વર્ષા v/s ભદ્રેશ :  લંડનમાં  ગુજરાતી કપલના  23 વર્ષે છૂટાછેડા, પત્નીને મળશે ૮૫ કરોડ

પતિની કમાણીમાં પતિનો હક્ક હોવાની દલીલ લંડનની સુપ્રિમ કોર્ટે સ્વીકારી

પતિએ ગુનાહિત પ્રવૃત્તિથી કમાયેલી આવક છુપાવી હતી

બ્રિટનમાં હાલમાં એક ગુજરાતી કપલના છૂટાછેડાના સમાચાર ભારે ચર્ચામાં છે. આમ તો વેસ્ટર્ન દેશોમાં છૂટાછેડા સાવ સરળતાથી મળી જતા હોય છે પરંતુ નોર્થ લંડનમાં રહેતા વર્ષા ગોહિલ અને તેમના એક્સ પતિ ભદ્રેશ ગોહિલનો ડિવોર્સ કેસ પૂરા 23 વર્ષ સુધી ચાલ્યો હતો.ભારતીય મૂળનાં 61 વર્ષીય વર્ષા ગોહિલે બ્રિટિશ હાઈકોર્ટમાં લાંબી કાનૂની લડાઈ લડીને તેમના પૂર્વ પતિ ભદ્રેશ ગોહિલ સામે ઐતિહાસિક જીત મેળવી છે. કોર્ટે આદેશ આપ્યો છે કે છેતરપિંડી કરનાર પૂર્વ પતિએ વર્ષા ગોહિલને 6.6 મિલિયન પાઉન્ડ એટલે કે અંદાજે 85 કરોડ રૂપિયાનું વળતર ચૂકવવું પડશે. આ સમગ્ર મામલો વર્ષા ગોહિલ ડિવોર્સ કેસ તરીકે બ્રિટનના કાનૂની ઇતિહાસમાં સૌથી મોટી જીતમાંથી એક માનવામાં આવે છે. યુકે જેવા દેશમાં માંડ એકાદ-બે વર્ષમાં જ ડિવોર્સના કેસ પૂરા થઈ જતા હોય છે જ્યારે ભદ્રેશ અને વર્ષા 23 વર્ષ સુધી કોર્ટમાં કાયદાકીય લડાઈ લડ્યા હતા.

વર્ષા અને ભદ્રેશ ગોહિલનો ડિવોર્સ કેસ આખા 23 વર્ષ સુધી ચાલ્યો. શરૂઆતમાં માત્ર £2.7 લાખમાં સમાધાન કરનાર વર્ષાને બાદમાં ખબર પડી કે તેમના પતિએ કરોડો પાઉન્ડની મિલકતો છુપાવી હતી. લાંબી કાનૂની લડાઈ, મની લોન્ડરિંગ કેસ અને સુપ્રીમ કોર્ટ સુધી પહોંચેલા વિવાદ બાદ કોર્ટે વર્ષાના પક્ષમાં ચુકાદો આપતાં તેમને £6.6 મિલિયન ચૂકવવાનો આદેશ કર્યો હતો.

 ત્રણ સંતાનોનાં માતા વર્ષા ગોહિલે 2002માં જ ભદ્રેશથી અલગ થવા માટે કેસ ફાઈલ કર્યો હતો.તેમનો દાવો હતો કે ભદ્રેશ લફડાબાજ માણસ છે તેમજ તેનું વર્તન પણ વિચિત્ર છે. ડિવોર્સ કેસ ફાઈલ થયો ત્યારબાદ વર્ષા ગોહિલે 37 વર્ષની ઉંમરે 2.70 લાખ પાઉન્ડમાં સમાધાન પણ કરી લીધું હતું. જોકે, કેસ પૂરો થયા બાદ તેમને ખબર પડી હતી કે સેટલમેન્ટ માટે ઓછી રકમ ચૂકવવી પડે તેના માટે પતિ ભદ્રેશે પોતાની ઘણી મિલકતોની માહિતી છૂપાવી હતી.

