રમ્યા વગર જ એશિયન ગેમ્સના સેમિફાઈનલમાં પહોંચી ટીમ ઈન્ડિયા
પાકિસ્તાનની પણ સેમિ.માં એન્ટ્રી
ભારતીય ક્રિકેટ ટીમ એશિયન ગેમ્સ-૨૦૨૬ના સેમિફાઈનલમાં પહોંચી ગઈ છે. વરસાદને કારણે ટોસ પણ શક્ય બન્યો ન્હોતો. બીસીસીઆઈએ જણાવ્યું કે વરસાદને કારણે ભારત-અફઘાન મેચ રદ્દ કરવામાં આવી છે. શ્રેેષ્ઠ સીડિંગના આધારે ટીમ ઈન્ડિયા સેમિફાઈનલમાં પહોંચી છે. હવે ટીમ ઈન્ડિયાને ગોલ્ડ મેડલ આડે બે મેચ જ બાકી છે.
ટીમ ઈન્ડિયા આ ટૂર્નામેન્ટમાં ગોલ્ડ મેડલ જીતવાની પ્રબળ દાવેદાર છે. પાછલી એશિયન ગેમ્સમાં પણ ભારતે ગોલ્ડ મેડલ જીત્યો હતો. ભારતની મહિલા ટીમ આ વખતે પણ ગોલ્ડ મેડલ જીતી ચૂકી છે. જાપાનમાં સતત વરસાદ પડી રહ્યો છે આ જ કારણથી અનેક રમત પ્રભાવિત થઈ હતી. ભીના મેદાનને કારણે મેચ રમાઈ શકતી નથી. ભારતની મેચ પહેલાં નિશિનમાં જોરદાર વરસાદ વરસ્યો હતો. મેચ પહેલાં વાદળ ઘેરાયા હતા આવામાં અધિકારીઓએ મેચ ન રમાડવાનો નિર્ણય લીધો હતો. ભારતનું રેન્કીંગ સારું હોવાથી તે સેમિફાઈનલમાં પહોંચ્યું છે.
હવે ભારત ૧ ઑક્ટોબરે શ્રીલંકા અથવા નેપાળ સામે સેમિફાઈનલ રમવા ઉતરશે. જ્યારે પાકિસ્તાન પણ સેમિફાઈનલમાં પહોંચ્યું હોય તે બાંગ્લાદેશ અથવા મલેશિયા સામે રમશે.
