રાજ્યભરમાં FDCA ના દરોડા: અમદાવાદ સહિત રાજ્યભરમાં બોગસ અને નકલી દવાઓ ઝડપાઈ: 30થી વધુ સ્થળોએ તપાસ
ગુજરાત સરકારના ખોરાક અને ઔષધ નિયમન તંત્ર (FDCA) દ્વારા બનાવટી, ડુપ્લિકેટ અને ગેરકાયદેસર દવાઓના વેચાણ સામે અત્યંત કડક કાર્યવાહી કરવામાં આવી છે. રાજ્યભરમાં હાથ ધરાયેલી સઘન તપાસ દરમિયાન બ્લડ પ્રેશર (BP) જેવી મહત્વની દવાઓની નકલી નકલો ઝડપાઈ છે, જેનાથી તબીબી અને ફાર્માસ્યુટિકલ ક્ષેત્રે હડકંપ મચી ગયો છે.
તપાસ અને દરોડાના મુખ્ય મુદ્દાઓ
સઘન તપાસ અભિયાન: મળેલી ચોક્કસ બાતમીના આધારે FDCA દ્વારા અમદાવાદ સહિત રાજ્યભરમાં છેલ્લા ૩ દિવસથી ૩૦ થી વધુ મેડિકલ સ્ટોર્સ અને એજન્સીઓમાં ઓચિંતા દરોડા પાડવામાં આવ્યા છે.
જપ્ત કરાયેલો જથ્થો: પ્રાથમિક તપાસમાં અંદાજે ૧.૭૦ લાખ રૂપિયાની કિંમતનો શંકાસ્પદ અને નકલી દવાનો જથ્થો જપ્ત કરવામાં આવ્યો છે અને તેને પ્રતિબંધિત કરવામાં આવ્યો છે.
કઈ દવાઓ પકડાઈ?
મુખ્યત્વે બ્લડ પ્રેશર માટે વપરાતી દવાનું ડુપ્લિકેટ વેચાણ ઝડપાયું છે, જેમાં Nicardia Retard 10/20 Tablets, Cilacar 5, Cilacar 10, અને Cilacar TM 50 જેવી દવાઓનો સમાવેશ થાય છે. ભરૂચની જે.બી. કેમિકલ્સ એન્ડ ફાર્માસ્યુટિકલ્સ લિમિટેડની ‘NICARDIA RETARD 10’ દવાની નકલ વેચાતી હોવાનું સામે આવ્યું છે.
કયા મુખ્ય સ્થળો અને મેડિકલ સ્ટોર્સમાં તપાસ થઈ?
તંત્ર દ્વારા અમદાવાદ, સુરત, નડિયાદ, ભુજ અને ભાવનગર સહિતની અનેક પેઢીઓમાં તપાસ હાથ ધરવામાં આવી છે, જેમાં મુખ્યત્વે:
લીલાવતી ફાર્મસી એન્ડ વેલનેસ પ્રા. લિ., સેટેલાઇટ, અમદાવાદ
સાણંદ મેડિકલ સ્ટોર્સ, સાણંદ
પારસ ઈકોમેડ, સેટેલાઇટ, અમદાવાદ
પાર્શ્વ મેડિકલ એજન્સી, પાલડી, અમદાવાદ
ફાર્મા–365, અમદાવાદ
કિશન મેડિકલ સ્ટોર, નડિયાદ
અરિહંત મેડિકલ એજન્સી, સેટેલાઇટ, અમદાવાદ
જે.એલ.યુ. મેડિકલ એજન્સી, શાહીબાગ
વર્ધમાન મેડિકલ એજન્સી, અમદાવાદ
સાગર ફાર્મા એજન્સી, જૂનાગઢ
આગમ ગમ ફાર્માસ્યુટિકલ, મેઘાણીનગર
રિદ્ધિ મેડિકલ એજન્સી, સોલા, અમદાવાદ
પારસ મેડિકલ એજન્સી, એલિસબ્રિજ
ગ્લોબલ ફાર્મા, ઘાટલોડિયા
મેરુ ફાર્મા, સુરત / શ્યામ ડિસ્ટ્રીબ્યુટર, સુરત
સંજીવની મેડિકલ, ગાંધીધામ, ભુજ
એપેક્ષ ફાર્મા, ભાવનગર / રોટરી ટીંબી મેડીકલ સ્ટોર, ઉમરાળા / રામ મેડીકલ સ્ટોર / સત્યમ ફાર્મસી, ભાવનગર સહિત 30થી વધુ પેઢીઓ તપાસના ઘેરામાં છે.
સપ્લાય ચેઈન અને આગામી કાર્યવાહી
તંત્ર દ્વારા આ નકલી દવાઓ ક્યાંથી અને કેવી રીતે બજારમાં આવી તેની સપ્લાય ચેઈન (ઉત્તર પ્રદેશથી લઈને અમદાવાદ સુધીના નેટવર્ક) ની કડીઓ જોડવામાં આવી રહી છે. નમૂનાઓનું લેબોરેટરી પરીક્ષણ કરાવ્યા બાદ આ કેસમાં સંડોવાયેલા કસૂરવારો સામે સખત કાનૂની અને પોલીસ કાર્યવાહીની તજવીજ હાથ ધરવામાં આવી છે.
રાજ્યમાં નકલી દવાઓનું વેચાણ પકડાવું એ જનઆરોગ્ય માટે અત્યંત ગંભીર બાબત છે. તંત્રની આ સમયસરની કાર્યવાહીથી મોટા જોખમને ટાળી શકાયું છે, પરંતુ નાગરિકોએ પણ દવા ખરીદતી વખતે ખાસ સાવચેતી રાખવી અનિવાર્ય છે.
