‘બદસૂરત’ રાજકોટ સિવિલ હોસ્પિટલ : મુખ્ય ગેઈટ સોનાની લગડી જેવો, અંદર બધું ભંગાર જ ભંગાર! જુઓ તસવીરો
સૌરાષ્ટ્રની સૌથી મોટી સરકારી હોસ્પિટલ સિવિલમાં જરૂરિયાતમંદ દર્દીઓ સાજા થવાની અપેક્ષાએ જતાં હોય છે પરંતુ અફસોસ એ વાતનો કરવો પડે કે અહીં બીમાર દર્દીઓ પગ મૂકે એટલે તેમની ઉપાધિ શરૂ થયા વગર રહેતી નથી. આ તસવીરો રાજકોટ સિવિલ હોસ્પિટલની `બદસૂરતી’ની રીતસરની ગવાહી પૂરી રહી છે.
સિવિલ હોસ્પિટલના તંત્રવાહકોએ તાજેતરમાં જ મુખ્ય પ્રવેશદ્વાર ખુલ્લો મુક્યો હતો જે એકદમ અફલાતૂન છે. હજુ આ ગેઈટ નવો છે એટલે અત્યારે સારો લાગી રહ્યો છે પરંતુ જેમ જેમ દિવસો પસાર થતાં જશે તેમ તેમ તેની દશા કેવી થાય છે તે જોવું રહ્યું. જો કે મુખ્ય ગેઈટથી જેવા અંદર પ્રવેશો એટલે ઠેકઠેકાણે દર્દીઓ અને તેમના પરિવારજનોને ભંગાર જ ભંગાર જોવા મળશે.
આ પણ વાંચો : વેપારી પર હુમલો કરનાર બે શખસો ન પકડાતાં સરધાર રોષપૂર્ણ બંધ : આખો દિવસ તમામ દુકાનોના શટર ન ખુલ્યા
પોસ્ટમોર્ટમ રૂમ પાસે જાવ એટલે ત્યાં તૂટી ગયેલો સામાન જોવા મળી રહ્યો છે તો એટલા પણ તૂટી ગયા છે. અહીં કચરાપેટીની દિશા અને દશા બન્ને બદલાઈ ગયા છે.
આ પછી ટ્રોમા સેન્ટર સામે નજર કરો એટલે ત્યાં બાંકડો છે પરંતુ તેના ઉપર બેસવાની હિંમત કોઈ કરી ન શકે તેવી સ્થિતિ છે.
આવું જ કંઈક પોલીસ ચોકીની સામે જોવા મળી રહ્યું છે જ્યાં રસ્તો છે પરંતુ ત્યાં રસ્તો ઓછો અને થીગડા વધુ દેખાઈ રહ્યા છે.
ઓપીડી બિલ્ડિંગ પાસે ફાયર સેફ્ટીના સાધન તો છે પરંતુ તે ચાલું છે કે બંધ તે જોવાની તસ્દી કોઈ લેતું ન હોય અત્યારે તો તેને ભંગાર જ ગણવો પડે !
વળી, દર્દીના દાંતના એક્સ-રે જ્યાં થાય છે ત્યાં અત્યારે શ્વાન આરામ ફરમાવી રહ્યો છે.
આટલું ઓછું હોય તેમ કોવિડ બિલ્ડિંગના સેલરમાં દવાના બોક્સ વેરવિખેર પડ્યા છે તો બિલ્ડિંગ પાસે જ બાંકડો ઉંધો પડ્યો છે છતાં તેને કોઈ દૂર કરી રહ્યું નથી.
કોવિડ બિલ્ડિંગના સેન્ટરમાં ભંગાર હાલતમાં સામાન પડ્યો છે તો એમ્બ્યુલન્સ પણ ધૂળ ખાઈ રહેલી જોવા મળી રહી છે.
