આ વખતે બાળકો માટે લાઈટવાળી રાખડીઓની માગણીમાં વધારો, ટ્રેન્ડ બદલાયો

ઉપહાર, મીઠાઈ, કપડા ડ્રાયફ્રુટ અને અન્ય તહેવારને લગતી ચીજોનો જબરો ઉપાડ, વોકલ ફોર લોકલ અભિયાનની અસર

આ વર્ષે રક્ષાબંધનના તહેવાર પર દેશભરના બજારોમાં રાખડીઓનો વેપાર લગભગ રૂપિયા 25,000 કરોડ સુધી પહોંચી શકે છે. આ અંદાજ કોન્ફેડરેશન ઓફ ઓલ ઇન્ડિયા ટ્રેડર્સ (CAIT) દ્વારા આપવામાં આવ્યો છે. ગત વર્ષની સરખામણીએ આ લગભગ 45 ટકા વધારો છે. આ વખતે બાળકો માટેની લાઈટ વાળી રાખડીની માંગમાં વધારો જોવા મળી રહ્યો છે

CAITના રાષ્ટ્રીય મહામંત્રી અને સાંસદ પ્રવીણ ખંડેલવાલ તેમજ અન્ય અધિકારીઓના જણાવ્યા અનુસાર, માત્ર રાખડીઓનો વેપાર જ રૂ. 25,000 કરોડની આસપાસ રહેવાની સંભાવના છે. જો તેમાં ભેટ, મીઠાઈ, કપડાં, ડ્રાય ફ્રૂટ અને અન્ય તહેવારી સામાનનો સમાવેશ કરવામાં આવે તો કુલ વેપાર રૂ. 30,000 કરોડને પાર કરી શકે છે.

ગત વર્ષ (2025)માં રાખડીનો વેપાર લગભગ રૂ. 17,000 કરોડનો થયો હતો, જ્યારે 2023માં આ આંકડો રૂ. 12,000 કરોડની આસપાસ હતો. છેલ્લા કેટલાક વર્ષોમાં આ વેપારમાં સતત વધારો જોવા મળી રહ્યો છે. 2018માં જ્યાં રૂ. 3,000 કરોડની આસપાસ વેપાર હતો, ત્યાં હવે તે ઘણો વધી ગયો છે.

આ પણ વાંચો: યુપીઆઈ વ્યવહાર ઉપર 0.3% ચાર્જ લાગુ થઈ શકે, આમ જનતાને મુક્તિ

સ્વદેશી રાખડીઓની માંગ અને થીમ આધારિત ડિઝાઇન

આ વર્ષે બજારોમાં ચીની રાખડીઓની માંગ નહિવત્ છે. વેપારીઓ અને ગ્રાહકોએ સંપૂર્ણપણે સ્વદેશી અને ભારતીય નિર્મિત રાખડીઓ અપનાવી છે. બજારોમાં માત્ર ભારતમાં બનેલી રાખડીઓ જ ઉપલબ્ધ છે.

પરંપરાગત રાખડીઓ સાથે સાથે વિશેષ થીમ આધારિત રાખડીઓ પણ આકર્ષણનું કેન્દ્ર બની છે. જેમાં ‘વિકસિત ભારત’, ‘મોદી ગેરંટી’, ‘બ્રહ્મોસ’, ‘આત્મનિર્ભર ભારત’, ‘વોકલ ફોર લોકલ’, ‘નારી વંદન’ અને ‘રાષ્ટ્ર રક્ષા સૂત્ર’ જેવી થીમવાળી રાખડીઓનો સમાવેશ થાય છે. આ રાખડીઓ સ્થાનિક કારીગરો, મહિલા ઉદ્યોગસાહસિકો અને સ્વ-સહાય જૂથો દ્વારા બનાવવામાં આવી રહી છે, જેનાથી તેમને સીધો આર્થિક લાભ મળી રહ્યો છે.

સ્થાનિક અર્થતંત્રને પ્રોત્સાહન, ચીનની રાખડીની કોઈ ડિમાન્ડ નથી

CAITના મતે સ્વદેશી ઉત્પાદનો પ્રત્યે વધતો ઝોક અને ‘વોકલ ફોર લોકલ’ અભિયાનને કારણે ભારતીય કારીગરો, મહિલા ઉદ્યોગસાહસિકો, નાના ઉદ્યોગો અને સ્થાનિક વેપારીઓને આ રક્ષાબંધન પર મોટો લાભ થવાની અપેક્ષા છે. સંગઠન દેશના વિવિધ શહેરોમાં વિશેષ સ્વદેશી મેળાઓનું આયોજન પણ કરી રહ્યું છે, જ્યાં મહિલા ઉદ્યોગસાહસિકો અને સ્થાનિક કારીગરોના ઉત્પાદનોના વેચાણ થશે. ચીનની રાખડીની કોઈ ડિમાન્ડ નથી.

28મી એ રક્ષાબંધનનો તહેવાર છે અંતિમ દિવસોમાં ઘરાકી વધી શકે છે

રક્ષાબંધન 2026ની તારીખ 28 ઑગસ્ટ (શુક્રવાર) છે. તહેવાર નજીક આવતાં બજારોમાં રાખડીની ખરીદીમાં વધારો જોવા મળી રહ્યો છે. વેપારીઓના મતે છેલ્લા દિવસોમાં વેચાણ વધુ વેગ પકડી શકે છે.

આ અંદાજ CAITના સર્વે અને વેપારીઓ પાસેથી મળેલી માહિતી પર આધારિત છે. તહેવારના આ અવસરે ભાઈ-બહેનના પ્રેમ સાથે સ્વદેશી અર્થતંત્રને પણ મજબૂતી મળી રહી છે.