પેંડાગેંગ આખી પકડાઈ ગઈ, મરઘાગેંગનો મુખ્ય સૂત્રધાર સમીર ઉર્ફે સંજલો શોધ્યો જડતો નથી! રાજકોટ પોલીસનો ટૂંકો પડી રહેલો પન્નો
રાજકોટમાં ઘણા લાંબા સમય બાદ ગેંગવોરે માથું ઉંચકી ક્યારેય કલ્પના ન કરી હોય તે પ્રકારે સામસામું ફાયરિંગ કરી શહેર આખાને ભયના ઓથાર હેઠળ લાવી દીધું હતું. આ ચોંકાવનારી ઘટના બનતાં જ પોલીસે બન્ને ગેંગના એક બાદ એક ટપોરીઓને પકડી પાડ્યા હતા. આ ફાયરિંગ પેંડાગેંગ અને મરઘાગેંગ વચ્ચે થયું હતું જે પૈકી પેંડા ગેંગના 17 ટપોરી સામે પોલીસે ગુજસીટોકનું હથિયાર ઉગામી ગુનો દાખલ કર્યો છે જે અંતર્ગત 15 આરોપી હાલ રિમાન્ડ છે. જ્યારે ફરાર રહેલા બે શખસોને પણ દબોચી લઈ રિમાન્ડ પર લેવામાં આવ્યા છે. આશ્ચર્યજનક રીતે મરઘાગેંગનો `લીડર’ સમીર ઉર્ફે સંજલો જાવિદ જુણેજા પોલીસને શોધ્યો જડી રહ્યો નથી.
અગાઉ પેંડા ગેંગના 17માંથી 15 લોકોને દબોચીને રિમાન્ડ પર લેવાયા છે જ્યારે બાકી રહેલા મીલન નરભેરામ ગોંડલિયા (ઉ.વ.32, રહે.માધાપર ચોકડક્ષ પાસે મહાકાલેશ્વર મંદિર) તેમજ અમનદીપસિંહ ક્રિપાલસિંહ ઝાલા (ઉ.વ.24, રહે.પુનિતનગર)ને પકડી લઈ ક્રાઈમ બ્રાન્ચે રિમાન્ડ પર લીધા હતા. આ બન્ને પેંડાગેંગના સાગરિતોને આશરો આપવા તેમજ ગુનો આચર્યા બાદ મદદગારી કરી રહ્યા હતા. હવે પેંડાગેંગના તમામ 17 આરોપી કે જેમના સામે ગુજસીટોક હેઠળ ગુનો દાખલ થયો છે તે તમામ પકડાઈ ચૂક્યા છે. રિમાન્ડ દરમિયાન એવી વિગત પણ બહાર આવી હતી કે પેંડાગેંગે સોશ્યલ મીડિયા ઉપર સ્ટોરી અપલોડ કરી હરિફ ગેંગ તેમજ લોકો સામે સીન જમાવવા માટે મોંઘાદાટ વાહન જેમાં કાર-બાઈક સહિત સમાવિષ્ટ છે તે વસાવ્યા અને પડાવ્યા છે ત્યારે ટૂંક સમયમાં પોલીસ આ વાહન પણ કબજે લેશે.
બીજી બાજુ મરઘાગેંગનો શૂટર સમીર ઉર્ફે મરઘો સહિત આઠ ટપોરીને પોલીસે પકડી લીધા છે પરંતુ ગુનો બન્યાને આજે 19 દિવસ વીતી જવા છતાં મુખ્ય સૂત્રધાર સમીર ઉર્ફે સંજલો જાવિદભાઈ જુણેજા પોલીસ પકડથી દૂર રહેવા પામ્યો છે. ક્રાઈમ બ્રાન્ચ, એસઓજી, એલસીબી સહિતની તમામ બ્રાન્ચ તેને શોધી રહી છે આમ છતાં તે પકડમાં આવી રહ્યો ન હોય પોલીસની શાખ દાવ ઉપર લાગી જવા પામી છે.
