RFID થી CCTV સુધી: અમદાવાદમાં ડ્રાઇવિંગ લાયસન્સ માટે આજથી નવો AI ડ્રાઇવિંગ ટેસ્ટ શરૂ, પીળી લાઈન અડી તો ગયા કામથી

Mon, July 13 2026

અમદાવાદમાં ડ્રાઇવિંગ લાયસન્સ મેળવવું હવે વધુ સખત બન્યું છે. આજથી એટલે કે 13 જુલાઈથી અમદાવાદ RTOમાં AI આધારિત હાઈટેક ટેસ્ટ ટ્રેક શરૂ થઈ ગયો છે. હવે માણસ નહીં, કોમ્પ્યુટર જ નક્કી કરશે કે તમે પાસ છો કે ફેલ. આ નવી સિસ્ટમમાં RFID ટેગ, ફેસ કેપ્ચર, ફરજિયાત વીડિયો અને ઓટોમેટિક સિગ્નલ છે. ટુ-વ્હીલર અને ફોર-વ્હીલર બંને માટે બેલેન્સ, રિવર્સ S, ઇંગ્લિશ 8 અને પેરેલલ પાર્કિંગની કસોટી પીળી લાઈનના કડક નિયમો સાથે આપવી પડશે.

ટેસ્ટની નવી સંપૂર્ણ પ્રક્રિયા

ટેસ્ટ આપતા પહેલા 4 સ્ટેપ ફરજિયાત છે:

– રજિસ્ટ્રેશન: રજિસ્ટ્રેશન ટેબલ પરથી RFID ટેગ લેવો પડશે.

– ઇન્ફોર્મેશન વીડિયો: ટેસ્ટના નિયમો સમજાવતો વીડિયો જોવો ફરજિયાત છે. વીડિયો જોયા વિના સીધા ટ્રેક પર જશો તો સિસ્ટમ તમને પકડી લેશે અને આગળ જવા નહીં દે.

– ફેસ કેપ્ચર: ટેસ્ટ શરૂ થતા પહેલા તમારો ફોટો લેવાશે.

– ઓટોમેટિક સિગ્નલ: ગ્રીન સિગ્નલ થાય ત્યારે જ ટેસ્ટ શરૂ કરવાનો રહેશે.

આ પણ વાંચો: ગિરનાર પર વન્યપ્રાણીઓથી યાત્રાળુઓની સુરક્ષા માટે કાયમી ચેકપોસ્ટ બનાવાશે: વનમંત્રી અર્જુન મોઢવાડિયા

ટુ-વ્હીલરના નિયમો – 60 સેકન્ડની કસોટી

સરપેન્ટાઈન ટ્રેક 60 સેકન્ડમાં પૂરો કરવાનો છે. તેમાં 3 કડક શરતો:

1. બતાવેલી દિશામાં જ વાહન ચલાવવું

2. ટ્રેકની બંને બાજુની પીળી લાઈનને અડવાનું નહીં

3. ટેસ્ટ દરમિયાન પગ જમીન પર ન મૂકવો. પગ મૂક્યો એટલે ‘ફૂટફોલ’ અને તમે તરત ફેલ.

ફોર-વ્હીલરના 3 મહત્ત્વપૂર્ણ તબક્કા

– રિવર્સ S – 150 સેકન્ડ: ગાડી આગળ લઈ જઈને રિવર્સમાં S આકારમાં છેડે સુધી લઈ જવાની છે. પીળી લાઈન 2 વાર સુધી હિટ કરી શકો, ત્રીજી વાર ફેલ. ગાડી આગળ કે સીધી કાઢી તો પણ ફેલ.

– ઇંગ્લિશ 8 – 120 સેકન્ડ: દિશા મુજબ 8 આકારમાં ગાડી ચલાવવાની છે. કર્બ 2 વારથી વધુ હિટ થાય તો ફેલ. 3 સેકન્ડથી વધુ ગાડી ઊભી રાખી શકાતી નથી અને રિવર્સ પણ લઈ શકાતી નથી.

– પેરેલલ પાર્કિંગ – 130 સેકન્ડ: આ સૌથી અઘરો તબક્કો. રિવર્સમાં આપેલા બોક્સમાં પેરેલલ પાર્ક કરવાની છે. અહીં એક પણ કર્બ કે પીળી લાઈનને અડવાની છૂટ નથી. સાચી રીતે પાર્ક થાય એટલે ડિસ્પ્લે પર ‘VEHICLE PARKED MOVE AHEAD’ લખાઈ આવશે. પાર્કિંગમાંથી બહાર કાઢતી વખતે પણ લાઈનને અડવી ન જોઈએ.