અમદાવાદમાં 1 વર્ષ સુધી મોંઘી બોટલમાં નકલી દારૂ વેચાયો!: એકની ધરપકડ

ગુજરાતમાં ગેરકાયદે અને નકલી દારૂનું વેચાણ અટકાવવા માટે પોલીસ ભલે ગમે તેટલા દાવા કરતી હોય, પરંતુ વાસ્તવિકતા કંઈક અલગ જ હોય છે. તાજેતરમાં ભાવનગર લઠ્ઠાકાંડની ગંભીર ઘટના બાદ રાજ્યભરમાં પોલીસ તંત્ર સફાળું જાગ્યું છે. આ દરમિયાન અમદાવાદના નિકોલ અને કુબેરનગર વિસ્તારમાં સસ્તા દારૂમાં કેમિકલ ભેળવીને તેને મોંઘી અને જાણીતી બ્રાન્ડની બોટલોમાં ભરીને વેચવાના એક મોટા કૌભાંડનો પર્દાફાશ થયો છે. સ્ટેટ મોનિટરિંગ સેલની બાતમીના આધારે નિકોલ પોલીસે દરોડા પાડીને એક મુખ્ય આરોપીની ધરપકડ કરી છે, જ્યારે તેનો સાથીદાર હાલ ફરાર થઈ ગયો છે.

સ્ટેટ મોનિટરિંગ સેલની બાતમીથી નિકોલ પોલીસના દરોડા

મળતી માહિતી મુજબ, સ્ટેટ મોનિટરિંગ સેલને ચોક્કસ બાતમી મળી હતી કે નિકોલ વિસ્તારમાં નકલી દારૂનું મોટું રેકેટ ચાલી રહ્યું છે. આ બાતમીના આધારે 20 ઓગસ્ટ 2026ના રોજ નિકોલ પોલીસે અટલ આવાસ યોજનાના મકાનની પાછળના ગેટ પાસે વોચ ગોઠવી હતી. આ દરમિયાન શંકાસ્પદ હાલતમાં સ્કૂટર લઈને પસાર થઈ રહેલા એક શખસને રોકીને તલાશી લેવામાં આવી હતી. પ્રાથમિક પૂછપરછમાં તેણે પોતાનું નામ સુનિલ ઉર્ફે સોનુ રમેશ માખીજા (ઉંમર ૨૬, રહે. બ્લોક ૧૩, અટલ આવાસ યોજના) હોવાનું જણાવ્યું હતું.

આ પણ વાંચો: ગુજરાતના યાત્રાધામોમાં ગત વર્ષે 47 લાખથી વધુ શ્રદ્ધાળુઓએ માણ્યો ‘ઉડન ખટોલા’નો રોમાંચ

સ્કૂટરની ડેક્કીમાંથી મળી મોંઘી બ્રાન્ડની દારૂની બોટલ

પોલીસે જ્યારે સુનિલના સ્કૂટરની ડિક્કી ચેક કરી, ત્યારે અંદરથી મોંઘી બ્રાન્ડેડ વિદેશી દારૂની બોટલ મળી આવી હતી. આરોપીની કડક પૂછપરછ બાદ પોલીસે તેના ભાગીદાર દિનેશના કુબેરનગર સ્થિત ઘરે પણ દરોડો પાડ્યો હતો. ત્યાંથી પોલીસને વિવિધ ફ્લેવર અને કેમિકલ ભરેલી ધાતુની ૪ અને પ્લાસ્ટિકની ૪ નાની બોટલો તેમજ એક આધારકાર્ડ મળી આવ્યું હતું. પોલીસે કુલ 6,500 રૂપિયાનો મુદ્દામાલ જપ્ત કર્યો છે, જેમાં 5,000 રૂપિયાની કિંમતનો એક મોબાઈલ ફોન પણ સામેલ છે.

એક વર્ષથી ચાલતો હતો આ ખતરનાક ગોરખધંધો

પોલીસ તપાસમાં ચોંકાવનારો ખુલાસો થયો છે કે સુનિલ અને તેનો ફરાર સાથીદાર દિનેશ છેલ્લા એક વર્ષથી આ ગેરકાયદે ધંધો ચલાવી રહ્યા હતા. તેઓ ચામુંડા બ્રિજ નીચે આવેલી ભંગારની દુકાનેથી મોંઘી બ્રાન્ડની ખાલી બોટલો, તેના ઢાંકણા અને લેબલ ખરીદીને લાવતા હતા. ત્યારબાદ તેમાં સસ્તો વિદેશી દારૂ, પાણી અને બ્રાન્ડ જેવી જ ફ્લેવર કે કેમિકલ મિક્સ કરીને નકલી સીલ મારી દેતા હતા. આ નકલી દારૂને અસલી મોંઘી બ્રાન્ડના નામે ગ્રાહકોને વેચીને તેમની સાથે છેતરપિંડી આચરવામાં આવતી હતી. હાલ પોલીસે સુનિલ વિરુદ્ધ ગુનો નોંધીને તેની ધરપકડ કરી લીધી છે અને ફરાર દિનેશને ઝડપી પાડવા માટે ચક્રો ગતિમાન કર્યા છે.

ભાવનગર લઠ્ઠાકાંડ બાદ રાજ્યમાં સુરક્ષા અને દારૂબંધીના અમલીકરણ પર સવાલો ઊભા થઈ રહ્યા છે. અમદાવાદમાં એક વર્ષ સુધી બેરોકટોક ચાલેલું આ નકલી દારૂનું કૌભાંડ દર્શાવે છે કે બુટલેગરો લોકોના સ્વાસ્થ્ય સાથે ચેડાં કરવામાં જરાય અચકાતા નથી. જો પોલીસ અગાઉથી જ આ બાબતે સક્રિય રહી હોત, તો આટલા લાંબા સમય સુધી આ ગેરકાયદેસર ધંધો ધમધમતો ન અટકાવી શકાયો હોત.