અમેરિકામાં વિઝાના નિયમ કડક બન્યા : ભારતીય વિદ્યાર્થીઓ માટે મુસીબત વધી ; 4700 ના વિઝા રદ કરી દેવાયા
અમેરિકન પ્રમુખ ટ્રમ્પે ભારત પર ભારે ટેરિફ લાદ્યા બાદ હવે વિધાર્થીઓ માટે કડક નિયમો લાગુ કરવાનું શરૂ કર્યું છે. આના કારણે ત્યાં અભ્યાસ કરતા વિદ્યાર્થીઓને મુશ્કેલીનો સામનો કરવો પડી રહ્યો છે. ટ્રમ્પના કડક વીઝા નિયમોને લીધે અમેરિકામાં અભ્યાસ કરતા ભારતીય વિદ્યાર્થીઓ માટે મુશ્કેલીઓ વધી છે. સરકારી તપાસના ડરથી ઘણા વિદ્યાર્થીઓએ પોતાની પાર્ટ-ટાઈમ નોકરીઓ ગુમાવી છે, જેના કારણે તેમને રોજિંદા ખર્ચ અને ભાડું ચૂકવવામાં તકલીફ પડી રહી છે. આ પરિસ્થિતિએ તેમનું જીવનનિર્વાહ મુશ્કેલ બનાવી દીધું છે. અત્યાર સુધીમાં 4700થી વધુ વિઝા રદ કરી દેવાયા છે.
કડક વીઝા નિયમોને કારણે, અમેરિકન નોકરીદાતાઓ હવે ભારતીય વિદ્યાર્થીઓને પાર્ટ-ટાઈમ નોકરીઓ આપતા નથી, અથવા જો આપે છે તો કામના કલાકો ખૂબ જ ઓછા હોય છે, જેનાથી તેમની આવક ઘટી ગઈ છે.
આ પરિસ્થિતિમાં વિદ્યાર્થીઓએ કાં તો પોતાના ખર્ચાઓમાં ભારે ઘટાડો કરવો પડ્યો છે અથવા તો પરિવાર પાસેથી આર્થિક મદદ લેવી પડી છે. સામાન્ય રીતે, અમેરિકામાં અભ્યાસ કરતા ભારતીય વિદ્યાર્થીઓ પાર્ટ-ટાઈમ નોકરી કરીને પોતાના ખર્ચાઓ પૂરા કરતા હતા, પરંતુ ટ્રમ્પના વહીવટીતંત્રે તેમના માટે આ મુશ્કેલ બનાવી દીધું છે.
નવા સરકારી આંકડાઓ મુજબ, પૂરતી હાજરી ન હોવા અને ગેરકાયદેસર નોકરી કરવાને કારણે તાજેતરમાં 4700 થી વધુ વિદ્યાર્થીઓના વિઝા રદ કરવામાં આવ્યા છે. લોસ એન્જલસના એક 25 વર્ષીય વિદ્યાર્થીએ પોતાની વ્યથા વ્યક્ત કરતાં જણાવ્યું કે, સરકારી તપાસને કારણે તેની પાર્ટ-ટાઇમ રેસ્ટોરન્ટની નોકરી છૂટી ગઈ, જેના કારણે તેની આર્થિક મુશ્કેલીઓ વધી ગઈ છે. અગાઉ, તે અભ્યાસની સાથે દિવસના આઠ કલાક કામ કરી પોતાનો ખર્ચ સરળતાથી કાઢી લેતો હતો.
