હવે દરરોજ નહીં, અઠવાડિયે એક જ વખત ઇન્સ્યુલિન ઇન્જેક્શન લેવું પડશે

સમગ્ર વિશ્વમાં પ્રથમ લોન્ચિંગ ભારતમાં: દર્દીઓને મોટી રાહત, વર્ષમાં 365ને બદલે માત્ર 52 ડોઝ

ડાયાબિટીસની સારવારમાં ઐતિહાસિક ગણાય તેવી સિદ્ધિરૂપે ડેનમાર્કની કંપની Novo Nordiskએ ભારતમાં વિશ્વનું પ્રથમ અને એકમાત્ર અઠવાડિયામાં એક વખત અપાતું બેઝલ ઇન્સ્યુલિન ‘Awiqli (ઇન્સ્યુલિન આઇકોડેક)’ લોન્ચ કર્યું છે. આ નવી થેરાપીથી રોજ ઇન્સ્યુલિન લેવાની જરૂરિયાત ઘટીને વર્ષમાં 365 ઇન્જેક્શનના બદલે માત્ર 52 ઇન્જેક્શનની થઈ જશે.જેના કારણે દર્દીઓ પરની શારીરિક તેમજ માનસિક સારવારની મુશ્કેલી નોંધપાત્ર રીતે ઘટશે.

ટાઇપ-1 અને ટાઇપ-2 ડાયાબિટીસના પુખ્ત દર્દીઓ માટે રજૂ કરાયેલું Awiqli વિશ્વનું પ્રથમ વીકલી બેઝલ ઇન્સ્યુલિન છે. અત્યાર સુધી મોટાભાગના દર્દીઓને દરરોજ અથવા દિવસમાં એકથી વધુ વખત ઇન્સ્યુલિન લેવું પડતું હતું, જ્યારે હવે માત્ર અઠવાડિયામાં એક વખત ઇન્જેક્શનથી જ બ્લડ સુગરનું નિયંત્રણ શક્ય બનશે.

કંપનીના જણાવ્યા મુજબ ભારતમાં ઘણા દર્દીઓ દરરોજ ઇન્જેક્શન લેવાના ડર, દુખાવો અને સારવારની જટિલતાને કારણે વર્ષો સુધી ઇન્સ્યુલિન શરૂ કરવામાં વિલંબ કરે છે. નવી થેરાપી આ સૌથી મોટી અડચણ દૂર કરીને દર્દીઓને સમયસર ઇન્સ્યુલિન સારવાર તરફ પ્રોત્સાહિત કરશે.

આ પણ વાંચો: સમગ્ર દેશની સ્કૂલોને ‘એ માલિક તેરે બંદે હમ’ ની પ્રાર્થના આપનાર સંગીતકાર વસંત દેસાઈનો અંત આટલો દર્દનાક કેમ?

આ ઇન્સ્યુલિન FlexTouch પેન દ્વારા અપાશે. ક્લિનિકલ ટ્રાયલમાં તે રોજ અપાતા ઇન્સ્યુલિનની સરખામણીએ બ્લડ સુગર નિયંત્રણમાં વધુ અસરકારક સાબિત થયું છે. સાથે જ સલામતીનું સ્તર પણ લગભગ સમાન રહ્યું છે. વધુ દર્દીઓમાં HbA1cનું પ્રમાણ 7 ટકાથી નીચે લાવવામાં પણ સફળતા મળી હોવાનું કંપનીએ જણાવ્યું છે.

ભારત માટે કેમ મહત્વપૂર્ણ?

ભારતમાં હાલમાં લગભગ 10.1 કરોડ લોકો ડાયાબિટીસથી પીડાય છે, જ્યારે 13.6 કરોડ લોકો પ્રિ-ડાયાબિટીસની સ્થિતિમાં છે. દેશમાં આશરે 9 લાખથી વધુ ટાઇપ-1 ડાયાબિટીસના દર્દીઓ છે અને ટાઇપ-2 ડાયાબિટીસના અંદાજે 10 ટકા દર્દીઓને પણ ઇન્સ્યુલિનની જરૂર પડે છે.લાખો દર્દીઓ રોજ ઇન્સ્યુલિન લેવાના ડર, દુખાવો, ખર્ચ અને નિયમિતતા જાળવવાની મુશ્કેલીને કારણે સારવાર મોડી શરૂ કરે છે અથવા વચ્ચે જ છોડી દે છે. તબીબોના જણાવ્યા પ્રમાણે અઠવાડિયામાં માત્ર એક વખત ઇન્સ્યુલિન લેવાની સુવિધાથી દર્દીઓ સારવાર વધુ નિયમિત રીતે ચાલુ રાખી શકશે અને બ્લડ સુગર પર વધુ અસરકારક નિયંત્રણ મેળવી શકશે. નિષ્ણાતોના મતે આ નવી થેરાપી ખાસ કરીને ભારતીય દર્દીઓમાં ઇન્સ્યુલિન અંગેનો ભય ઘટાડીને સમયસર સારવાર શરૂ કરવામાં મહત્વપૂર્ણ ભૂમિકા ભજવી શકે છે.