અલ ફ્લાહ યુનિ.ની માન્યતા જ નહોતી,છેતરપિંડી કરીને 410 કરોડ લૂંટી લીધા! આતંકનું કેન્દ્રનું બનેલી સંસ્થામાં EDની તપાસમાં ધડાકો
દિલ્હી કાર વિસ્ફોટની તપાસમાં આતંકવાદી પ્રવૃત્તિઓના મુખ્ય મથક તરીકે ઊભરી આવેલ અલ ફલાહ યુનિવર્સિટીમાં એનફોર્સમેન્ટ ડિરેક્ટોરેટ (ED) દ્વારા ચલાવવામાં આવી રહેલી મની લોન્ડ્રિંગની તપાસમાં ભયંકર ગેરેરીતિ અને છેતરપિંડી સામે આવી છે. તપાસમાં જાણવા મળ્યું છે કે ફરીદાબાદ સ્થિત આ યુનિવર્સિટીએ ખોટી અક્રેડિટેશન (માન્યતા) દર્શાવી હજારો વિદ્યાર્થીઓ સાથે છેતરપિંડી કરી અને સાત વર્ષમાં 415 કરોડ રૂપિયા જેટલી જંગી રકમ લૂંટી લીધી છે. યુનિવર્સિટીના સ્થાપક અને ચેરમેન જવાદ અહમદ સિદ્દીકીને ED દ્વારા ગિરફતાર કરવામાં આવ્યા છે .
EDની તપાસમાં જાણવા મળ્યું છે કે યુનિવર્સિટીએ 2018-19 થી 2024-25ના સમયગાળા દરમિયાન કુલ 415 કરોડ રૂપિયાની આવક જાહેર કરી હતી. આ આવક ખોટી માન્યતા અને ફરજીયાત દસ્તાવેજો દ્વારા વિદ્યાર્થીઓને આકર્ષિત કરીને, તેમની પાસેથી ભારે ફી વસૂલ કરીને મેળવવામાં આવી હતી. તપાસમાં આ વ્યવહારને ‘ફ્રોડ અને ફોર્જરી’ (છેતરપિંડી અને જાલસાજી) તરીકે ઓળખવામાં આવ્યો છે.
સૌથી ગંભીર આરોપ એ છે કે યુનિવર્સિટી પાસે શિક્ષણ ચલાવવા માટેની જરૂરી માન્યતા જ નહોતી, છતાંય વિદ્યાર્થીઓ પાસેથી પૂરી ફી લેવાતી હતી. આ રીતે વિદ્યાર્થીઓના ભવિષ્ય સાથે ખેલ થયો છે.યુનિવર્સિટી અને તેની અન્ય સંસ્થાઓના બધા બેંક ખાતા અને આવકવેરા રિટર્ન એક જ પરમાનેન્ટ અકાઉન્ટ નંબર (PAN) હેઠળ ચલાવવામાં આવતા હતા, જે દર્શાવે છે કે સંપૂર્ણ નાણાકીય નિયંત્રણ એક જ ટ્રસ્ટ પાસે કેન્દ્રિત હતું. યુનિવર્સિટીના મુખ્ય નાણાકીય અધિકારીએ EDને જણાવ્યું હતું કે તમામ મોટા નાણાકીય નિર્ણયો ફક્ત ચેરમેન જવાદ સિદ્દીકી જ લેતા હતા.
10 નવેમ્બરે દિલ્હીના રેડ ફોર્ટ નજીક થયેલા વિસ્ફોટમાં માર્યા ગયેલા આતંકવાદી ડૉ. ઉમર મોહમ્મદ અને તેના ત્રણ સાથીઓ અલ ફલાહ યુનિવર્સિટી સાથે જોડાયેલા હતા. તપાસ એજન્સીઓને શંકા છે કે વિસ્ફોટ માટે વપરાયેલા રસાયણો યુનિવર્સિટીની લેબમાંથી જ ચોરી કરીને લઈ જવામાં આવ્યા હતા.
60 કરોડનું તો દાન મળ્યું!
યુનિવર્સિટીના આઇટી રિટર્ન ના આંકડાઓ પરથી ચોકાવનારી વિગતો બહાર આવી છે. યુનિવર્સિટીને 2014 15માં 30.89 કરોડ અને 2015 16 માં 29.47 કરોડ જેવી મોટી રકમ તો દાનમાં મળી હતી. 2016 17 થી શૈક્ષણિક આવકની શરૂ થઈ. 2018 19 માં 24.21 કરોડની આવક થઈ હતી જે વધીને 202425 માં 80.01 કરોડ સુધી પહોંચી ગઈ. સાત વર્ષમાં યુનિવર્સિટીને કુલ 415 કરોડ રૂપિયાની આવક થઈ હોવાનું ખુલ્યું છે. તપાસમાં એવું પણ સામે આવ્યું છે કે આ રકમનો ઉપયોગ ખાનગી હેતુ માટે થતો હતો.
