ઇરાનના ખર્ગ આઇલેન્ડથી પોરબંદર જેટી પર વધુ ૬ હજાર મેટ્રિક ટન LPG ભરેલું ટેન્કર આવ્યું

ખાડી દેશોમાં યુદ્ધની સ્થિતિ વચ્ચે પોરબંદરમાં કુલ ૩ ટેન્કરમાં ૧૫ હજાર મેટ્રિક ટન ગેસની આવક થઇ, ૪૦ દિવસમાં ૧૪ લાખથી વધુ સિલિન્ડર ભરી શકાય તેટલો ગેસ ફાળવાયો

ખાડી દેશોમાં ચાલી રહેલી ગંભીર યુદ્ધની સ્થિતિ અને વૈશ્વિક તંગદિલી વચ્ચે પણ પોરબંદરના દરિયાઈ માર્ગે ગેસની આયાત યથાવત રહેતા મોટી રાહત જોવા મળી છે, જેમાં તાજેતરમાં જ ઈરાનના ખર્ગ આઈલેન્ડથી ઓમાન માર્ગે થઈને પોરબંદરની જેટી પર વધુ એક મોટું એલપીજી ગેસ ભરેલું ટેન્કર આવી પહોંચ્યું છે. આ ખાસ ટેન્કરમાં ૬ હજાર મેટ્રિક ટન જેટલો વિશાળ એલપીજી ગેસનો જથ્થો લાવવામાં આવ્યો છે અને આ સાથે જ પોરબંદરમાં કુલ ૩ ટેન્કરો મારફતે અત્યાર સુધીમાં ૧૫ હજાર મેટ્રિક ટન જેટલો એલપીજી ગેસ સફળતાપૂર્વક પહોંચી ચૂક્યો છે. પોરબંદરની જેટી પર સલામત રીતે લાંગરેલા આ ટેન્કરમાંથી ગેસના જથ્થાને પોરબંદરના જાવર વિસ્તારમાં આવેલા ગેઝ એલ.પી.જી. ટર્મિનલ ખાતે ખાલી કરવાની અને ત્યાં સુરક્ષિત રીતે ઠલવવાની કામગીરી પૂર્ણ કરવામાં આવી છે.

આ પણ વાંચો: આપણી SIPની આદત બેંકોની તિજોરી કેમ ખાલી કરી રહી છે?

ઉલ્લેખનીય છે કે, ખાડી દેશોમાં જ્યારે યુદ્ધનો પ્રારંભ થયો ત્યારે સમગ્ર વિશ્વમાં સમુદ્રી માર્ગો મારફતે થતા આયાત અને નિકાસના વેપાર પર ખૂબ જ માઠી અને વ્યાપક અસરો પડી હતી તથા ઈરાન દ્વારા યુદ્ધ દરમિયાન તેમના સમુદ્રી માર્ગ પરથી પસાર થતા તમામ દેશોના ટેન્કરો અને કાર્ગો શિપ પર સખત પ્રતિબંધો પણ લાદી દેવામાં આવ્યા હતા, જેને લઈને ભારત સહિત સમગ્ર વિશ્વના અસંખ્ય દેશોમાં ક્રૂડ ઓઈલ અને રાંધણ ગેસ જેવી જીવન જરૂરી ચીજવસ્તુઓની ભારે અછત ઊભી થવા પામી હતી. ભારતમાં પણ આવી જ રીતે ગેસના ટેન્કરોની આવક યુદ્ધને લીધે અચાનક બંધ થઈ જતાં રાષ્ટ્રીય સ્તરે ગેસની તીવ્ર અછત વર્તાઈ રહી હતી, જેને પરિણામે કેટલીક અગ્રણી ગેસ કંપનીઓ દ્વારા ગેસના ઘરેલુ અને કોમર્શિયલ સિલિન્ડરમાં ભાવ વધારો પણ ઝીંકી દેવામાં આવ્યો હતો.

બીજી તરફ, આ ઔદ્યોગિક વિસ્તારના ભૂતકાળના ઈતિહાસ પર નજર કરીએ તો, વર્તમાન યુદ્ધની સ્થિતિ પૂર્વે પોરબંદરના જાવર ખાતે વર્ષોથી કાર્યરત સુપર ગેસના વિશાળ સ્ટોરેજ ટર્મિનલ ખાતે નિયમિત ધોરણે એલ.પી.જી. ગેસ શિપ ટેન્કર મારફતે બહારથી આવતો હતો. ઈરાન, અમેરિકા અને ઈઝરાયેલ વચ્ચે યુદ્ધ ફાટી નીકળ્યું તે પહેલાં આ સુપર ગેસ ટર્મિનલ ખાતે અગાઉ અંદાજે ૪૯૮ જેટલા એલપીજી ટેન્કરો આવ્યા હોવાની નોંધ છે, જોકે બદલાયેલી વૈશ્વિક પરિસ્થિતિઓમાં હવે તે ચોક્કસ કંપની પાસે નાના કદના શિપ ટેન્કરો ઉપલબ્ધ ન હોવાને કારણે હાલ પૂરતું આ ટર્મિનલ બંધ કરાયું હોવાનું પણ જાણવા મળ્યું છે, પરંતુ વર્તમાન સંજોગોમાં નવા  જથ્થાની આ સફળ આવકથી સ્થાનિક સ્તરે ઊભી થનારી કટોકટી અને અછત સંપૂર્ણપણે ટળી ગઈ છે.