રાજકોટમાં કચરો વ્યવસ્થિત ઉપડે છે? હવે ડેપ્યુટી કલેક્ટર રાખશે ‘બાજ નજર’,સફાઈનું ધોરણ ઉંચું લાવવા કરશે મોનિટરિંગ

વર્ષ-2024ના સ્વચ્છતા સર્વેક્ષણમાં રાજકોટનો ક્રમ છેક 37મો આવ્યો હોય શહેરમાં સફાઈનું ધોરણ સાવ કથળી ગયાનું ફલિત થયું હતું. બીજી બાજુ આ વર્ષની પરીક્ષા પણ પૂર્ણ થઈ છે જેમાં ક્રમ સુધરવાનો આશાવાદ સેવાઈ રહ્યો છે. તાજેતરમાં જ તંત્ર દ્વારા ડોર ટુ ડોર મતલબ કે ઘેર-ઘેરથી કચરો એકત્ર કરવા માટે અધધ 1100 કરોડ રૂપિયાનો કોન્ટ્રાક્ટ પણ એજન્સીને આપ્યો હતો. જો કે હજુ સુધી જોઈએ તેવી `ધાર’ આ કામગીરીમાં આવી ન હોય સાથે સાથે `કચરામુક્ત રાજકોટ’નું સ્વપ્ન ઘણું દૂર હોય તેવું લાગતાં જ આ દિશામાં સુદૃઢ કામગીરી થઈ શકે તેમજ એક સક્ષમ અધિકારીની બાજનજર રહે તે માટે મ્યુનિસિપલ કમિશનર દ્વારા ડેપ્યુટી કલેક્ટરને મહત્ત્વની જવાબદારી સોંપવામાં આવી છે.

મ્યુનિસિપલ કમિશનર તુષાર સુમેરા દ્વારા હુકમ કરવામાં આવ્યો છે જેમાં જણાવ્યા પ્રમાણે શહેરના રહેણાક-કોમર્શિયલ વિસ્તારોમાં દિન-પ્રતિદિન ઘનકચરાનું ઉત્પાદન વધી રહ્યું છે અને તેનો વૈજ્ઞાનિક ઢબે નિકાલ કરવાની વ્યવસ્થા કરી નાગરિકોની સુખાકારીને ધ્યાનમાં રાખી શહેરમાં સ્વચ્છ અને સુંદર રાખવું, મિનિ ટીપર મારફત 100% ડોર ટુ ડોર ગાર્બેજ કલેક્શન સહિતની કામગીરી સોલિડ વેસ્ટ મેનેજમેન્ટ દ્વારા કરવામાં આવે છે. એકંદરે આ તમામ કામગીરીનું સુપરવિઝન અને મોનિટરિંગ સુ-વ્યવસ્થિત રીતે થવું ખૂબ જ જરૂરી હોય તેના સુપરવિઝન અને મોનિટરિંગની કામગીરી નાયબ કલેક્ટર કિર્તન એ.રાઠોડને સોંપવામાં આવે છે. આ ઉપરાંત સોલિડ વેસ્ટ મેનેજમેન્ટ શાખાની તમામ વહીવટી બાબતો પર્યાવરણ ઈજનેરે નાયબ કમિશનર (સોલિડ વેસ્ટ મેનેજમેન્ટ) મારફત કરવાની રહેશે.આ ઉપરાંત ડેપ્યુટી કલેક્ટર દ્વારા કામગીરીનો સાપ્તાહિક રિપોર્ટ મ્યુનિસિપલ કમિશનરને કરવાનો રહેશે તેવું પણ હુકમમાં જણાવાયું છે.
આ પણ વાંચો : ક્લસ્ટર બોમ્બ-નાનું પણ નાગનું બચ્ચુ ! એટલું ખતરનાક હથિયાર કે ક્યાં ત્રાટકે તે જ નક્કી નહીં,જાણો શું છે ખાસિયત

આવતાં વર્ષે સ્વચ્છતા સર્વેક્ષણમાં ટોપ-5માં આવવાનો લક્ષ્યાંકઃ મ્યુ.કમિશનર

મ્યુનિસિપલ કમિશનર તુષાર સુમેરાએ `વોઈસ ઓફ ડે’ સાથેની વાતચીતમાં જણાવ્યું કે સોલિડ વેસ્ટ મેનેજમેન્ટ શાખા એ મહાપાલિકાની સૌથી વધુ કર્મી ધરાવતી શાખા છે એટલા માટે સ્વચ્છ રાજકોટની દિશામાં સુદૃઢ કામગીરી થઈ શકે તે સહિતના મુદ્દા માટે આ હુકમ કરવામાં આવ્યો છે. આ ઉપરાંત આવતાં વર્ષે સ્વચ્છતા સર્વેક્ષણમાં રાજકોટનો ક્રમ ટોપ-5માં આવે તે માટે અત્યારથી જ તૈયારીઓ શરૂ કરી દેવામાં આવી છે. આવનારા સમયમાં સ્વચ્છતા બાબતે હજુ અનેક મોટા અને મહત્ત્વના ફેરફાર કરવામાં આવશે.