આ પણ વાંચો: “ભારત કેમ ” વિશ્વગુરુ ” નથી બની શક્યું?”,RSS વડા મોહન ભાગવતે કારણ જણાવ્યા

યુકેના કાયદા અનુસાર ડિવોર્સના કેસમાં પતિ-પત્ની બંનેએ પોતાની પાસે રહેલી તમામ મિલકતની માહિતી કોર્ટને આપવી પડે છે. ખાસ તો ફાઈનાન્શિયલ સેટલમેન્ટની રકમ નક્કી થાય ત્યારે તમામ પ્રકારની આવક અને અસેટ્સની વિગતો રજૂ કરવી પડે છે. 2007માં વર્ષા ગોહિલે ફરી કોર્ટના દરવાજા ખટખટાવ્યા હતા. તેમની દલીલ હતી કે ભદ્રશે પોતાની મિલકતો વિશે છૂપાવી રાખેલી માહિતી પોતાના હાથમાં આવી ગઈ છે અને તેના આધારે સેટલમેન્ટની નવી રકમ નક્કી કરવા માટે કેસને ફરી ખોલવામા આવે.

જોકે, 2011માં આ કેસમાં એક નાટકિય વળાંક આવ્યો હતો. તે વર્ષમાં ભદ્રેશને મની લોન્ડરિંગ અને ફોર્જરીના ગુનામાં કસૂરવાર ઠેરવીને દસ વર્ષની જેલની સજા ફટકારવામાં આવી હતી, તે પોતે પણ વ્યવસાયે વકીલ હતો અને તેની સામેની તપાસમાં એવું જાણવા મળ્યું હતું કે ભદ્રેશ ગોહિલ પાસે 28 મિલિયન ડોલરની અસેટ્સ હતી જે આખીય દુનિયાના અલગ-અલગ દેશોમાં ફેલાયેલી હતી. ક્રાઉન પ્રોસિક્યુશને ભદ્રેશની લાખો પાઉન્ડની મિલકતો ફ્રીઝ કરી લીધી હતી, ભદ્રેશની આ બેનંબરી મિલકતો પર તેની પત્નીનો પણ હક્ક ગણાય કે નહીં તે બાબતે પણ કોર્ટમાં કેસ ચાલ્યો હતો.

આખરે આ મામલો યુકે સુપ્રીમ કોર્ટમાં પહોંચ્યો હતો અને તેના જજે અગાઉ થયેલા ફાઈનાન્શિયલ સેટલમેન્ટનો કેસ રિઓપન કરવાની સાથે નવો દાવો રજૂ કરવાની પણ તક આપી હતી.

વર્ષાના પક્ષે એવી દલીલ કરવામાં આવી હતી કે ભદ્રેશે આ તમામ મિલકતો તેમના લગ્નજીવન દરમિયાન ભેગી કરી હોવાથી તેના પર પોતાનો બરાબરનો હક્ક છે. તો બીજી તરફ, ધી ક્રાઉન પ્રોસિક્યુશન સર્વિસે ત્રીજો મોરચો ખોલતા કોર્ટમાં એવી રજૂઆત કરી હતી કે ભદ્રેશની બેનંબરી મિલકતો ક્રિમિનલ એક્ટિવિટી દ્વારા એકત્ર કરવામાં આવી છે, આ મિલકતોનો ઉપયોગ ક્રિમિનલ રિકવરી પ્રોસિડિંગ્સ માટે થવો જોઈએ અને ફેમિલી કોર્ટના માધ્યમથી તેની કોઈ પણ પ્રકારે વહેંચણી ના કરી શકાય.

ત્રણેય પક્ષોની દલીલો સાંભળ્યા બાદ સુપ્રીમ કોર્ટના જસ્ટિસ વિલિયમ્સે એવો ચુકાદો આપ્યો હતો કે ભદ્રેશે તમામ 28 મિલિયન પાઉન્ડની મિલકત ક્રિમિનલ એક્ટિવિટી દ્વારા એકત્ર કરી છે તે સાબિત કરવામાં પ્રોસિક્યુશન નિષ્ફળ રહ્યું છે. કોર્ટે વર્ષાને 6.6 મિલિયન પાઉન્ડની ચૂકવણી કરવા માટે આદેશ કરતા તેના પતિને તદ્દન અપ્રામાણિક માણસ ગણાવ્યો હતો.

જસ્ટિસ વિલિયમ્સે પોતાના ચુકાદામાં એમ પણ જણાવ્યું હતું કે ભદ્રેશે પોતે ખૂબ જ મહેનતુ ફેમિલી મેન હોવાનું જણાવી પોતાની સાથે અયોગ્ય વ્યવહાર થયો હોવાના દાવા કર્યા છે પરંતુ તેની આ રજૂઆતો સત્યથી તદ્દન વેગળી છે. સુપ્રીમ કોર્ટના આ નિર્ણયની સાથે જ બ્રિટનમાં સૌથી લાંબા ચાલેલા ડિવોર્સ કેસનો પણ અંત આવ્યો છે.