સરકાર વિરુદ્ધ બોલવા બદલ મારું એન્કાઉન્ટર થઈ શકે છે: વાંગચુક

અમિત શાહનું રાજીનામું માંગ્યું; લેહ-લદાખ બંધ, સ્મૃતિસભામાં જો કે મર્યાદિત હાજરી

લદાખમાં ગયા વર્ષે 24 સપ્ટેમ્બરે રાજ્યનો દરજ્જો અને છઠ્ઠી અનુસૂચિના રક્ષણોની માંગને લઈને થયેલી હિંસાની પ્રથમ વરસી નિમિત્તે આયોજિત કાર્યક્રમમાં પર્યાવરણ કાર્યકર સોનમ વાંગચુકે કેન્દ્ર સરકાર પર ગંભીર આરોપો લગાવ્યા હતા. તેમણે ગૃહમંત્રી અમિત શાહના રાજીનામાની માંગ સાથે ન્યાયિક તપાસ અહેવાલ જાહેર કરવાની પણ માંગ કરી હતી.

લેહમાં યોજાયેલી સ્મૃતિસભામાં સોનમ વાંગચુકે જણાવ્યું હતું કે સરકાર વિરુદ્ધ અવાજ ઉઠાવવાને કારણે તેમનું પણ “એન્કાઉન્ટર” થઈ શકે છે. તેમણે દાવો કર્યો કે ઘણા લોકો તેમને સંભવિત જોખમ અંગે ચેતવણી આપી રહ્યા છે, પરંતુ તેઓ લદાખના હકો માટે લડત ચાલુ રાખશે.

વાંગચુકે ગયા વર્ષે થયેલી હિંસામાં ચાર લોકોના મોત માટે રાજકીય જવાબદારી નક્કી કરવાની માંગ કરી હતી. ગૃહમંત્રી અમિત શાહે આ ઘટનાની જવાબદારી સ્વીકારીને રાજીનામું આપવું જોઈએ તેવી તેમણે માંગણી કરી હતી. તેમણે આરોપ લગાવ્યો કે આંદોલન દરમિયાન સુરક્ષા દળોએ સ્થાનિક યુવાનો સામે અત્યાધુનિક હથિયારોનો ઉપયોગ કર્યો હતો અને પછી તેમને રાષ્ટ્રવિરોધી તરીકે દર્શાવવાનો પ્રયાસ થયો હતો.

તેમણે કહ્યું કે જો ન્યાયિક તપાસનો અહેવાલ જાહેર નહીં કરવામાં આવે તો સ્વતંત્ર “પીપલ્સ ટ્રિબ્યુનલ” રચીને સમગ્ર ઘટનાની તપાસ કરાવવામાં આવશે. વાંગચુકે લદાખની રાજ્યનો દરજ્જો, છઠ્ઠી અનુસૂચિ હેઠળના સંવિધાનિક રક્ષણો અને સ્થાનિક લોકો સાથે કરવામાં આવેલા વચનોના મુદ્દા ફરી ઉઠાવ્યા હતા.

આ પણ વાંચો: અમેરિકન પ્રતિબંધોની ઐસી તૈસી, ભારત ડીઝલની નિકાસ ચાલુ રાખશે

લદાખમાં બુધવારે હિંસાની વરસી નિમિત્તે લેહ અને કારગિલ સહિતના વિસ્તારોમાં બંધનું પાલન કરવામાં આવ્યું હતું. અનેક વેપારી સંસ્થાઓ બંધ રહી હતી અને રસ્તાઓ પર વાહનવ્યવહાર પણ ઓછો જોવા મળ્યો હતો.

લદાખ મુદ્દે રાહુલ કેમ ચુપ ?

સોનમ વાંગચુકે કોંગ્રેસ નેતા રાહુલ ગાંધીનો ઉલ્લેખ કરતાં કહ્યું કે દિલ્હીના જંતર-મંતર ખાતે વિદ્યાર્થીઓ સામે પોલીસ કાર્યવાહી બાદ રાહુલ ગાંધીએ અમિત શાહના રાજીનામાની માંગ કરી હતી, જેનું તેઓ સમર્થન કરે છે. જોકે તેમણે સવાલ ઉઠાવ્યો કે લદાખમાં ચાર લોકોના મોત થયા અને ગંભીર હિંસા થઈ હોવા છતાં રાહુલ ગાંધી આ મુદ્દે મૌન કેમ છે? વાંગચુકે કહ્યું કે જો દિલ્હીની ઘટનામાં જવાબદારી નક્કી થઈ શકે તો લદાખની ઘટનામાં પણ સમાન માપદંડ લાગુ થવો જોઈએ.

લેહ-લદાખ બંધ, છતાં પાંખી હાજરી

હિંસાની પ્રથમ વરસી નિમિત્તે લેહ અને કારગિલમાં બંધનું વ્યાપક પાલન થયું હતું. દુકાનો અને વ્યાપારી સંસ્થાઓ બંધ રહી હતી. જોકે સ્મૃતિસભામાં અપેક્ષિત સંખ્યામાં લોકો હાજર રહ્યા નહોતા. વાંગચુકે તેનો કારણ ભારે સુરક્ષા બંદોબસ્ત અને લોકોમાં વ્યાપેલા ભયને ગણાવ્યું હતું. તેમના જણાવ્યા મુજબ ગામડાંઓમાં પણ સુરક્ષા દળોની તૈનાતી કરવામાં આવી હતી. બીજી તરફ પોલીસે સ્પષ્ટતા કરી હતી કે કોઈને પણ કાર્યક્રમમાં ભાગ લેતા અટકાવવામાં આવ્યા નહોતા.આયોજકોને અપેક્ષા કરતા ઓછા મળેલા પ્રતિસાદને કારણે ઓછી હાજરી હોવાનો પોલીસે દાવો કર્યો હતો.