બાસ્કેટબોલ કોચની ભૂમિકા ભજવી રહ્યા છે. તેમણે કહ્યું હતું કે ગઈ વખતે તેમના ‘તારે જમીન પર’ એ ચાહકોને ખૂબ રડાવ્યા હતા. પરંતુ આ વખતે તેમનું ‘સિતાર જમીન પર’ ચાહકોને ખૂબ હસાવશે.
આમિર ખાન 10 ડેબ્યૂ કલાકારોને લોન્ચ કરશે
આ ફિલ્મની ખાસ વાત એ છે કે આમિર ખાન 10 ડેબ્યૂ કલાકારોને લોન્ચ કરી રહ્યો છે, જેમાં આરુષ દત્તા, ગોપી કૃષ્ણ વર્મા, સંવિત દેસાઈ, વેદાંત શર્મા, આયુષ ભણસાલી, આશિષ પેંડસે, ઋષિ શહાની, ઋષભ જૈન, નમન મિશ્રા અને સિમરન મંગેશકરના નામનો સમાવેશ થાય છે.
આમિર સાથે જેનેલિયા ડિસોઝા પણ જોવા મળશે
આ ફિલ્મમાં આમિર સાથે જેનેલિયા ડિસોઝાનો પણ સમાવેશ થાય છે, જે લાંબા સમય પછી આમિર ખાન દ્વારા નિર્મિત ફિલ્મનો ભાગ બની છે. આ પહેલા તે અભિનેતાના ભત્રીજા ઇમરાન ખાનની પહેલી ફિલ્મ ‘જાને તુ યા જાને ના’માં જોવા મળી હતી.
ફિલ્મ 20 જૂન સિનેમાઘરોમાં થશે રીલીઝ
ફિલ્મ 20 જૂને સિનેમાઘરોમાં રિલીઝ થશે. આ ફિલ્મનું દિગ્દર્શન આર.એસ. પ્રસન્ના દ્વારા કરવામાં આવ્યું છે, જેમણે અગાઉ ‘શુભ મંગલ સાવધાન’ જેવી હિટ ફિલ્મ બનાવી છે. આ ફિલ્મ દિવ્યા નિધિ શર્મા દ્વારા લખવામાં આવી છે. તેનું સંગીત શંકર-એહસાન-લોય દ્વારા આપવામાં આવ્યું છે, જેઓ ‘તારે જમીન પર’ના સંગીત નિર્દેશકો હતા.
