બેંક ગ્રાહકો માટે રાહતના સમાચાર: રવિવારે દેશભરમાં બેંકો ખુલ્લી રહેશે, ત્યારબાદ ત્રણ દિવસની હડતાળ

મહિનાના અંતિમ દિવસોમાં બેંકિંગ વ્યવહારો સાથે જોડાયેલા નાગરિકો માટે એક ખૂબ જ મહત્વપૂર્ણ સમાચાર સામે આવ્યા છે. યુનાઇટેડ ફોરમ ઓફ બેંક યુનિયન્સ (UFBU) દ્વારા આગામી સપ્તાહમાં ત્રણ દિવસની રાષ્ટ્રવ્યાપી બેંક હડતાળનું એલાન કરવામાં આવ્યું છે, જેના કારણે સામાન્ય જનતાની મુશ્કેલીઓ વધી શકે તેમ હતી. આ સ્થિતિને ગંભીરતાથી લઈને બેંક ગ્રાહકોને રાહત આપવા માટે ભારતીય રિઝર્વ બેંક (RBI) અને નાણા મંત્રાલય દ્વારા એક મોટો નિર્ણય લેવામાં આવ્યો છે. હડતાળ પહેલાં ગ્રાહકોના અટવાયેલા કામો પૂરા થઈ શકે તે માટે હવે રવિવારના રોજ પણ બેંકો ખુલ્લી રાખવાની મંજૂરી આપવામાં આવી છે.

૨૭ સપ્ટેમ્બર, રવિવારે દેશભરમાં ખુલ્લી રહેશે બેંકો

યુનાઇટેડ ફોરમ ઓફ બેંક યુનિયન્સ (UFBU) દ્વારા પાંચ દિવસના કાર્યકારી સપ્તાહની માંગણીને લઈને આગામી 28 સપ્ટેમ્બરથી ત્રણ દિવસીય હડતાળનું આહ્વાન કરવામાં આવ્યું છે. સામાન્ય રીતે મહિનાના ચોથા શનિવાર અને રવિવારની સાપ્તાહિક રજાઓ બાદ આ હડતાળ શરૂ થવાની હોવાથી બેંકો સળંગ પાંચ દિવસ બંધ રહેવાની સંભાવના હતી. આ સમસ્યાના નિવારણ માટે રિઝર્વ બેંક ઓફ ઇન્ડિયાએ જાહેર કર્યું છે કે તમામ જાહેર ક્ષેત્રની બેંકો અને પ્રાદેશિક ગ્રામીણ બેંકો આગામી રવિવાર એટલે કે 27 સપ્ટેમ્બર 2026ના રોજ રાબેતા મુજબ કાર્યરત રહેશે. આ દિવસે બેંક શાખાઓ, એટીએમ સાથે જોડાયેલી ઓફિસો અને કરન્સી ચેસ્ટ પણ સંપૂર્ણપણે ચાલુ રહેશે.

૨૮ થી ૩૦ સપ્ટેમ્બર દરમિયાન ત્રણ દિવસીય હડતાળ

નાણા મંત્રાલય અને બેંક યુનિયનો વચ્ચેની ચર્ચા છતાં યુનિયનો પોતાની માંગ પર અડिग રહ્યા છે, જેના કારણે આગામી 28 સપ્ટેમ્બર, સોમવારથી લઈને 30 સપ્ટેમ્બર, બુધવાર સુધી દેશવ્યાપી બેંક હડતાળ રહેશે. આ ત્રણ દિવસ દરમિયાન બેન્કિંગ કામગીરી પર ભારે અસર પડી શકે છે.

આ પણ વાંચો: લોકશાહીમાં મતભેદો કે વિવાદ? ચૂંટણી પંચે SIR અંગેના આંતરિક મતભેદના અહેવાલોને ફગાવ્યા

સરકાર અને બેંક મેનેજમેન્ટ દ્વારા યુનિયનોને હડતાળ મુલતવી રાખવા માટે અપીલ કરવામાં આવી છે, પરંતુ જો હડતાળ યથાવત રહેશે તો ગ્રાહકોને રોકડ વ્યવહાર અને અન્ય કામકાજમાં મુશ્કેલીઓ પડી શકે છે.

બેંક યુનિયનોની હડતાળને કારણે ગ્રાહકોને પડનારી અગવડતાને ધ્યાનમાં રાખીને RBI દ્વારા રવિવારે બેંકો ચાલુ રાખવાનો લેવાયેલો નિર્ણય અત્યંત આવકારદાયક છે. જે નાગરિકોના બેન્કિંગ કામો બાકી હોય તેઓએ હડતાળ શરૂ થાય તે પહેલાં અથવા રવિવારના દિવસનો ઉપયોગ કરીને પોતાના જરૂરી વ્યવહારો પતાવી લેવા હિતાવહ છે.