અમેરિકન પ્રતિબંધોની ઐસી તૈસી, ભારત ડીઝલની નિકાસ ચાલુ રાખશે

વૈશ્વિક ડીઝલ સંકટ વચ્ચે ભારત વિશ્વનો બીજો સૌથી મોટો સપ્લાયર

વૈશ્વિક સ્તરે ડીઝલની અછત અને ભાવવધારાની સ્થિતિ વચ્ચે ભારતે સ્પષ્ટ કર્યું છે કે અમેરિકા ડીઝલની નિકાસ પર પ્રતિબંધ મૂકે કે નિયંત્રણ લાદે તો પણ ભારત પોતાની નિકાસ પ્રતિબદ્ધતાઓમાંથી પાછળ નહીં હટે. કેન્દ્રીય પેટ્રોલિયમ મંત્રી હરદીપ સિંહ પુરીએ જણાવ્યું કે ભારત વર્ષોથી રિફાઇનિંગ ક્ષમતામાં રોકાણ કરતું આવ્યું છે અને દેશ સ્થાનિક જરૂરિયાતો સાથે વૈશ્વિક બજારની માંગ પણ પૂરી કરી શકશે.

પ્રાપ્ત સંકેતો મુજબ અમેરિકામાં ડીઝલના ભાવ રેકોર્ડ સ્તરે પહોંચતાં ટ્રમ્પ પ્રશાસન સ્થાનિક બજારમાં પૂરતો પુરવઠો જળવાઈ રહે તે માટે નિકાસ પર નિયંત્રણ લાદવાની શક્યતા પર વિચાર કરી રહ્યું છે. જોકે હજુ સુધી કોઈ અંતિમ નિર્ણય લેવાયો નથી. બીજી તરફ, આ સંભાવનાએ યુરોપિયન દેશોમાં પણ ચિંતા ઊભી કરી છે અને વૈશ્વિક બજારમાં ભાવ વધુ મજબૂત બન્યા છે.

દરમિયાન નવી દિલ્હીમાં યોજાયેલા એક કાર્યક્રમમાં સંબોધન કરતા પુરીએ જણાવ્યું કે ભારતે મોરિશિયસ સાથે પાંચ વર્ષનો ડીઝલ પુરવઠા કરાર કર્યો છે અને તેની પ્રથમ શિપમેન્ટ પણ પહોંચી ગઈ છે. આવા કરારોનું પાલન ન કરવાથી આંતરરાષ્ટ્રીય ખરીદદારોમાં ભારતની વિશ્વસનીયતા ઘટી શકે છે. તેમણે ભારપૂર્વક કહ્યું કે ભારત વિશ્વસનીય ઊર્જા ભાગીદાર તરીકે પોતાની ઓળખ જાળવી રાખશે.

આ પણ વાંચો: યુએનની સામાન્ય સભામાં નેતન્યાહૂ બોલવા ઊભા થયા તે સાથે જ હોલ ખાલી થવા લાગ્યો

કપ્લરના આંકડા મુજબ રશિયાની નિકાસ ઘટતાં ભારત આ વર્ષે અમેરિકાના પછી વિશ્વનો બીજો સૌથી મોટો સમુદ્રી માર્ગે ડીઝલ સપ્લાયર બન્યો છે અને વૈશ્વિક નિકાસમાં તેનો હિસ્સો આશરે 10 ટકા સુધી પહોંચ્યો છે.

ભારતની રિફાઇનરીઓ ઉપર વિશ્વની નજર

ભારતનો રિફાઇનિંગ ક્ષેત્ર ઝડપથી વિસ્તરી રહ્યો હોવાથી વૈશ્વિક ઊર્જા કંપનીઓનું ધ્યાન હવે ભારતીય બજાર તરફ વળ્યું છે. હરદીપ પુરીએ જણાવ્યું કે હાલમાં દેશની રિફાઇનિંગ ક્ષમતા આશરે 267 મિલિયન ટન પ્રતિ વર્ષ (MTPA) છે, જે આગામી એક વર્ષમાં 290 MTPA સુધી પહોંચવાની અને 2030-32 સુધીમાં 320 MTPA સુધી વધારવાની યોજના છે. યુરોપના કેટલાક દેશોમાં રિફાઇનિંગ ક્ષમતા ઘટી રહી હોવાથી ભારત વૈશ્વિક ઊર્જા પુરવઠામાં વધુ મહત્વની ભૂમિકા ભજવશે. સાઉદી અરામકો અને અબુ ધાબી નેશનલ ઓઇલ કંપની (ADNOC) સહિતની મોટી આંતરરાષ્ટ્રીય કંપનીઓ ભારતીય રિફાઇનિંગ ક્ષેત્રમાં રોકાણ માટે ચર્ચા કરી રહી છે. પુરીના જણાવ્યા મુજબ ભારતનું વધતું ઈંધણ બજાર અને મજબૂત ઈન્ફ્રાસ્ટ્રક્ચર વૈશ્વિક રોકાણકારોને આકર્ષી રહ્યું છે.