મેઘરાજાનો દક્ષિણના જિલ્લાઓમાં મુકામ યથાવત : તાપીના ડોલવણમાં પાંચ ઈંચ વરસાદ
સૌરાષ્ટ્ર અને ઉત્તર ગુજરાતમાં મેઘવિરામ બાદ રાજ્યના દક્ષિણના જિલ્લાઓમાં મેઘરાજાએ શનિવારે પણ મેઘકૃપા વરસાવી હતી, શનિવારે સૌથી વધુ વરસાદ તાપી જિલ્લાના દોલવણમાં પાંચ ઈંચ જયારે ડાંગના વઘઈમાં 3 ઈંચ વરસાદ વરસ્યો હતો સાથે જ સાંજ સુધીમાં કુલ 44 તાલુકાઓમાં વરસાદ વરસ્યો હતો.
આજે અષાઢી બીજના અવસરે શુકનવંતા મૃહુર્તમાં મેઘકૃપા વરસવાની ખેડૂતો રાહ જોઈ રહ્યા છે ત્યારે હાલમાં કોઈ સિસ્ટમ એક્ટિવ ન હોવાથી સૌરાષ્ટ્રમાં વરસાદ વરસવાના કોઈ જ અણસાર નથી મળી રહ્યા, બીજી તરફ રાજ્યના દક્ષિણના જિલ્લાઓમાં શનિવારે પણ અવિરત મેઘસવારી આવી પહોંચતા સાંજ સુધીમાં તાપી જિલ્લાના દોલવણમાં પાંચ ઈંચ વરસાદ વરસ્યો હતો. જયારે ડાંગના વઘઈમાં 3 ઈંચ, નવસારીના વાંસદામાં અઢી ઈંચ, ડાંગના સુબીરમાં સવા બે ઈંચ, વલસાડના ધરમપુરમાં બે ઇચ, નવસારીના ખેરગામમાં તેમજ વલસાડના કપરાડામાં દોઢ ઈંચ, પારડીમાં એક ઈંચ અને ગણદેવી, ચોરાસી, ઉમરગામ સહિતના 44 તાલુકાઓમાં નોંધપાત્ર વરસાદ વરસ્યો હતો.