નર્મદાના સાગબારામાં 4.65 ઈંચ વરસાદ, મધ્ય ગુજરાતમાં ધોધમાર

આકાશ ઘેરાયું, પવનની સરસરાટી સાથે વીજળીના કડાકા ભડાકા થયા અને કલાકોની રાહ જોયા વગર મેઘરાજાએ ગુજરાતની ધરતી પર અચાનક જ રૌદ્ર અને હેત વરસાવતું સ્વરૂપ ધારણ કર્યું! હવામાન વિભાગની ચેતવણી અને આગાહી વચ્ચે રાજ્યભરમાં જાણે પાણીનો ધોધ વૂઠ્યો હોય તેમ મધ્ય ગુજરાત સહિત અનેક વિસ્તારોમાં મેઘરાજાએ ધુઆધાર બેટિંગ શરૂ કરી દીધી છે. વિદ્યાર્થીઓની સલામતી માટે શાળા-કોલેજોમાં રજા જાહેર કરવામાં આવી છે, ત્યારે માત્ર બે જ કલાકના ટૂંકા ગાળામાં રાજ્યના 82 તાલુકાઓમાં મેઘરાજાએ મન મૂકીને બેટિંગ કરી જળબંબાકાર જેવી સ્થિતિ સર્જી દીધી છે.

સાગબારા અને ગરૂડેશ્વરમાં મેઘતાંડવ: સાડા ચાર ઈંચથી વધુ વરસાદ

રાજ્યમાં સક્રિય થયેલી મજબૂત વરસાદી સિસ્ટમને કારણે સૌથી વધુ જોર મધ્ય ગુજરાતમાં જોવા મળ્યું છે. છેલ્લા 2 કલાકના જ આંકડાઓ પર નજર કરીએ તો નર્મદા જિલ્લાના સાગબારા અને ગરૂડેશ્વરમાં સૌથી વધુ 4.65 ઇંચ જેટલો બેફામ વરસાદ ખાબક્યો છે! આ ઉપરાંત નંદોદમાં 3.54 ઇંચ અને તિલકવાડામાં 3.15 ઇંચ સહીત રાજ્યના કુલ 21 જેટલા તાલુકાઓમાં એક જ ઝાટકે એક ઇંચથી વધુ વરસાદ નોધાયો છે, જેના કારણે નદી-નાળા બે કાંઠે વહેતા થયા છે.

આ પણ વાંચો: રાજકોટના લોકમેળામાં રમકડાના 100 સ્ટોલ માટે વેપારીઓની ઉદાસીનતાઃ 31 ફોર્મ ભરાયા

છેલ્લા 24 કલાકમાં 7 તાલુકાઓમાં 2 ઈંચથી વધુ ખાબક્યો ધોધમાર વરસાદ

છેલ્લા 24 કલાકની વાત કરીએ તો ગુજરાતના 106 તાલુકાઓમાં મેઘરાજાએ હાજરી નોંધાવી છે. જેમાં વિશેષ કરીને મધ્ય ગુજરાતના પંથકો ધમધમી ઉઠ્યા છે:

છોટાઉદેપુરના પાવી જેતપુર અને પંચમહાલના જાંબુઘોડામાં સૌથી વધુ 2.83 ઇંચ વરસાદ નોંધાયો છે.

છોટાઉદેપુરના કવાંટમાં 2.64 ઇંચ અને નસવાડીમાં 2.36 ઇંચ વરસાદથી જળબંબાકાર સર્જાયો છે.

રાજ્યના કુલ 16 તાલુકાઓમાં 1 ઇંચથી વધુ અને 7 તાલુકાઓમાં 2 ઇંચથી વધુ વરસાદ નોંધાયો છે.

પાછલા 24 કલાકમાં નોંધાયેલા મુખ્ય વરસાદના આંકડા (ઇંચમાં)

 વહીવટી તંત્ર એલર્ટ અને સુરક્ષાના પગલાં

નસવાડી અને સાગબારા સહિતના ઉપરવાસમાં થયેલા અતિભારે વરસાદને કારણે સ્થાનિક નદીઓમાં પૂરની સ્થિતિ અને જળબંબાકારના દશ્યો સર્જાયા છે. ભારે વરસાદની સતત આગાહીને ધ્યાનમાં રાખીને નાગરિકોને સાવચેત રહેવા અને સુરક્ષિત સ્થળોએ ખસવા તંત્ર દ્વારા અપીલ કરવામાં આવી છે. વિદ્યાર્થીઓની સુરક્ષા સર્વોપરી હોવાથી તંત્ર દ્વારા શૈક્ષણિક સંકુલોમાં રજા જાહેર કરી દેવામાં આવી છે ત્યારે આગામી કલાકોમાં મેઘરાજા કેવું રૌદ્ર સ્વરૂપ બતાવે છે તેના પર સૌની નજર ટકેલી છે.