હવે કયા વધુ બે દેશો લડી લેવાના મૂડમાં દેખાય છે ? કોણ છે ? જુઓ

દુનિયામાં સ્થિતિ એવી થતી જાય છે કે બધા દેશોને લડી જ લેવું છે. વિશ્વભરમાં ભારે અનિશ્ચિત વાતાવરણ અને અશાંતિ ફેલાયેલા છે. રશિયા-યુક્રેન, ઇઝરાયલ-પેલેસ્ટાઇન,ઇઝરાયલ-લેબેનોન અને ઇઝરાયલ-ઇરાન બાદ વિશ્વના અન્ય બે કટ્ટર દેશો વચ્ચે તણાવ વધ્યો છે. ઉત્તર કોરિયા અને દક્ષિણ કોરિયાને લાંબા સમયથી એકબીજાના કટ્ટર દુશ્મનો માનવામાં આવે છે, પરંતુ તાજેતરમાં બંને દેશો વચ્ચે યુદ્ધ જેવી સ્થિતિ સર્જાઇ ગઈ છે.

ઉત્તર કોરિયાના સરમુખત્યાર કિમ જોંગ ઉન પોતાની સેનાને યુદ્ધ માટે તૈયાર રહેવા આદેશ પણ આપી ચૂક્યા છે. આ દરમિયાન તેમની બહેન કિમ યો જોંગએ દક્ષિણ કોરિયાને અંજામ ભોગવવા તૈયાર રહેવાની ધમકી આપી છે.

હુમલાની ધમકી
ઉત્તર કોરિયાના વિદેશ મંત્રાલય તરફથી નિવેદન જાહેર કરી જણાવાયું છે કે, દક્ષિણ કોરિયાએ 3, 9 અને 10 ઓક્ટોબરે ઉત્તર કોરિયાના હવાઇ ક્ષેત્રમાં માનવરહિત ડ્રોન ઉડાડ્યું હતું. જો કે, દક્ષિણ કોરિયાના રક્ષા મંત્રી કિમ યોંગ-હ્યુનને આ આરોપ ફગાવી દીધા હતા, પરંતુ બાદમાં સંયૂક્ત ચીફ ઓફ સ્ટાફે પોતાના નિવેદનમાં સંશોધન કરતા કહ્યું કે, અમે પુષ્ટિ નથી કરી શકતા કે ઉત્તર કોરિયાના આરોપ સાચા છે કે ખોટા.

ત્યારબાદ શનિવારે રાત્રે સરમુખત્યાર કિમ જોંગ ઉનની બહેને કહ્યું કે, દક્ષિણ કોરિયાએ ઉત્તર કોરિયાની સુરક્ષાને જોખમમાં નાખવાનું કામ કર્યું છે. માટે હવે ઉત્તર કોરિયા દક્ષિણ કોરિયા પર ચેતવણી વગર હુમલો કરશે, પરંતુ દક્ષિણ કોરિયાએ અત્યાર સુધી આ ધમકી પર કોઇ પ્રતિક્રિયા આપી નથી.