રંગીલું રાજકોટ ફરી રક્તરંજિત : ભગવતીપરામાં પાણીપૂરી ખાવા નીકળેલી કારખાનેદારની પત્નીની નિર્દયી હત્યા,પતિ સહિતની સઘન પૂછપરછ
રાજકોટમાં એક બાદ એક હત્યાનો સિલસિલો અટકવાનું નામ જ ન લઈ રહ્યો હોય તે પ્રકારે ચકચારી બનાવ સામે આવી રહ્યા છે ત્યારે આવી જ હત્યાની એક ઘટના ભગવતીપરા વિસ્તારમાં આવેલી કોપર ગ્રીન સોસાયટીમાં બનવા પામી હતી. અહીં પતિ અને પુત્ર સાથે રહેતી પરિણીતા પાણીપૂરી ખાવા નીકળ્યા બાદ તેની નિર્દયી રીતે હત્યા કરેલી હાલતમાં મૃતદેહ મળી આવતાં પોલીસ કમિશનર સહિતના પોલીસ અધિકારીઓ ઘટનાસ્થળે દોડી ગયા હતા. બીજી બાજુ આ હત્યાને અંજામ આપનાર વ્યક્તિ સુધી પહોંચવા માટે પોલીસે એડીચોટીનું જોર લગાવી દીધું હતું.
આ ઘટના અંગે જાણવા મળતી વિગતો પ્રમાણે કોપર ગ્રીન સોસાયટી બ્લોક નં.16માં રહેતી સ્નેહા તેના પતિ કે જે ગ્રીનલેન્ડ ચોકડી પાસે કારખાનું ધરાવતા હિતેશભાઈ આસોડિયા (ઉ.વ.33)એ શનિવારે સાંજે 7ઃ30 વાગ્યે પતિ હિતેશને ફોન કરી પોતે ઘર નજીક જ આવેલા રાજલક્ષ્મી પાર્ક પાસે રેંકડી રાખી ઉભા રહેતા પાણીપૂરીવાળાને ત્યાં પાણીપૂરી ખાવા માટે જાય છે તેમ કહ્યું હતું. આ પછી સ્નેહાએ પોતાનો ફોન ઘરમાં જ ચાર્જિંગ પર મુકી દીધો હતો. ત્યારબાદ 7ઃ56 વાગ્યે તે ઘર બહાર નીકળીને જઈ રહેલી સામે આવેલા સીસીટીવી ફૂટેજમાં જોવા મળી રહ્યું છે. પતિને ફોન કર્યો ત્યારે સ્નેહાએ પતિને પોતાને પાણીપૂરીવાળાને ત્યાં લઈ જવા માટે પણ કહ્યું હતું.
દરમિયાન કારખાનેથી કામ પૂર્ણ થઈ જતાં આઠેક વાગ્યા આસપાસ પતિએ સ્નેહાના ફોન ઉપર ફોન કરતાં તેનો ફોન ઉપડ્યો ન્હોતો. ત્યારબાદ ઘેર આવીને જોતાં સ્નેહાનો ફોન ઘરમાં જ ચાર્જિંગ પર પડેલો જોવા મળ્યો હતો. જો કે સ્નેહા ઘણો સમય પસાર થઈ જવા છતાં ઘેર ન આવતા તેની શોધખોળ શરૂ કરી હતી. કલાકો સુધી સ્નેહાનો અતોપતો ન મળતા આખરે 12 વાગ્યે બી-ડિવિઝન પોલીસ મથકે હિતેશ તેમજ અન્ય પરિવારજનો દોડી ગયા હતા. આ પછી પણ આખી રાત સુધી સ્નેહાની શોધખોળ શરૂ કરી હતી.
આખરે સવારે 8ઃ30 વાગ્યે પોલીસ મથકને રાહદારીએ જાણ કરી હતી કે એક ખુલ્લા પ્લોટમાં મહિલાનો મૃતદેહ પડેલો છે. ફોન આવ્યા બાદ પોલીસે સ્થળ પર જઈ તપાસ કરતા આ મૃતદેહ સ્નેહાનો જ હોવાનું સામે આવ્યું હતું. બીજી બાજુ હિતેશ સહિતના પણ સ્થળ પર દોડી ગયા હતા અને પત્નીનો નિર્દયી રીતે હત્યા કરાયેલી હાલતમાં મૃતદેહ જોઈ ત્યાં જ ભાંગી પડ્યો હતો.
