નવો બિઝનેસ શરૂ કરનારા કે નિર્ધારિત ટર્નઓવર ધરાવતા વેપારીઓ માટે જીએસટી (GST) રજિસ્ટ્રેશન કરાવવું અનિવાર્ય છે. સામાન્ય રીતે લોકોને એવું લાગે છે કે આ પ્રક્રિયા માટે સરકારી કચેરીઓના ધક્કા ખાવા પડશે અથવા પ્રોફેશનલ એજન્ટને 5,000 થી 10,000 રૂપિયા ચૂકવવા પડશે. પરંતુ, ભારત સરકારના સત્તાવાર GST Portal પર આ પ્રક્રિયા સંપૂર્ણપણે ડિજિટલ અને મફત ઉપલબ્ધ છે, જ્યાં તમે જાતે જ ઘરે બેઠા ઓનલાઇન અરજી કરી શકો છો.
આ મહત્ત્વના દસ્તાવેજોની પડશે જરૂર
GST રજિસ્ટ્રેશન ઓનલાઇન કરવા માટે તમારી પાસે નીચે મુજબના ડોક્યુમેન્ટ્સ તૈયાર હોવા જરૂરી છે:
ઓળખનો પુરાવો: બિઝનેસ માલિક, પાર્ટનર કે ડિરેક્ટરનું પાન કાર્ડ અને આઈડી પ્રૂફ.
સરનામાનો પુરાવો: બિઝનેસના સ્થળનું વીજળી બિલ, પ્રોપર્ટી ટેક્સની રસીદ અથવા રેન્ટ એગ્રીમેન્ટ.
બેંકની વિગતો: કેન્સલ કરેલો ચેક, બેંક સ્ટેટમેન્ટ અથવા પાસબુકના પહેલા પેજની નકલ.
અન્ય દસ્તાવેજો: પાસપોર્ટ સાઇઝનો ફોટો અને અધિકૃત હસ્તાક્ષરકર્તાનો ઓથોરાઈઝેશન લેટર.
GST રજિસ્ટ્રેશનની ઓનલાઇન પ્રક્રિયા
સરકારી પોર્ટલ પર જાતે અરજી કરવા માટે નીચેના સ્ટેપ્સ અનુસરો:
સૌપ્રથમ TRN જનરેટ કરો: સત્તાવાર GST Portal ની મુલાકાત લો અને Services > Registration > New Registration વિકલ્પ પર ક્લિક કરો. અહીં ટેક્સપાયર સિલેક્ટ કરી પાન કાર્ડ મુજબ નામ, નંબર, ઈમેલ અને મોબાઈલ નંબર દાખલ કરો. મોબાઈલ અને ઈમેલ પર આવેલા OTP વેરિફાઈ કરવાથી 15 આંકડાનો TRN (ટેમ્પરરી રેફરન્સ નંબર) જનરેટ થશે.
મુખ્ય ફોર્મ ભરીને ડોક્યુમેન્ટ્સ અપલોડ કરો: TRN અને કેપ્ચા નાખી પોર્ટલ પર લોગિન કરો. ‘My Saved Applications’ માં જઈને ડ્રાફ્ટ ફોર્મ ખોલો. તેમાં બિઝનેસની વિગતો, પ્રમોટરની માહિતી, કામકાજનું સ્થળ અને HSN/SAC કોડ્સ ભરો. આ પછી માંગ્યા મુજબના તમામ જરૂરી ડોક્યુમેન્ટ્સ PDF અથવા JPEG ફોર્મેટમાં અપલોડ કરો.
આધાર ઓથેન્ટિકેશન પૂર્ણ કરો: ફોર્મ સબમિટ કરવાના અંતિમ તબક્કામાં આધાર ઓથેન્ટિકેશનનો વિકલ્પ પસંદ કરો. આધાર સાથે લિંક કરેલા મોબાઈલ નંબર પર OTP મેળવી આ પ્રક્રિયા પૂરી કરો. આનાથી કોઈપણ ફિઝિકલ વેરિફિકેશન વિના 7 થી 10 દિવસમાં GST નંબર જારી થઈ જાય છે.
ARN ટ્રેકિંગ અને સર્ટિફિકેટ ડાઉનલોડ: ફોર્મ સબમિટ થયા પછી તમારા રજિસ્ટર્ડ નંબર પર ARN (એપ્લિકેશન રેફરન્સ નંબર) મળશે. તમે પોર્ટલ પર જઈને અરજીનું સ્ટેટસ ચકાસી શકો છો. મંજૂરી મળતાં જ તમને 15 આંકડાનો GSTIN અને લોગિન પાસવર્ડ મળી જશે, જેના દ્વારા તમે પોર્ટલ પરથી તમારું GST Certificate સરળતાથી ડાઉનલોડ કરી શકશો.
સરકારની આ ડિજિટલ પહેલથી વેપારીઓ એજન્ટોના ભારેખમ ખર્ચ અને વહીવટી મુશ્કેલીઓથી બચી શકે છે. જો તમે પણ નવો ધંધો શરૂ કરવા જઈ રહ્યા છો, તો કોઈને પણ ફી આપ્યા વગર જાતે જ GST Portal પર જઈને આ સરળ પ્રક્રિયા દ્વારા તમારો GST નંબર મેળવી શકો છો.
