રોનાલ્ડોની પોર્ટુગલ ૪૫મા નંબરની ટીમને ન હરાવી શકી !
ડીઆર કાંગોએ કર્યો મોટો ઉલટફેર: મેચ ૧-૧થી ડ્રો: હૈરી કેને બે ગોલ ફટકારી ઈંગ્લેન્ડને જીતાડ્યું
હ્યુસ્ટનમાં રમાયેલા ફિફા વર્લ્ડકપ-૨૦૨૬ના ગ્રુપ-કેના મુકાબલામાં એક મોટો ઉલટફેર જોવા મળ્યો હતો. ટ્રોફી જીતવાની પ્રબળ દાવેદાર પોર્ટુગલની ટીમ વિશ્વની ૪૫મા ક્રમની ડીઆર કાંગોની ટીમને હરાવી શકી ન્હોતી અને આ મેચ ૧-૧થી ડ્રો રહેવા પામી હતી. પોર્ટુગલના ફૂટબોલર ક્રિસ્ટિયાનો રોનાલ્ડો માટે ટૂર્નામેન્ટની આ શરૂઆત અત્યંત નિરાશાજનક રહી હતી. ખુદ રોનાલ્ડો પણ આ મેચમાં બેઅસર જોવા મળ્યો હતો. પોર્ટુગલ વતી યુવા મીડફિલ્ડર જોઆઓ નેવેસે એક ગોલ કર્યો જ્યારે કાંગો વતી યોન વિસાએ ગોલ કરી સ્કોર ૧-૧થી બરાબર કર્યો હતો.
જ્યારે અન્ય મેચમાં ઘાનાએ પનામાને ૧-૦થી હરાવ્યું હતું. આ મેચની અંતિમ ક્ષણોમાં કાલેબ યિરેન્કીએ ગોલ કરી દેતાં ટીમને જીત મળી હતી.
આ પણ વાંચો: ભૂતપૂર્વ વિદ્યાર્થીઓની માત્ર અરજી રદ થવાથી વિરાણીના ટ્રસ્ટીઓને કોઇ ક્લિનચીટ મળી નથી
ગ્રુપ-એલના પોતાના પ્રથમ મુકાબલામાં ઈંગ્લેન્ડે ક્રોએશિયાને ૪-૨થી હરાવ્યું હતું. હૈરી કેને મેચની ૧૨મી મિનિટે મળેલી પેનલ્ટીને ગોલમાં તબદીલ કરી હતી. આ પછી તેણે ૪૨મી મિનિટમાં પોતાનો બીજો ગોલ કર્યો હતો. માર્ટિન બટુરિના (૩૬મી મિનિટ) અને પીટર મૂસાએ પ્રથમ હાફમાંગોલ કરી ક્રોએશિયાને મેચમાં જીવંત રાખ્યું હતું. જો કે ૪૭મી મિનિટમાં જૂડ બેલિંઘમ અને ત્યારબાદ માર્કસ રૈશફોર્ડે ૮૫મી મિનિટમાં ગોલ કરી સ્કોર ૪-૨ કર્યો હતો. આ બન્ને ટીમ વચ્ચે ૨૦૧૮માં સેમિફાઈનલ મેચ રમાઈ હતી જેમાં ક્રોએશિયા જીત્યું હતું. આ ઉપરાંત કોલંબિયાએ ઉઝબેકિસ્તાનને ૩-૧થી હરાવ્યું હતું.
આજે સ્વિત્ઝરર્લેન્ડ-બોસ્નિયા વચ્ચે ટક્કર
ફિફા વર્લ્ડકપમાં આજે શુક્રવારે પ્રથમ મેચ સ્વિત્ઝરલેન્ડ-બોસ્નિયા એન્ડ હર્જેગોવિના, બીજી મેચ કેનેડા-કતર અને ત્રીજી મેસ મેક્સિકો-સાઉથ કોરિયા વચ્ચે રમાશે.
