IND vs BAN | Women’s Asia Cup 2024 : ભારતનો વટભેર ફાઈનલમાં પ્રવેશ,આ ૩ ખેલાડીઓએ કર્યો કમાલ

Fri, July 26 2024

ટીમ ઈન્ડિયા T20 વર્લ્ડ કપ 2024ની ચેમ્પિયન બની હતી ત્યારે વધુ એક ખુશીના સમાચાર પણ સામે આવ્યા છે. ભારતીય મહિલા ક્રિકેટ ટીમે પણ એશિયાકપમાં શાનદાર પ્રદર્શન કરીને ફાયનલમાં પ્રવેશ મેળવ્યો છે. ભારતીય ટીમે શાનદાર પ્રદર્શન કર્યું છે શુક્રવાર (26 જુલાઈ)ના રોજ રંગિરી દામ્બુલા ઈન્ટરનેશનલ સ્ટેડિયમમાં રમાયેલી પ્રથમ સેમિફાઈનલ મેચમાં ભારતે બાંગ્લાદેશને 10 વિકેટે હરાવ્યું હતું. આ મેચમાં ભારતને જીતવા માટે માત્ર 81 રનનો ટાર્ગેટ હતો જે તેણે માત્ર 11 ઓવરમાં જ હાંસલ કરી લીધો હતો. ફાઇનલમાં ભારતીય ટીમનો મુકાબલો શ્રીલંકા અને પાકિસ્તાન વચ્ચે રમાનારી બીજી સેમિફાઇનલ મેચના વિજેતા સાથે થશે. જો ભારતીય ટીમ ફાઇનલમાં જીત મેળવી લેશે તો કરોડો ભારતીયો માટે ક્ષણ હશે કારણે કે હજુ થોડા સમય પહેલા જ ભારતની પુરુષ ટીમે T20 World Cupમાં જીત મેળવી હતી ત્યારે હવે ભારતીયો મહિલા ટીમની જીતની રાહ જોઈ રહ્યા છે.

સ્મૃતિએ તોફાની ફિફ્ટી ફટકારી

ભારત તરફથી ઓપનર બેટ્સમેન સ્મૃતિ મંધાનાએ 39 બોલમાં અણનમ 55 રન બનાવ્યા, જેમાં 9 ચોગ્ગા અને એક છગ્ગાનો સમાવેશ થાય છે. જ્યારે શેફાલી વર્મા 26 રન બનાવીને અણનમ રહી હતી. શેફાલીએ 28 બોલમાં 2 ચોગ્ગા ફટકાર્યા હતા. આ બંનેએ શાનદાર બેટિંગ કરીને બાંગ્લાદેશને મેચમાં વાપસી કરવાની કોઈ તક આપી ન હતી.

રાધા-રેણુકાની કિલર બોલિંગ

આ પહેલા ટોસ જીતીને પ્રથમ બેટિંગ કરવા આવેલી બાંગ્લાદેશની ટીમ નિર્ધારિત 20 ઓવરમાં 8 વિકેટે 80 રન જ બનાવી શકી હતી. બાંગ્લાદેશ તરફથી કેપ્ટન નિગાર સુલ્તાનાએ સૌથી વધુ 32 રન બનાવ્યા. આ સિવાય માત્ર શોર્ના અખ્તર (અણનમ 19 રન) જ ડબલ ડિજિટ સુધી પહોંચી શકી હતી. ભારત તરફથી ઝડપી બોલર રેણુકા સિંહ અને સ્પિનર રાધા યાદવે ત્રણ-ત્રણ વિકેટ લીધી હતી.

ભારતની પ્લેઈંગ ઈલેવન: શેફાલી વર્મા, સ્મૃતિ મંધાના, ઉમા છેત્રી, હરમનપ્રીત કૌર (કેપ્ટન), જેમિમાહ રોડ્રિગ્સ, રિચા ઘોષ (વિકેટકીપર), દીપ્તિ શર્મા, પૂજા વસ્ત્રાકર, રાધા યાદવ, તનુજા કંવર, રેણુકા ઠાકુર સિંહ.

બાંગ્લાદેશની પ્લેઈંગ ઈલેવન: દિલારા અખ્તર, મુર્શિદા ખાતૂન, નિગાર સુલતાના (વિકેટકીપર/કેપ્ટન), રૂમાના અહેમદ, ઈશ્મા તંજીમ, રિતુ મોની, રાબેયા ખાન, શોર્ના અખ્તર, નાહિદા અખ્તર, જહાનારા આલમ, મારુફા અખ્તર.

તમને જણાવી દઈએ કે મહિલા એશિયા કપ 19 થી 28 જુલાઈ સુધી શ્રીલંકાના દામ્બુલામાં યોજાઈ રહ્યો છે. આ ટુર્નામેન્ટમાં કુલ 8 ટીમોએ ભાગ લીધો છે. વર્તમાન ચેમ્પિયન ભારતને પાકિસ્તાન, નેપાળ અને UAEની સાથે ગ્રુપ Aમાં રાખવામાં આવ્યું છે. બીજા ગ્રુપમાં બાંગ્લાદેશ, મલેશિયા, શ્રીલંકા અને થાઈલેન્ડનો સમાવેશ થાય છે. ગ્રુપ Aમાંથી ભારત અને પાકિસ્તાન જ્યારે ગ્રુપ Bમાંથી શ્રીલંકા અને બાંગ્લાદેશે સેમિફાઇનલમાં સ્થાન મેળવ્યું હતું.

ટુર્નામેન્ટની ફાઈનલ 28 જુલાઈના રોજ રમાશે

આ વખતે પણ મહિલા એશિયા કપ T20 ફોર્મેટમાં રમાઈ રહ્યો છે. મહિલા એશિયા કપમાં ભારત સૌથી સફળ ટીમ છે અને 7 વખત ટૂર્નામેન્ટ જીતી ચુકી છે. છેલ્લી વખત મહિલા એશિયા કપ 2022માં રમાયો હતો. ત્યારબાદ ભારતે ફાઈનલ મેચમાં શ્રીલંકાને હરાવીને ટ્રોફી જીતી હતી. સપ્ટેમ્બર-ઓક્ટોબર મહિનામાં બાંગ્લાદેશની ધરતી પર યોજાનાર મહિલા T20 વર્લ્ડ કપ માટે આ ટૂર્નામેન્ટ ખૂબ જ મહત્વપૂર્ણ છે.