પ્લાસ્ટિક, પાર્કિંગ અને ગેરકાયદે જોડાણો સામે અમદાવાદ મ્યુનિસિપલ કમિશનરનું કડક વલણ; નિયમો તોડનારા સામે આકરા પગલાંની ચેતવણી

અમદાવાદને સ્વચ્છ, વ્યવસ્થિત અને ટ્રાફિક મુક્ત બનાવવા માટે મ્યુનિસિપલ તંત્ર ફરી એકવાર સક્રિય બન્યું છે. તાજેતરમાં યોજાયેલી સાપ્તાહિક સમીક્ષા બેઠકમાં AMC કમિશનરે શહેરની પાયાની સમસ્યાઓ અંગે ઊંડી નારાજગી વ્યક્ત કરી હતી. પ્રતિબંધ છતાં પ્લાસ્ટિકનો થતો બેફામ ઉપયોગ, મુખ્ય માર્ગો પર આડેધડ પાર્કિંગ, ગેરકાયદે ઔદ્યોગિક ડ્રેનેજ કનેક્શનો અને જાહેર શૌચાલયોની દુર્દશા જેવા ગંભીર મુદ્દાઓ પર તંત્રએ હવે બાંયો ચડાવી છે. માત્ર કાગળ પર સૂચનાઓ આપવાને બદલે જમીની સ્તરે પરિણામ દેખાય તે હેતુથી તમામ ઝોનલ અધિકારીઓને સીધા નિર્દેશો જારી કરવામાં આવ્યા છે.

પાનના ગલ્લાઓ પર કડક તવાઈ અને મોટો દંડ

શહેરમાં પ્લાસ્ટિકના વધી રહેલા ચલણ સામે તંત્રે લાલ આંખ કરી છે. ખાસ કરીને પાનના ગલ્લાઓ પર પ્રતિબંધીત પ્લાસ્ટિકના પાઉચ અને થેલીઓનો મોટા પાયે ઉપયોગ થતો હોવાનું સામે આવતાં, કમિશનરે આવા સ્થળોએ સઘન દરોડા પાડવા સૂચના આપી છે. નિયમભંગ કરનારા વેપારીઓ પાસેથી પ્લાસ્ટિકનો જથ્થો જપ્ત કરી સ્થળ પર જ ભારે દંડ વસૂલવામાં આવશે. ભૂતકાળમાં આવી કાર્યવાહી બાદ સ્થિતિ ફરી સામાન્ય થઈ જતી હોવાથી, આ વખતે સતત મોનિટરિંગ રાખવા તાકીદ કરાઈ છે.

ગેરકાયદે ઈન્ડસ્ટ્રીયલ ડ્રેનેજ જોડાણો સામે સીધી ચેતવણી

શહેરની ડ્રેનેજ લાઈનોમાં ગેરકાયદેસર રીતે કરવામાં આવેલા ઔદ્યોગિક જોડાણોને કારણે ગટર વ્યવસ્થા પર ભારે દબાણ સર્જાય છે. કમિશનરે તમામ ઝોનલ અધિકારીઓને સ્પષ્ટ આદેશ આપ્યો છે કે આવા જોડાણો તાત્કાલિક અસરથી કાપી નાખવામાં આવે. જો અધિકારીઓ આ બાબતે ઢીલી નીતિ અપનાવશે અથવા જોડાણો દૂર કરવામાં નિષ્ફળ રહેશે, તો ખુદ કમિશનર સીધા કડક પગલાં ભરશે તેવી સ્પષ્ટ ચેતવણી પણ બેઠકમાં આપવામાં આવી હતી.

