સાવરકર અંગેની ટિપ્પણીના કેસમાં રાહુલ ગાંધી સામેની ફરિયાદ રદ કરતી સુપ્રીમ કોર્ટ
સાવરકર બ્રિટિશરોના નોકર હોવાની અને પેન્શન લેતા હોવાની ટિપ્પણી સામે ફોજદારી ફરિયાદ થઈ હતી
કોંગ્રેસના સાંસદ અને લોકસભામાં વિપક્ષના નેતા રાહુલ ગાંધી સામે વિનાયક દામોદર સાવરકર અંગે કરાયેલી ટિપ્પણીઓના મામલે દાખલ કરાયેલી ફોજદારી ફરિયાદને સુપ્રીમ કોર્ટે શુક્રવારે રદ કરી દીધી છે. કોર્ટે નોંધ્યું કે ભારતીય દંડ સંહિતાની કલમ 153-એ હેઠળ કાર્યવાહી માટે ઉત્તર પ્રદેશ સરકારની પૂર્વ મંજૂરી ફરજિયાત છે, પરંતુ રાજ્ય સરકારે આવી કોઈ મંજૂરી આપી હોવાનો રેકોર્ડ પર પુરાવો નથી.
જસ્ટિસ દીપાંકર દત્તા અને જસ્ટિસ શીલ નાગુની ખંડપીઠ સમક્ષ સુનાવણી દરમિયાન ઉત્તર પ્રદેશ સરકાર તરફથી હાજર એડિશનલ સોલિસિટર જનરલ કે.એમ. નટરાજને સ્વીકાર્યું હતું કે રાજ્ય સરકારની મંજૂરી લેવામાં આવી નથી. ફરિયાદી પક્ષે દલીલ કરી હતી કે સમન્સનો આદેશ રદ કરીને મામલો મેજિસ્ટ્રેટ પાસે પરત મોકલવામાં આવે જેથી જરૂરી મંજૂરી મેળવવાની કાર્યવાહી થઈ શકે. જોકે, જસ્ટિસ દત્તાએ સ્પષ્ટ કર્યું કે મંજૂરી વિના ગુનાની નોંધ લેવી જ કાયદેસર નથી અને જો મંજૂરી નથી તો મામલો ત્યાં જ પૂર્ણ થઈ જાય છે.
કોર્ટે પોતાના આદેશમાં જણાવ્યું કે ઉત્તર પ્રદેશ સરકારના સોગંદનામામાં પણ રાહુલ ગાંધી સામે કાર્યવાહી માટે મંજૂરી આપવામાં આવી હોવાનો કોઈ ઉલ્લેખ નથી. તેથી ફરિયાદ તેમજ મેજિસ્ટ્રેટ દ્વારા પસાર કરાયેલા તમામ આદેશો રદ કરવામાં આવે છે.
આ કેસ રાહુલ ગાંધીના એક પત્રકાર પરિષદ દરમિયાનના નિવેદનને લઈને દાખલ થયો હતો, જેમાં તેમણે સાવરકરને બ્રિટિશરોના સેવક ગણાવ્યા હતા અને તેઓ બ્રિટિશ સરકાર પાસેથી પેન્શન લેતા હતા એવો આક્ષેપ કર્યો હતો. લખનૌના વકીલ નૃપેન્દ્ર પાંડે દ્વારા દાખલ કરાયેલી ફરિયાદમાં આ નિવેદનો દ્વારા સમાજમાં દ્વેષ અને વૈમનસ્ય ફેલાવવાનો પ્રયાસ કરવામાં આવ્યો હોવાનો દાવો કરવામાં આવ્યો હતોં
અલ્હાબાદ હાઇકોર્ટે રાહત આપવાનો ઇનકાર કર્યો હતો
રાહુલ ગાંધી ડિસેમ્બર 2024માં લખનૌની ટ્રાયલ કોર્ટે જારી કરેલા સમન્સ આદેશને પડકારવા અલ્હાબાદ હાઇકોર્ટ પહોંચ્યા હતા. જોકે 4 એપ્રિલ, 2025ના રોજ હાઇકોર્ટે તેમને સીધી રાહત આપવાનો ઇનકાર કર્યો હતો. હાઇકોર્ટના જસ્ટિસ સુભાષ વિદ્યાર્થિએ નોંધ્યું હતું કે રાહુલ ગાંધી પાસે સેશન કોર્ટમાં રિવિઝન અરજી દાખલ કરવાનો વૈકલ્પિક કાનૂની ઉપાય ઉપલબ્ધ છે. ત્યારબાદ રાહુલ ગાંધીએ સુપ્રીમ કોર્ટનો દરવાજો ખખડાવ્યો હતો, જ્યાંથી હવે તેમને અંતિમ રાહત મળી છે.
