આવતીકાલે બજેટ : EMI ઘટશે કે વધશે? હોમ લોન અને ટેક્સ કપાત અંગે સસ્પેન્સ,છેલ્લા 10 વર્ષમાં ઘરની કિંમત થઇ બમણી

નાણામંત્રી નિર્મલા સીતારામન તા. 1ને રવિવારે સંસદમાં કેન્દ્રીય બજેટ રજૂ કરશે. આ બજેટ તૈયાર થઇ ગયું છે અને તેનું પ્રિન્ટીંગ પણ થઇ ગયુ છે. હાલમાં હાઈ સિક્યોરિટી ઝોન હેઠળ રાખવામાં આવ્યું છે અને આ બજેટની પુસ્તિકા રવિવારે ગૃહ શરુ થાય ત્યારે સાસદોને આપવામાં આવશે. દરમિયાન આ બજેટમાં પણ દર વખતની જેમ આ વખતે પણ ઘણું સસ્પેન્સ જોવા મળી રહ્યું છે. ખાસ કરીને હોમ લોન ધારકો અને મધ્યમ વર્ગના હૃદયના ધબકારા વધી રહ્યા છે.

નાણામંત્રી નિર્મલા સીતારામન તેમનું નવમું બજેટ રજૂ કરવા જઈ રહ્યા છે, અને આ વખતે, સૌથી મોટું સસ્પેન્સ હોમ લોન અને ટેક્સ કપાત અંગે છે. ભારતીય રિયલ એસ્ટેટ માર્કેટમાં વધતા ઘરના ભાવ અને વ્યાજ દર વચ્ચે, સામાન્ય માણસ જોઈ રહ્યો છે કે શું સરકાર EMI ના બોજને હળવો કરવા માટે આ બજેટમાં માસ્ટરસ્ટ્રોક રમશે.

હાલમાં, આવકવેરા કાયદાની કલમ 24(બી) હેઠળ હોમ લોનના વ્યાજ પર મહત્તમ 2 લાખ રૂપિયાની કપાત છે. 2014-15થી આ મર્યાદામાં કોઈ ફેરફાર કરવામાં આવ્યો નથી. મિલકત નિષ્ણાતો અને ક્રેડાઈ જેવી સંસ્થાઓ કહે છે કે છેલ્લા 10 વર્ષમાં ઘરની કિંમતો બમણી થઈ ગઈ છે, તેથી આ મર્યાદા વધારીને ઓછામાં ઓછી 4 લાખ રૂપિયાથી 5 લાખ રૂપિયા કરવી જોઈએ.

આ પણ વાંચો :સોના-ચાંદીના ભાવમાં ભૂકંપ: ચાંદીમાં રૂ.1 લાખથી વધુનો કડાકો, સોનું 33 હજાર જેટલું સસ્તું, રોકાણકારોને આંચકો,જાણો શું છે કારણ

બજેટ સીધા બેંક વ્યાજ દર નક્કી કરતું નથી પરંતુ બજેટ નીતિઓ તમારા અસરકારક EMI નક્કી કરે છે.જો સરકાર પોષણક્ષમ આવાસ (હાલમાં 45 લાખ રૂપિયા) ની વ્યાખ્યા બદલીને 65-75 લાખ રૂપિયા કરે છે, તો વધુ લોકો સબસિડી અને પોષણક્ષમ લોન મેળવી શકશે.

એક વર્ગ એવું પણ કહે છે કે, જો કર કપાત મર્યાદા વધારવામાં આવે , તો કર બચત વધશે, જેનાથી ખિસ્સા પર ચોખ્ખો EMI બોજ ઘટશે.કલમ 80સી હોમ લોનની મુદ્દલ રકમ પર ₹1.5 લાખની કપાતની જોગવાઈ કરે છે. સમસ્યા એ છે કે આ ₹1.5લાખમાં PPF, LIC અને બાળકોની ફી પણ શામેલ છે. ઘર ખરીદનારાઓને નોંધપાત્ર રાહત આપવા માટે હોમ લોન મુદ્દલ રકમ માટે એક અલગ વિભાગ બનાવવાની માંગ છે.

હાલમાં, નવી કર વ્યવસ્થા હેઠળ હોમ લોનના વ્યાજ પર કોઈ કપાત નથી. મધ્યમ વર્ગની સૌથી મોટી આશા એ છે કે સરકાર નવી કર વ્યવસ્થા હેઠળ પણ હોમ લોન અને વીમા પર કપાત આપવાનું શરૂ કરશે.