દેવપરામાં આવેલી ‘બી.એમ. જ્વેલર્સ’ દુકાનમાં ભર્યું પગલું, સારવાર દરમિયાન વેપારીનું રટણ
શહેરમાં દેવપરા વિસ્તારમાં જ્વેલરીની દુકાન ધરાવતા એક યુવા સોની વેપારીએ શુક્રવારે બપોરના સમયે પોતાની જ દુકાનમાં એસિડ ગટગટાવી લઈ આપઘાતનો પ્રયાસ કરતા તેને સિવિલ હોસ્પિટલમાં ખસેડવામાં આવ્યો હતો. વેપારી સતત સારવાર દરમિયાન “મેં નાના ભાઈ સાથે દગો કર્યો છે” તેવું રટણ કરતા હોય ત્યારે સમગ્ર બનાવ અંગે ભક્તિનગર પોલીસે વધુ તપાસ હાથ ધરી છે.
પ્રાપ્ત વિગતો અનુસાર, કેવડાવાડી શેરી નંબર ૧૫માં રહેતા તેજસભાઈ શિરીષભાઈ સોની (ઉં.વ.૩૯)એ શુક્રવારે બપોરે ૧૨ વાગ્યાના અરસામાં દેવપરામાં વિવેકાનંદનગર ખાતે આવેલી પોતાની ‘બી.એમ. જ્વેલર્સ’ નામની દુકાનમાં હાજર હતા. દરમિયાન અચાનક જ તેમણે દુકાનમાં એસિડ પી લીધું હતું. દુકાનમાં તેમની સાથે કામ કરતા બંગાળી કારીગર રાજુભાઈને આ બાબતની જાણ થતાં તેઓએ તાત્કાલિક તેજસભાઈના પરિવારજનોને જાણ કરી હતી અને બેભાન જેવી હાલતમાં તેમને તાબડતોબ સારવાર અર્થે રાજકોટ સિવિલ હોસ્પિટલમાં ખસેડવામાં આવ્યા હતા.
આ પણ વાંચો: ગોંડલમાં પત્ની એ પ્રેમી સાથે મળીને ખેલ્યો ખૂની ખેલ
આ ઘટનાની જાણ થતાં જ ચિંતિત પરિવારજનો સિવિલ હોસ્પિટલ ખાતે દોડી આવ્યા હતા. પરિવારજનોના જણાવ્યા મુજબ, તેજસભાઈ બે ભાઈઓમાં મોટા છે અને સંતાનમાં તેમને એક દીકરો અને એક દીકરી છે. તેમના નાના ભાઈ રૂપેશભાઈ નોકરી કરીને પરિવારને મદદરૂપ થાય છે. હોસ્પિટલના બિછાને સારવાર લઈ રહેલા તેજસભાઈની જ્યારે પ્રાથમિક પૂછપરછ કરવામાં આવી ત્યારે તેઓ સતત એક જ રટણ કરતા હતા કે, “મેં મારા નાના ભાઈ જોડે દગો કર્યો છે, પૈસા લેવા માટે મેં તેની ચેકબુક ચોરી હતી.” પોતાના ભાઈ સાથે કરેલા આ વિશ્વાસઘાતના પસ્તાવાની આગમાં જ તેમણે એસિડ પી લીધું હોવાનું અનુમાન છે. જોકે સમગ્ર ઘટના અંગે ભક્તિનગર પોલીસ મથકનો સ્ટાફ હોસ્પિટલે પહોંચી યુવકનું નિવેદન નોંધવા તજવીજ હાથ ધરી છે.