સનસનાટીજનક હત્યાની જાણ થતાં જ પોલીસ કમિશનર બ્રજેશકુમાર ઝા, ડીસીપી (ક્રાઈમ) જગદીશ બાંગરવા, એસીપી, બી-ડિવિઝન પીઆઈ, ક્રાઈમ બ્રાન્ચ સહિતની ટીમ ઘટનાસ્થળે દોડી ગઈ હતી અને હત્યાને અંજામ આપનારની શોધખોળ આદરી હતી. ક્રાઈમ બ્રાન્ચ દ્વારા સ્નેહાના પતિ હિતેશ આસોડિયા ઉપરાંત સ્નેહાની બહેનોની પણ પૂછપરછ કરવામાં આવી હતી. પૂછપરછમાં હિતેશે સ્નેહા સાથે કોઈ જ પ્રકારનું મનદુઃખ ન હોવાનું તેમજ ઘરસંસાર પણ વ્યવસ્થિત ચાલતો હોવાનું જણાવતા આખરે આ હત્યા કોણે કરી હશે તેનો ભેદ ઉકેલવા માટે ચારેય દિશામાં તપાસનો દોર લંબાવ્યો હતો.
સ્નેહા પાસે રહેલી થેલી ગાયબ, પાકિટ કે બીજું કશું પણ ન મળ્યું
સામે આવેલા સીસીટીવી ફૂટેજમાં સ્નેહા આસોડિયા 7ઃ56 વાગ્યે ઘર બહાર નીકળતી જોવા મળી રહી છે. સ્નેહા જ્યારે બહાર નીકળે છે ત્યારે તેના હાથમાં એક થેલી હોવાનું દેખાઈ રહ્યું છે પરંતુ જ્યાંથી તેનો મૃતદેહ મળ્યો તે ખુલ્લો પ્લોટ બહુ દૂર ન હોવાનું પણ તપાસમાં સામે આવ્યું છે સાથે સાથે સ્નેહા પાસે રહેલી થેલી પણ ગાયબ જોવા મળી હતી. આ ઉપરાંત સ્નેહાના મૃતદેહની આજુબાજુમાંથી પાકિટ કે અન્ય કોઈ સામાન પણ મળ્યો ન્હોતો ત્યારે શું આ હત્યા લૂંટના ઈરાદે કરવામાં આવી હશે કે પછી લૂંટનું `નાટક’ કરાયું હશે તે દિશામાં પણ પોલીસે તપાસ આરંભી હતી.
જમણી બાજુની આંખ પાસે બે ઈંચનો ઊંડો ઘા, કાન પણ છૂંદાયેલો
એવી વિગત પણ જાણવા મળી હતી કે સ્નેહાને જમણી બાજુની આંખ પાસે બે ઈંચનો ઉંડો ઘા જોવા મળ્યો છે જે કોઈ બોથડ પદાર્થથી મારવામાં આવ્યો છે. આ ઉપરાંત તેનો જમણી બાજુનો કાન પણ છૂંદાયેલો છે સાથે સાથે સ્નેહાના નાકમાં પણ ઈજા પહોંચી છે તેને નીચે પડી જવાને કારણે થઈ હોવાનું લાગી રહ્યું છે અને સ્નેહાને ઢસડવામાં પણ આવ્યાનું ઈજાઓ પરથી દેખાયું હોવાનું પોસ્ટમોર્ટમ પરથી ખુલ્યું હતું.
