પ્રદૂષણ ઓકતી ડીઝલ બસના છેલ્લા દિવસો: આજથી CNGનો જમાનો આવશે !
બાવન બસ આવી તેમાંથી દસનું આજે લોકાર્પણ: ૩૧નું થર્ડ પાર્ટી ઈન્સ્પેક્શન પૂરું થતાં ઝડપથી દોડતી કરાશે: બાકીની દસેક દિવસમાં શરૂ
રાજકોટમાં અત્યારે બાવન જેટલી ડીઝલ સિટી બસ દોડી રહી છે તેમાંથી એક પણ એવી નહીં હોય કે જે પ્રદૂષણ ઓકતી ન હોય…! દરરોજ કોઈને કોઈ વિસ્તારમાં ખખડી ગયેલી સિટી બસને ધક્કો મારવામાં આવી રહ્યો હોય અથવા તો તે ધૂમાડો ઓકતી હોય તેવો વીડિયો વાયરલ થયા વગર રહેતો જ નથી. આ સમસ્યામાંથી શહેરીજનોને બહુ ઝડપથી છૂટકારો મળવા જઈ રહ્યો છે. એકંદરે પ્રદૂષણ ઓકતી ડીઝલ બસના છેલ્લા દિવસો હોય તેવી રીતે આજથી સીએનજી બસનો જમાનો આવશે.
રાજકોટમાં અત્યારે બાવન ડીઝલ બસ તેમજ ૬૫ ઈલેક્ટ્રિક બસ સંચાલિત થઈ રહી છે. મનપા દ્વારા બાવન ડીઝલ બસને મુક્તિ આપવા માટે સીએનજી બસ દોડાવવાનું આયોજન છે. આ પૈકી નવી બાવન સીએનજી બસ આવી ચૂકી છે જેમાંથી દસનું આજે લોકાર્પણ કરવામાં આવશે. જ્યારે બાકીની ૩૧નું થર્ડ પાર્ટી ઈન્સ્પેક્શન પૂરું થતાં તેને પણ ઝડપથી દોડતી કરવામાં આવશે તો બાકીની દસેક દિવસમાં શરૂ કરવામાં આવનાર હોવાનું જાણવા મળી રહ્યું છે.
નવી દસ બસનું લોકાર્પણ સાંસદ પુરુષોત્તમ રૂપાલા, રામભાઈ મોકરિયા સહિતના હસ્તે કરવામાં આવશે. એકંદરે સીએનજી બસ શરૂ થયા બાદ શહેરના પ્રદૂષણમાં નોંધપાત્ર ઘટાડો આવશે તેવી શક્યતા અધિકારીઓ દ્વારા કરવામાં આવી રહી છે.
