સુરત : “હજુ ખાશો બહારનું?” આ સવાલ હવે સુરતના લોકોને ફરી સતાવી રહ્યો છે. સચિનના પાલી ગામમાં આવેલા જય હનુમાન ચાઈનીઝ સેન્ટરમાં એક ગ્રાહકે મન્ચુરિયન ઓર્ડર કર્યું અને પ્લેટમાં જે નીકળ્યું તે જોઈને તેના હોંશ ઉડી ગયા. પ્લેટમાંથી મૃત ઉંદર નીકળ્યો. ગ્રાહકે વીડિયો બનાવી વાયરલ કરતાં જ ફૂડ વિભાગ દોડતું થયું. તપાસમાં ખુલ્યું કે દુકાન ગંદકીથી ભરેલી હતી અને લાયસન્સ વગર જ ચાલતી હતી.
મન્ચુરિયનમાં મૃત ઉંદર, વીડિયો વાયરલ થતાં ફેલાયો રોષ
સચિન વિસ્તારના પાલી ગામમાં આવેલી જય હનુમાન ચાઈનીઝ સેન્ટરની આ ઘટના છે. એક ગ્રાહકે મન્ચુરિયનનો ઓર્ડર આપ્યો. ખાતી વખતે પ્લેટમાંથી મૃત ઉંદર નીકળતા તે ચોંકી ગયો.
ગ્રાહકે તરત જ આખી ઘટનાનો વીડિયો બનાવી સોશિયલ મીડિયા પર મૂક્યો. વીડિયોમાં રસોડામાં ભારે ગંદકી અને બિનઆરોગ્યપ્રદ રીતે ખોરાક બનાવાતો હોવાના દૃશ્યો પણ જોવા મળ્યા. વીડિયો વાયરલ થતાં જ સ્થાનિકોમાં ભારે આક્રોશ ફેલાયો.
ફૂડ સેફ્ટીની રેડ, ખુલ્લી અનેક બેદરકારી
ફરિયાદ મળતાં જ સચિન સાઉથ ઝોન ફૂડ સેફ્ટી વિભાગની ટીમ તાત્કાલિક સ્થળ પર પહોંચી. તપાસમાં સામે આવ્યું કે:
– રસોડામાં સ્વચ્છતાનો સંપૂર્ણ અભાવ હતો
– ખાદ્ય સામગ્રી ગંદા વાતાવરણમાં સંગ્રહિત હતી
– ફૂડ સેફ્ટીના કોઈ નિયમોનું પાલન થતું નહોતું
લાયસન્સ વગર ચાલતી હતી દુકાન, ફટકારાયો ₹10 હજારનો દંડ
તપાસ દરમિયાન વધુ એક મોટો ખુલાસો થયો. આ ચાઈનીઝ સેન્ટર સુરત મહાનગરપાલિકાનું ટ્રેડ લાયસન્સ લીધા વગર જ ગેરકાયદેસર રીતે ચાલતી હતી.
ખાદ્ય સુરક્ષા નિયમોના ભંગ બદલ ફૂડ વિભાગે દુકાનદારને ₹10,000નો દંડ ફટકાર્યો છે. સાથે જ કડક સૂચના આપી છે કે:
– તાત્કાલિક સંપૂર્ણ સ્વચ્છતા રાખવી
– ખોરાક સ્વચ્છ વાતાવરણમાં જ બનાવવો
– તમામ ફૂડ સેફ્ટીના નિયમોનું પાલન કરવું
અધિકારીઓએ ચેતવણી આપી છે કે ભવિષ્યમાં ફરી આવી બેદરકારી મળશે તો વધુ કડક કાર્યવાહી થશે.
શહેરમાં ખાદ્ય સુરક્ષા પર ફરી સવાલ
આ ઘટનાએ સુરતમાં સ્ટ્રીટ ફૂડ અને નાના ફૂડ સેન્ટરોની સ્વચ્છતા પર ફરી પ્રશ્નો ઉભા કર્યા છે. લોકોની માંગ છે કે નિયમિત ચેકિંગ થવું જોઈએ.
ફૂડ સેફ્ટી વિભાગે પણ જાહેરાત કરી છે કે શહેરભરના શંકાસ્પદ ફૂડ સેન્ટરો પર વિશેષ ચેકિંગ અભિયાન ચલાવવામાં આવશે.
