ઝારખંડ રાજ્યસભામાં NDAની બાજી: ક્રોસ વોટિંગથી પરિમલ નથવાણીનો વિજય

ઝારખંડની રાજ્યસભા ચૂંટણીમાં ક્રોસ વોટિંગે રાજકારણ ગરમાવ્યું છે. NDA સમર્થિત સ્વતંત્ર ઉમેદવાર પરિમલ નથવાણીએ કોંગ્રેસના પ્રણવ ઝાને હરાવીને બીજી બેઠક કબજે કરી લીધી. માત્ર 24 ધારાસભ્યો હોવા છતાં 28 મત મેળવીને નથવાણીનો વિજય INDIA બ્લોક માટે મોટો ફટકો માનવામાં આવી રહ્યો છે. મુખ્યમંત્રી હેમંત સોરેનના JMMના વૈદ્યનાથ રામની જીત તો નિશ્ચિત હતી પણ કોંગ્રેસની હારથી ગઠબંધનની એકતાના સવાલો ઉભા થયા છે. ધારાસભ્યો દ્વારા ‘અંતરાત્માના મત’ની ચર્ચા પણ જોર પકડી રહી છે.

ક્રોસ વોટિંગથી પલટ્યો પાસો 

ગુરુવારે યોજાયેલી ઝારખંડની બે રાજ્યસભા બેઠકોની ચૂંટણીમાં સીધો મુકાબલો પરિમલ નથવાણી અને કોંગ્રેસના પ્રણવ ઝા વચ્ચે હતો. પરિણામમાં નથવાણીને 28 મત મળ્યા અને તેઓ વિજેતા બન્યા જ્યારે પ્રણવ ઝાને 20 મત મળ્યા. બીજી બેઠક પર JMMના વૈદ્યનાથ રામને 30 મત સાથે જીત મળી. તેમની જીત પહેલેથી નિશ્ચિત માનવામાં આવતી હતી.

આ પણ વાંચો: ભારતે હૉકીમાં વિશ્વ ચેમ્પિયન જર્મનીને હરાવ્યું

NDA માટે ગણિત વિનાનો વિજય 

ભાજપની આગેવાનીવાળા NDA પાસે ઝારખંડ વિધાનસભામાં માત્ર 24 ધારાસભ્યો છે જ્યારે રાજ્યસભા બેઠક જીતવા માટે ઓછામાં ઓછા 28 મત જરૂરી હતા. આમ છતાં નથવાણીને 28 મત મળતા સ્પષ્ટ થાય છે કે INDIA બ્લોકના JMM-કોંગ્રેસના કેટલાક ધારાસભ્યોએ ક્રોસ વોટિંગ કર્યું. આ જ ક્રોસ વોટિંગને નથવાણીની જીતનું કારણ માનવામાં આવી રહ્યું છે.

JMM-કોંગ્રેસ ગઠબંધનને ઝટકો 

JMM અને કોંગ્રેસ મળીને બનેલા શાસક ગઠબંધન પાસે કુલ 56 ધારાસભ્યો છે. આ સંખ્યાબળ સાથે બંને બેઠકો જીતવી તેમના માટે સરળ હતી. પણ પરિણામમાં એક બેઠક NDAના ખાતામાં જતા હેમંત સોરેન અને કોંગ્રેસ માટે આ શરમજનક હાર ગણાઈ રહી છે. ચૂંટણીમાં કુલ 3 મત રદ થયા જેમાં 1 કોંગ્રેસ અને 2 ભાજપના ધારાસભ્યોના મત હતા.

ભાજપનું નિવેદન: ‘અંતરાત્માનો અવાજ’ 

ભાજપના ધારાસભ્ય પ્રદીપ પ્રસાદે પરિણામ બાદ કહ્યું કે “NDAને 28 મત JMMને 30 અને કોંગ્રેસને 20 મત મળ્યા. પરિમલ નથવાણીને 28 મત મળ્યા. ધારાસભ્યોએ તેમના અંતરાત્માની વાત સાંભળી અને આ થવાનું જ હતું.” આ નિવેદનથી સ્પષ્ટ થાય છે કે ભાજપ આ જીતને નૈતિક જીત તરીકે રજૂ કરી રહ્યું છે.

આ ચૂંટણી પરિણામે ઝારખંડમાં INDIA બ્લોકની એકતા પર સવાલ ઉઠાવ્યા છે અને 2024ની રાજકીય સમીકરણોને નવું વળાંક આપ્યો છે.