PoK કવરેજ બાદ અલ જઝીરા પર પાકિસ્તાનનો અઘોષિત પ્રતિબંધ ?

ચૂંટણી અને સરકાર વિરોધી આંદોલનોના અહેવાલ બાદ વેબસાઇટ ઍક્સેસ બંધ :’યેલો જર્નાલિઝમ’નો આરોપ

પાકિસ્તાન અધિકૃત કાશ્મીર (PoK)માં સરકાર વિરોધી દેખાવો અને ચૂંટણી પ્રક્રિયા અંગે અલ જઝીરાના અહેવાલો પ્રસારિત થયા બાદ પાકિસ્તાનમાં તેના અંગ્રેજી વેબસાઇટની ઍક્સેસ અવરોધવામાં આવી હોવાના દાવાઓ સામે આવ્યા છે. જોકે શહબાઝ શરીફ સરકારે સત્તાવાર પ્રતિબંધ જાહેર કર્યો નથી, પરંતુ સોશિયલ મીડિયા પર અનેક વપરાશકર્તાઓએ અલ જઝીરાની વેબસાઇટ ન ખુલતી હોવાની ફરિયાદ કરી છે. બીજી તરફ પાકિસ્તાનના માહિતી અને પ્રસારણ મંત્રાલયે અલ જઝીરા પર ‘યેલો જર્નાલિઝમ’ અને ચૂંટણી પ્રક્રિયાનું ખોટું ચિત્રણ કરવાનો આરોપ મૂક્યો છે.

પાકિસ્તાનના માહિતી અને પ્રસારણ મંત્રાલયે, મુઝફ્ફરાબાદના પસંદગીના મતદાન મથકો પરથી પસંદગીના સમય અને વ્યક્તિઓના નિવેદનો દર્શાવી અલ જઝીરાએ પાકિસ્તાન અધિકૃત કાશ્મીરની ચૂંટણીને ખોટી રીતે રજૂ કરવાનો પ્રયાસ કર્યો હોવાનો આક્ષેપ કર્યો છે. મંત્રાલયે આ પ્રકારનું “યેલો જર્નાલિઝમ” ચૂંટણી પ્રક્રિયાને બદનામ કરવા અને લોકોના જનાદેશને નબળો પાડવાના એજન્ડાનો ભાગ હોવાનું જણાવ્યું હતું.

આ પણ વાંચો: જમ્મુ-કાશ્મીરના શોપિયા સહિત અનેક સ્થળે વાદળ ફાટતાં તબાહી

પાકિસ્તાન અધિકૃત કાશ્મીરને ઇસ્લામાબાદ ‘આઝાદ જમ્મુ-કાશ્મીર’ તરીકે ઓળખાવે છે. અલ જઝીરાના અહેવાલોમાં સરકાર વિરોધી દેખાવો અને સુરક્ષા દળોની કાર્યવાહી પર વિશેષ ભાર મૂકવામાં આવ્યો હતો. ત્યારબાદ દેશમાં તેની વેબસાઇટની ઍક્સેસ મર્યાદિત કરવામાં આવી હોવાના દાવાઓ સામે આવ્યા છે, જોકે સરકાર તરફથી આ અંગે કોઈ સત્તાવાર સ્પષ્ટતા કરવામાં આવી નથી.

પત્રકારો પર દમન બંધ કરો: CPJ

કમિટી ટુ પ્રોટેક્ટ જર્નાલિસ્ટ્સ (CPJ)એ પાકિસ્તાન અધિકૃત કાશ્મીરમાં પત્રકારત્વ પર થઈ રહેલા દમનની કડક ટીકા કરી છે. સંસ્થાએ ઇન્ટરનેટ અને ટેલિકોમ સેવાઓમાં પ્રતિબંધ, સમાચાર સંકલન પર નિયંત્રણ તેમજ પત્રકારોની અટકાયત અને ગુમ થવાની ઘટનાઓને ગંભીર ગણાવી છે. CPJએ સ્વતંત્ર પત્રકાર રાજી તાહિર અને તેમના સાથી મહંમદ સૈફના ગુમ થવા અંગે ચિંતા વ્યક્ત કરી છે અને જો તેઓ સરકારી કસ્ટડીમાં હોય તો તેની સત્તાવાર પુષ્ટિ કરીને તેમને કાયદેસરની પ્રક્રિયા બાદ તાત્કાલિક મુક્ત કરવાની માંગ કરી છે. સાથે જ મીડિયા પરના તમામ પ્રતિબંધો હટાવી સ્વતંત્ર અહેવાલોને મંજૂરી આપવા પાકિસ્તાનને અપીલ કરી છે.