આ પણ વાંચો: પ્લાસ્ટિક, પાર્કિંગ અને ગેરકાયદે જોડાણો સામે અમદાવાદ મ્યુનિસિપલ કમિશનરનું કડક વલણ; નિયમો તોડનારા સામે આકરા પગલાંની ચેતવણી

ટ્રાફિક અડચણરૂપ પાર્કિંગ પર ભારે પેનલ્ટી

શહેરના મુખ્ય રસ્તાઓ પર ટ્રાફિક વ્યવસ્થા જાળવવા માટે પાર્કિંગ નિયમોનું કડક પાલન કરાવવાનો નિર્ણય લેવાયો છે. સી.જી. રોડ સહિતના વિસ્તારોમાં વાહન પાર્કિંગ માટે પીળા રંગના પટ્ટા લગાવવામાં આવશે. રોડ પર આડેધડ વાહનો પાર્ક કરતા વાહનચાલકો સામે મોટી રકમની પેનલ્ટી ફટકારવામાં આવશે. અગાઉ સાઈનબોર્ડ લગાવવાની સૂચના અપાઈ હોવા છતાં યોગ્ય અમલવારી ન થતાં હવે દંડાત્મક કાર્યવાહી તેજ કરવાનો આદેશ થયો છે.

ખાલી શાક માર્કેટો અને રસ્તા પરના ફેરિયાઓ સામે પગલાં

કરોડો રૂપિયાના ખર્ચે બનેલી શાક માર્કેટો ખાલી પડી રહે છે અને ફેરિયાઓ રસ્તા પર લારીઓ લગાવી ટ્રાફિક સમસ્યા વધારે છે. આ સ્થિતિ રોકવા માટે તંત્રએ નવો પ્લાન બનાવ્યો છે:

કર્મચારીઓની હાજરી અને ડિજિટલ મોનિટરિંગ

સોલિડ વેસ્ટ મેનેજમેન્ટ અને આરોગ્ય વિભાગ સહિતના વિભાગોમાં RWA સંસ્થા મારફતે કાર્યરત આઉટસોર્સ્ડ કર્મચારીઓની કામગીરી પર નજર રાખવા માટે ડિજિટલ વ્યવસ્થા ગોઠવવામાં આવી છે. તમામ કર્મચારીઓએ હવે પોતાની હાજરી ફરજિયાતપણે મ્યુનિસિપલની 311 મોબાઈલ એપ્લિકેશનમાં પૂરવાની રહેશે. આ સાથે કમિશનર સમક્ષ કામગીરીનો દૈનિક રિપોર્ટ રજૂ કરવાનો આદેશ પણ કરાયો છે.

જાહેર શૌચાલયોની સફાઈ: કમિશનર જાતે કરશે સરપ્રાઈઝ ચેકિંગ

શહેરની સ્વચ્છતાનું સાચું સ્તર જાહેર શૌચાલયોની સ્થિતિ પરથી મપાય છે તે બાબત પર ભાર મૂકતા કમિશનરે જાહેરાત કરી હતી કે તેઓ પોતે સવારના નિરીક્ષણ દરમિયાન સામાન્ય નાગરિકની જેમ પબ્લિક ટોયલેટનો ઉપયોગ કરશે. સરપ્રાઈઝ વિઝિટ દ્વારા સફાઈની વાસ્તવિક સ્થિતિ ચકાસવામાં આવશે, જેથી સંબંધિત કર્મચારીઓ કે એજન્સીઓ સ્વચ્છતા બાબતે કોઈ બેદરકારી ન દાખવે.

અમદાવાદ મ્યુનિસિપલ કોર્પોરેશન દ્વારા જારી કરાયેલા આ કડક નિર્દેશો સ્પષ્ટ સંકેત આપે છે કે શહેરની સ્વચ્છતા, ટ્રાફિક વ્યવસ્થા અને ડ્રેનેજ સુવિધા સાથે કોઈ પણ પ્રકારની બાંધછોડ ચલાવી લેવામાં નહીં આવે. કમિશનરના આ આકરા વલણ બાદ હવે તંત્રના અધિકારીઓ ફિલ્ડમાં ઉતરીને કેવી અને કેટલી લાંબી અમલવારી કરાવે છે, તેના પર જ શહેરની વાસ્તવિક કાયાપલટ નિર્ભર રહેશે.