હાર્દિક પંડ્યા GTમાં વાપસી કરવા માંગતો હતો, પરંતુ કેપ્ટનશીપની શરતે ડીલ રદ થઈ!

IPL 2027ની ટ્રેડ વિન્ડો ખુલે તે પહેલાં જ હાર્દિક પંડ્યાને લઈને બજાર ગરમ થઈ ગયું છે. મુંબઈ ઈન્ડિયન્સનો કેપ્ટન ફરી એકવાર પોતાની જૂની ફ્રેન્ચાઈઝી ગુજરાત ટાઈટન્સમાં પાછા ફરવા ઈચ્છતો હતો, પરંતુ એક જ શરતને કારણે આ ડીલ તૂટી ગઈ. ચેન્નઈ, દિલ્હી અને KKR પણ રેસમાં છે, પણ GT વાપસીની વાત હાલ ચર્ચાનો સૌથી મોટો મુદ્દો બની છે.

હાર્દિકે કરી હતી GT મેનેજમેન્ટ સાથે વાત

રિપોર્ટ્સ અનુસાર હાર્દિક પંડ્યાએ IPL 2027 ટ્રેડ પહેલાં ગુજરાત ટાઈટન્સના મેનેજમેન્ટ સાથે સીધી વાતચીત કરી હતી. GTના વ0ર્તમાન કેપ્ટન શુભમન ગિલ પણ હાર્દિકની વાપસી માટે સંમત હતો. 2022માં હાર્દિકની કેપ્ટનશીપમાં જ GTએ પોતાની પહેલી જ સીઝનમાં ટાઈટલ જીત્યું હતું અને બીજી સીઝનમાં ફાઈનલ રમી હતી, એટલે ફેન્સ પણ આ વાપસીથી ખુશ હતા.

પરંતુ વાત અહીં અટકી. રિપોર્ટમાં દાવો કરવામાં આવ્યો છે કે હાર્દિકે ફ્રેન્ચાઈઝી સમક્ષ “કેપ્ટનશીપ”ની શરત મૂકી હતી. GTએ શુભમન ગિલને લાંબા ગાળાના કેપ્ટન તરીકે જોયા છે અને કેપ્ટનશીપ બદલવાનો સ્પષ્ટ ઈનકાર કરી દીધો. આ જ કારણથી હાર્દિકનો GT સાથેનો ટ્રેડ શક્ય ન બન્યો.

GTના પ્રતિનિધિએ આ મુદ્દે કોઈ ટિપ્પણી કરવાનો ઈનકાર કર્યો છે. જ્યારે હાર્દિકના મેનેજરનું કહેવું છે કે, “હાર્દિકની કોઈપણ ફ્રેન્ચાઈઝી સાથે સીધી વાતચીત થઈ નથી. જો કોઈ સંપર્ક થયો હોય તો તે MI ફ્રેન્ચાઈઝીના માધ્યમથી જ થયો છે.”

આ પણ વાંચો: રશિયા-યુક્રેન કરોડો ડોલરના વિવાદમાં ભારતના પૂર્વ સીજેઆઈ ડી.વાય. ચંદ્રચૂડની એન્ટ્રી, બન્યા મધ્યસ્થ

CSK, DC, KKR પણ રેસમાં

હાર્દિક હાલમાં 5 વખતની ચેમ્પિયન મુંબઈ ઈન્ડિયન્સનો કેપ્ટન છે. 2024માં તે GTથી MIમાં ટ્રેડ થઈને આવ્યો હતો અને રોહિત શર્માના સ્થાને કેપ્ટન બનાવવામાં આવ્યો હતો. પરંતુ તેની કેપ્ટનશીપમાં MIનું પ્રદર્શન નબળું રહેતા હવે અટકળો છે કે MI તેને રિટેન નહીં કરે.

આ કારણે હાર્દિકને ટ્રેડ કરવા માટે CSK, દિલ્હી કેપિટલ્સ અને KKR જેવી ટીમો લાઈનમાં છે. ખાસ કરીને ચેન્નઈ સુપર કિંગ્સને સૌથી આગળ માનવામાં આવી રહી છે.

રોહિતથી હાર્દિક અને હવે?

હાર્દિકે પોતાની IPL કારકિર્દીની શરૂઆત MIથી કરી હતી. 2022માં GTમાં ગયા બાદ તેણે ડેબ્યૂ સીઝનમાં જ ટ્રોફી જીતાડી. 2024માં MI પરત ફર્યા બાદ તેને રોહિત શર્માની જગ્યાએ કેપ્ટન બનાવવામાં આવ્યો. મુંબઈએ રોહિત પાસેથી કેપ્ટનશીપ ત્યારે લીધી હતી જ્યારે તેણે ભારતને 2023ના ODI વર્લ્ડ કપની ફાઈનલમાં પહોંચાડ્યું હતું. કેપ્ટનશીપ બદલાતા MIના ફેન્સમાં ભારે નારાજગી હતી અને ટીમ પ્લેઓફમાં પણ ન પહોંચી શકી.

હવે IPL 2027 પહેલાં હાર્દિક કઈ જર્સીમાં રમશે તે જોવું રસપ્રદ રહેશે. કેપ્ટનશીપ વિના GTમાં વાપસી ન થતાં હવે CSK કે KKR તેના માટે નવો વિકલ્પ બની શકે છે.