WhatsApp ટિકિટ-સ્ક્રીનશોટ હવે નહીં ચાલે, RailOne એપ વગર ટિકિટ બતાવતા ભરવો પડશે દંડ
ટ્રેનમાં મુસાફરી કરતા પહેલા ચેતી જજો! ભારતીય રેલવેએ RailOne એપથી બુક થતી અનરિઝર્વ્ડ ટિકિટ માટે કડક નવો નિયમ લાગુ કર્યો છે. હવે WhatsApp પર આવેલી ટિકિટ, તેનો સ્ક્રીનશોટ અથવા મિત્રે ફોરવર્ડ કરેલી ટિકિટ બતાવીને મુસાફરી નહીં થાય. ટિકિટ ચેકિંગ સમયે ફક્ત તે જ રજિસ્ટર્ડ મોબાઇલમાં RailOne એપ ખોલીને બતાવેલી મૂળ ઈ-ટિકિટ જ માન્ય રહેશે. નિયમ ન માનો તો દંડ સાથે બિન-ટિકિટ મુસાફર ગણાશો.
રેલવેનો નવો નિયમ શું કહે છે?
રેલવેએ અનરિઝર્વ્ડ ઈ-ટિકિટ માટે નિયમો સ્પષ્ટ કર્યા છે. જો તમે RailOne એપથી ટિકિટ બુક કરી હોય તો:
1. રજિસ્ટર્ડ મોબાઇલ સાથે રાખો: જે નંબરથી ટિકિટ બુક કરી છે તે જ ફોન મુસાફરી દરમિયાન તમારી પાસે હોવો જોઈએ.
2. એપમાં જ ટિકિટ બતાવો: TTE માંગે ત્યારે RailOne એપ ખોલીને લાઈવ ઈ-ટિકિટ જ બતાવવાની રહેશે.
3. ID પ્રૂફ ફરજિયાત: ટિકિટની સાથે આધાર કાર્ડ, પાન કાર્ડ, ડ્રાઇવિંગ લાઇસન્સ અથવા અન્ય કોઈ માન્ય ફોટો ID પણ બતાવવી પડશે.
આ 3 વસ્તુ હવે માન્ય નથી
ઘણા લોકો સ્ક્રીનશોટ સાચવી રાખે છે અથવા WhatsApp પર ટિકિટ મોકલે છે. પણ હવે આ બધું ચાલશે નહીં:
– WhatsApp પર મળેલી ટિકિટ
– ટિકિટનો સ્ક્રીનશોટ
– અન્ય કોઈના ફોનમાં ફોરવર્ડ કરેલી ટિકિટ
રેલવેનું કહેવું છે કે આ માત્ર માહિતી માટે છે, મુસાફરીના પુરાવા માટે નહીં.
આ નિર્ણય કેમ લેવાયો?
રેલવેનો મુખ્ય ઉદ્દેશ ટિકિટના ગેરઉપયોગને અટકાવવાનો છે. એક ટિકિટનો સ્ક્રીનશોટ લઈને અનેક લોકો મુસાફરી કરી લેતા હતા, જેનાથી રેલવેને નુકસાન થતું હતું. રજિસ્ટર્ડ મોબાઇલની શરતથી આ પ્રકારની છેતરપિંડી બંધ થશે અને સિસ્ટમ વધુ સુરક્ષિત બનશે.
મુસાફરી દરમિયાન આ ભૂલ ન કરશો – 4 ટિપ્સ
1. એક જ ફોન વાપરો: જે ફોન સાથે લઈ જવાના છો તે જ ફોનમાંથી ટિકિટ બુક કરો.
2. બેટરી ચાર્જ રાખો: ચેકિંગ સમયે ફોન બંધ ન થાય તેનું ધ્યાન રાખો.
3. ઘરેથી જ ચેક કરો: સ્ટેશન જતા પહેલા RailOne એપ ખોલીને ટિકિટ દેખાય છે કે નહીં જોઈ લો.
4. ID સાથે રાખો: આધાર, મતદાર કાર્ડ, પાસપોર્ટ અથવા ડ્રાઇવિંગ લાઇસન્સ પાસે રાખો.
નિયમ તોડશો તો શું થશે?
જો ચેકિંગ દરમિયાન તમે રજિસ્ટર્ડ મોબાઇલમાં ટિકિટ ન બતાવી શકો અને માત્ર સ્ક્રીનશોટ કે WhatsApp મેસેજ બતાવો, તો તેને અમાન્ય ગણવામાં આવશે. ત્યારબાદ રેલવેના નિયમો મુજબ તમારી પાસેથી દંડ વસૂલીને આગળની મુસાફરી માટે નવી ટિકિટ લેવાનું કહેવામાં આવશે.
હવે ‘ડિજિટલ ટિકિટ’ એટલે માત્ર ફોટો નહીં. હવે ‘ડિજિટલ’ એટલે ‘લાઈવ એપ’. એટલે ટ્રેનમાં ચડતા પહેલા ફોન, ચાર્જર અને ID ત્રણેય સાથે રાખવાનું ભૂલશો નહીં.
