નાની વયે ખાંડનો ખતરો: 11થી 18 વર્ષનાં બાળકો દરરોજ 18% ખાંડ લે છે
બાળકોમાં ખાંડ અને જંકફૂડના વધતા સેવનને કારણે સ્થૂળતા, ડાયાબિટીસ સહિતની આરોગ્યલક્ષી સમસ્યાઓ વધી રહી હોવાની ચિતા વચ્ચે શિક્ષણ વિભાગ દ્વારા શાળાઓમાં સુગર બોર્ડ લગાવવા અગાઉ સૂચના આપવામાં આવી હતી. જોકે, અનેક શાળાઓમાં હજુ સુધી આ નિયમનું પાલન ન થતાં શિક્ષણ બોર્ડે ફરી પરિપત્ર બહાર પાડ્યો છે.
વિદ્યાર્થીઓના શારીરિક સ્વાસ્થ્યને ધ્યાનમાં રાખીને શિક્ષણ વિભાગ દ્વારા એક વર્ષ અગાઉ આ નિર્ણય લેવામાં આવ્યો હતો. ખાસ કરીને બાળકોમાં ટાઇપ-૧ ડાયાબિટીસનું પ્રમાણ વધતું હોવાનું પણ સામે આવ્યું છે. સામાન્ય રીતે ૫ ટકા ખાંડનો ઉપયોગ કરવાનો હોય છે, જ્યારે ૮થી ૧૦ વર્ષની વયના બાળકોમાં આ પ્રમાણ ૧૩ ટકા અને ૧૧થી ૧૮ વર્ષની વયના બાળકોમાં ૧૮ ટકા સુધી પહોંચ્યું હોવાનું જણાવાયું છે.
બાળકોમાં વધતા ખાંડના સેવનના કારણે ઓબેસિટી, ડાયાબિટીસ તેમજ દાંતને લગતી સમસ્યાઓનું પ્રમાણ પણ વધી રહ્યું છે. આ સ્થિતિને ધ્યાનમાં રાખીને શાળાઓમાં ખાસ સુગર બોર્ડ લગાવવા સૂચના આપવામાં આવી હતી. સુગર બોર્ડના માધ્યમથી વિદ્યાર્થીઓને દરરોજ ઉપયોગમાં લેવાતા ખોરાકમાં રહેલી ખાંડનું પ્રમાણ, તેમજ વધુ પડતી ખાંડના સેવનથી શરીર પર થતી અસરો અંગે જાગૃત કરવામાં આવશે. શિક્ષણ વિભાગ દ્વારા વિદ્યાર્થીઓમાં સ્વસ્થ આહાર અંગે જાગૃતિ લાવવા અભિયાન ચલાવવાની પણ સૂચના આપવામાં આવી છે. તજજ્ઞોના મત અનુસાર નાની વયે ખાંડનું વધુ પડતું સેવન બાળકોના શારીરિક અને માનસિક વિકાસ પર અસર કરી શકે છે. તેથી શિક્ષકો અને પેરેન્ટ્સ સાથે મળીને બાળકોને વધુ પડતા ગળ્યા ખોરાક અને જંકફૂડથી દૂર રાખવા પ્રયાસ કરવામાં આવે તે જરૂરી છે.આ ઉપરાંત શાળાઓમાં બાળકોને સ્વસ્થ આહાર અંગે સમજ આપવામાં આવશે. ખાંડનું વધુ પડતું સેવન કરવાથી થતી અસરો અંગે માહિતી આપી બાળકોમાં સ્વસ્થ ખાણીપીણીની ટેવ વિકસાવવાનો પ્રયાસ કરવામાં આવશે.
