રીબડા અમિત ખૂંટ આપઘાત કેસ : અમિતને ફસાવવા યુવતીને જૂનાગઢના રહીમે સોંપ્યો’તો હવાલો
રીબડાના વતની અમિત દામજીભાઈ ખૂંટે સગીર યુવતીની મોહજાળમાં ફસાઈ સમગ્ર રેકેટમાં આવીને આપઘાત કરી લીધાના ચકચારી બનાવમાં યુવતીને અમિતનો હવાલો જૂનાગઢના શખસ દ્વારા સોંપાયો હોવાનો પોલીસ તપાસમાં ઘટસ્ફોટ થયો છે. જૂનાગઢનો રહીમ હજુ તો પોલીસની પકડ બહાર છે.હાથમાં આવ્યા બાદ રહીમનો રાહબર કોણ ? તે ખૂલશે કે પાઘડીનો વળ છેડા સુધી પહોંચશે. હાલ અમિતના આપઘાતના
આરોપમાં યુવતી તથા બન્ને વકીલ જેલ હવાલે થયા છે. રાજકોટ રહેતા અમિતને સોશિયલ મીડિયામાં કોન્ટેક્ટ કરી સગીર મોડેલે સખીના કહેવાથી જાળમાં લીધો હતો અને દૂષ્કર્મની ફરિયાદ નોંધાતા અમિમતે રીબડા ગામે વાડીએ ફાંસો ખાઈ આપઘાત કરી લીધાના આરોપસરના બનાવમાં ગોંડલ પોલીસે સગીરા, તેની સખી પૂજા ગોરને પકડી પાડી હતી. જે તે સમયે ફરિયાદમાં જ રીબડાના અનિરૂધ્ધસિંહ અને તેમના પુત્ર રાજદીપસિંહ સામે પણ અમિતને આપઘાત કરવા મજબૂર કર્યાનો આરોપ મુકાયો હતો. જો કે પિતા-પુત્ર સુધી હજુ પોલીસ પહોંચી શકી નથી.
તપાસ દરમિયાન પોલીસે આરોપી યુવતી પૂજાના કથનના આધારે ગોંડલના એડવોકેટ કોંગ્રેસ કાર્યકર્તા દિનેશ પાલાભાઈ પાતર તથા રાજકોટના એડવોકેટ સંજય હેમતભાઈ પંડિતની ધરપકડ કરી હતી. બન્ને એડવોકેટના રિમાન્ડ નામંજૂર થતાં જેલ હવાલે કરાયા હતા.
આરોપી યુવતીએ જ જે તે સમયે પોલીસને જૂનાગઢના રહીમ નામના ઈસમ દ્વારા નાણાંની, નોકરીની લાલસા આપી અમિતને ફસાવવાનો હવાલો અપાયો હતો. યુવતીની કેફિયત આધારે રાજકોટ રૂરલ પોલીસ દ્વારા રહીમને શોધવા જૂનાગઢ તેમજ અન્ય ઠેકાણાએ છાપા માર્યા હતા. રહીમ હાથ લાગ્યો ન હતો.
રહીમ હાથમાં આવ્યા બાદ અમિત ઉપર ટ્રેપ કોણે ગોઠવી તે સ્પષ્ટ થઈ શકે ? અમિત સાથે રહીમને જ કોઈ અદાવત હતી કે રહીમને પણ કોઈ દ્વારા કામ સોંપાયું હતું ? તે બધું સ્પષ્ટ થઈ શકશે તેવું પોલીસના વર્તુળોમાંથી જાણવા મળે છે.