સ્નેહાના બીજા લગ્ન હતા, અગાઉના લગ્ન ચાર જ મહિના ટક્યા હતા
પોલીસ સૂત્રોએ જણાવ્યું હતું કે અગાઉ સ્નેહાના લગ્ન કોઠારિયા નાકા પાસે હુડકોમાં રહેતા યુવક સાથે થયા હતા. જો કે આ લગ્નગાળો માત્ર ચાર મહિનાનો જ રહ્યો હતો અને પછી છૂટાછેડા થઈ ગયા હતા. છૂટાછેડા થયા બાદ સ્નેહા આઠેક વર્ષ સુધી પિયરમાં જ રહી હતી. ત્યારબાદ સ્નેહાના પિતા કે જે હિતેશના ગ્રીનલેન્ડ ચોકડી પાસે આવેલા કારખાનામાં જ નોકરી કરતા હતા તેમણે જ પુત્રીના લગ્ન પોતાના શેઠ સાથે કરાવ્યા હતા. આ લગ્નને ચારેક વર્ષ વીતી ગયા છે અને સંતાનમાં પ્રિયાંશ નામનો બે વર્ષનો પુત્ર પણ છે. હિતેશના પણ અગાઉના લગ્નમાં છૂટાછેડા થયા હતા.
કોલ ડિટેઈલમાંથી મહત્ત્વની કડી મળવાની શક્યતા
પોલીસ દ્વારા સ્નેહાના કોલ ડિટેઈલ પણ મેળવવામાં આવ્યા છે સાથે સાથે પતિની પણ સઘન તપાસ શરૂ કરવામાં આવી છે. જો કે પોલીસ પૂછપરછમાં પતિ હિતેશ આસોડિયાએ પત્ની સાથે કોઈ પ્રકારનો વિવાદ ન હોવાનું રટણ કર્યું હતું સાથે સાથે આ પ્રકારે પત્નીની હત્યા કોણે કરી હશષ તેનો પણ ખ્યાલ ન હોવાનું જણાવ્યું હતું.
સ્નેહાના ભાઈએ સવારે ઈન્સ્ટાગ્રામ પર અજાણી મહિલાની લાશ મળ્યાના સમાચાર વાંચ્યા’ને દોટ મૂકી…!
સ્નેહાના ભાઈ અમિત પ્રવિણભાઈ બાવળિયાએ જણાવ્યું કે તેણે બહેનની શોધખોળ આખી રાત કરી હતી અને રવિવારે સવારે તેણે જાગીને પોતાનું ઈન્સ્ટાગ્રામ એકાઉન્ટ ખોલતાં તેમાં એવા સમાચાર વાંચવા મળ્યા હતા કે ભગવતીપરા વિસ્તારમાં ખુલ્લા પ્લોટમાંથી મહિલાની લાશ મળી. આ સમાચાર વાચી તે સ્થળ ઉપર દોડી ગયો હતો ત્યાં જઈને જોયું તો તેની જ બહેનની લાશ પડી હોવાનું ધ્યાન પર આવતા તે હતપ્રભ થઈ ગયો હતો.
સ્નેહા બુધવારે ઘરે રસોઈ ન બનાવતી, બહાર જ જમવા જવાનુંઃ પતિ સાથે કોઠારિયા નાકા પાસે પાણીપૂરી ખાવા જતી
પોલીસ પૂછપરછમાં સ્નેહાના પતિ હિતેશે જણાવ્યું કે સ્નેહા બુધવારે ઘરે રસોઈ બનાવતી ન્હોતી અને બહાર જ જમવાનો આગ્રહ રાખતી એટલા માટે હિતેશ, સ્નેહા અને તેમનો બે વર્ષનો પુત્ર પ્રિયાંશ બહાર જ જમવા જતા હતા. જ્યારે સ્નેહા અને તેનો પતિ હિતેશ જ્યારે પણ સમય મળે ત્યારે કોઠારિયા નાકા પાસે પાણીપૂરી ખાવા માટે જતા હતા.
બે વર્ષનો પ્રિયાંશ દાદા-દાદીને ત્યાં હતો…
સ્નેહા તેના પુત્ર પ્રિયાંશને સાસુ-સસરા કે જેઓ ગ્રીનલેન્ડ ચોકડીએ રહે છે ત્યાં મુકી આવી હતી. પ્રિયાંશ ખૂબ જ તોફાની હોય તે સાસુ-સસરા પાસે હોય ત્યારે તોફાન ઓછા કરતો હોવાથી તેને ત્યાં મુકી આવી હોવાનું જાણવા મળ્યું હતું.
