નવસારીમાં 64 રસ્તા બંધ, કાવેરી નદીની સપાટી વધતા 15 ગામોને એલર્ટ

નવસારી: આકાશમાંથી જાણે મેઘા તૂટી પડ્યા હોય તેવો નજારો! સત ધોધમાર વરસાદથી નવસારી જિલ્લાનું જનજીવન અસ્તવ્યસ્ત બની ગયું છે. શહેરના રસ્તાઓ નદી બની ગયા, સોસાયટીઓમાં પાણી ઘૂસ્યા અને નદીઓની સપાટી ભયજનક સ્તરે પહોંચતા તંત્ર દોડતું થયું છે. કાવેરી નદીના કાંઠે આવેલા 15 ગામોને એલર્ટ પર રાખવામાં આવ્યા છે.

શહેર જળબંબાકાર, 200થી વધુ ઘરોમાં પાણી ઘૂસ્યા 

નવસારી શહેર અને જિલ્લામાં છેલ્લા 24 કલાકથી વરસી રહેલા વરસાદથી નીચાણવાળા વિસ્તારો પાણીમાં ગરકાવ થયા છે. ખાસ કરીને મંકોડીયા છાપરા રીંગરોડ અને નવસારી-છાપરા માર્ગ પર પાણી ફરી વળતા વાહનવ્યવહાર ઠપ્પ થયો છે. વાહનચાલકોને ભારે મુશ્કેલીનો સામનો કરવો પડી રહ્યો છે.

વિજલપોર વિસ્તારની ગ્રીન પાર્ક અને રોયલ ગાર્ડન સોસાયટીમાં વરસાદી પાણી ઘૂસી જતા 200થી વધુ ઘરો પ્રભાવિત થયા છે. સ્થાનિકોએ જણાવ્યું કે દર વર્ષે ચોમાસામાં આ જ સ્થિતિ સર્જાય છે, પરંતુ કાયમી નિકાલનો કોઈ રસ્તો હજુ નીકળ્યો નથી.

આ પણ વાંચો: ઓનલાઇન પ્લેટફોર્મ પર મહિલાઓ અને બાળકોની સલામતિ માટે ગુજરાત પોલીસનું મેગા અભિયાન

જિલ્લામાં 64 રસ્તા બંધ, ગ્રામ્ય વિસ્તારો પ્રભાવિત 

ભારે વરસાદને કારણે જિલ્લાના કુલ 64 રસ્તાઓ પર અવરજવર બંધ કરી દેવામાં આવી છે. તેમાંથી નવસારી ગ્રામ્યમાં જ 17 રસ્તા બંધ છે. અનેક ગામોનો સંપર્ક તૂટતા તંત્ર દ્વારા સતત મોનિટરિંગ કરવામાં આવી રહ્યું છે અને જરૂરી સ્થળોએ તકેદારીના પગલાં લેવાયા છે.

કાવેરી નદી 12 ફૂટ પર, 15 ગામોને એલર્ટ 

વરસાદ વચ્ચે દરિયામાં ભરતી નજીક આવતા જિલ્લા તંત્ર વધુ સતર્ક બન્યું છે. કાવેરી, અંબિકા અને પૂર્ણા નદીઓની જળસપાટી પર સતત નજર રાખવામાં આવી રહી છે.

ચીખલી નજીકથી પસાર થતી કાવેરી નદીની સપાટી 12 ફૂટ સુધી પહોંચી ગઈ છે. નદીની ભયજનક સપાટી 19 ફૂટ છે. સપાટી વધતા ચીખલી રિવરફ્રન્ટ નજીકનો કોઝવે ઓવરફ્લો થયો છે અને નદી કિનારાનું મહાદેવ મંદિર પણ પાણીમાં ગરકાવ થયું છે. 

સંભવિત જોખમને પગલે કાવેરી કાંઠાના 15 ગામોને એલર્ટ કરવામાં આવ્યા છે.

અંબિકા-પૂર્ણાની સ્થિતિ સામાન્ય, તંત્રની અપીલ 

અધિકારીઓના જણાવ્યા મુજબ હાલ અંબિકા અને પૂર્ણા નદીની સપાટી સામાન્ય છે. પરંતુ ઉપરવાસમાં વરસાદ અને આગામી આગાહીને ધ્યાનમાં રાખીને તમામ નદીઓ પર ચાંપતી નજર રાખવામાં આવી રહી છે.

જિલ્લા વહીવટી તંત્રએ નાગરિકોને અપીલ કરી છે કે બિનજરૂરી રીતે નદી, કોઝવે કે નીચાણવાળા વિસ્તારોમાં ન જાય અને તંત્રની સૂચનાઓનું પાલન કરે.