રાજ્ય સરકારનો વિદ્યાર્થીઓના શૈક્ષણિક હિતમાં મહત્વનો નિર્ણય

કોલેજ બંધ થઈ જાય તો વિદ્યાર્થીઓનું ભવિષ્ય અંધકારમાં? રાજ્ય સરકારે આ વાતને ખોટી સાબિત કરી દીધી. મહીસાગરની ધનવંતરી આયુર્વેદ કોલેજ નિયમોના ઉલ્લંઘન બદલ બંધ થવાની તૈયારીમાં હતી, પણ સરકારે 188 વિદ્યાર્થીઓના શૈક્ષણિક હિતને પ્રાથમિકતા આપી. હવે આ તમામ વિદ્યાર્થીઓનું વર્ષ બગડશે નહીં – NCISM અને આયુષ મંત્રાલયની ‘સુપરન્યુમરી’ બેઠકો પર તેમને અન્ય સેલ્ફ-ફાઇનાન્સ કોલેજોમાં ટ્રાન્સફર કરી દેવામાં આવશે.

188 વિદ્યાર્થીઓ માટે સરકારની ગેરંટી 

મહીસાગર જિલ્લાના કોયડમ ખાતે આવેલી ધનવંતરી આયુર્વેદ કોલેજ અને હોસ્પિટલ સપ્ટેમ્બર-2025થી સંપૂર્ણ બંધ હાલતમાં છે. વિદ્યાર્થીઓની ફરિયાદો બાદ આરોગ્ય મંત્રી પ્રફુલ પાનશેરીયાના માર્ગદર્શન હેઠળ ત્રણ નિરીક્ષકોની સમિતિની તપાસ કરાવવામાં આવી. સમિતિએ વિદ્યાર્થીઓના હિતમાં તાત્કાલિક ટ્રાન્સફરની ભલામણ કરી હતી.

રાજ્ય સરકારની સક્રિય રજૂઆત બાદ હવે ભારતીય ચિકિત્સા પદ્ધતિ રાષ્ટ્રીય આયોગ NCISM અને ભારત સરકારના આયુષ મંત્રાલયે આ 188 વિદ્યાર્થીઓ માટે અલગ-અલગ સ્વનિર્ભર આયુર્વેદ કોલેજોમાં ‘સુપરન્યુમરી’ એટલે કે અતિરિક્ત બેઠકો મંજૂર કરી છે. આ બેઠકો પર વિદ્યાર્થીઓનો અભ્યાસ અને ઇન્ટર્નશીપ નિયમિત ચાલુ રહેશે.

આ પણ વાંચો: “દર અઠવાડિયે નવી ગર્લફ્રેન્ડ?”: ફરાહ ખાને અક્ષય કુમારના જૂના દિવસો યાદ કરાવ્યા

NEET રેન્કના આધારે ટ્રાન્સફર, ફી પણ એટલી જ 

ગુજરાત આયુર્વેદ યુનિવર્સિટી, જામનગર દ્વારા નિયામક આયુષ અને ACPMECની કમિટી સાથે પરામર્શ કરીને આખી પ્રક્રિયા કરવામાં આવશે. ટ્રાન્સફર માટે સંબંધિત વર્ષનું મેરિટ અથવા ઓલ ઇન્ડિયા NEET રેન્ક જ ધોરણ ગણાશે. ખાસ વાત એ કે વિદ્યાર્થીઓએ નવી કોલેજમાં પણ ધનવંતરી કોલેજની જૂની નિયત ફી જ ભરવાની રહેશે. નવી સંસ્થા પણ એ જ ફી લઈને કોર્સ પૂરો કરાવવા બંધાયેલી રહેશે. દરેક વિદ્યાર્થી અને નવી કોલેજ પાસેથી પરસ્પર સંમતિની બાંહેધરી લેવામાં આવશે.

કોલેજનું જોડાણ રદ, પણ વિદ્યાર્થીઓનું નુકસાન નહીં 

નિયમોના ઉલ્લંઘન બદલ ધનવંતરી કોલેજનું એફિલેશન રદ કરવાની વહીવટી કાર્યવાહી ગુજરાત આયુર્વેદ યુનિવર્સિટી એક્ટ-2021 અને રેગ્યુલેશન્સ-2024 મુજબ શરૂ થશે. કોલેજ બંધ રહેવાને કારણે વિદ્યાર્થીઓની હાજરીમાં ક્ષતિ અને ચોથા વર્ષના વિદ્યાર્થીઓની ઇન્ટર્નશીપનો નિર્ણય પણ યુનિવર્સિટી લેશે, જેથી કોઈનું ભવિષ્ય બગડે નહીં. મંત્રીએ સ્પષ્ટ કહ્યું કે ડિબાર થયેલા કે પ્રવેશ રદ થવા પાત્ર વિદ્યાર્થીઓને આ લાભ મળશે નહીં. મુખ્યમંત્રી ભૂપેન્દ્ર પટેલ સમક્ષ દરખાસ્ત રજૂ કરનાર સરકારે સાબિત કર્યું કે વિદ્યાર્થીઓનું શૈક્ષણિક વર્ષ બચાવવું એ રાજ્યની પ્રાથમિકતા છે.