જંગલેશ્વર ડિમોલિશનના ખર્ચનું આજે `પોસ્ટમોર્ટમ’ કરશે શાસકો

રેઈટ કોન્ટ્રાક્ટ પાછલા પદાધિકારીઓએ આપ્યો હોય થયેલુ ચૂકવણું પરત ન લઈ શકાય પરંતુ બાકી રહેલા બિલનું શું કરવું તેનો નિર્ણય લેવાશે

મેયર-સ્ટે.ચેરમેન આજે મ્યુ.કમિશનર સહિતના અધિકારીઓ સાથે કરશે બેઠક

ચા-નાસ્તા-ભોજનના ૨૭.૪૦ લાખના ખર્ચની દરખાસ્ત બુધવારે સ્ટેન્ડિંગ કમિટી સમક્ષ આવશે જે મંજૂર થવાની શક્યતા નહીંવત્

રાજકોટ જ નહીં બલ્કે ગુજરાતભરમાં અત્યંત વિવાદિત બની ગયેલા જંગલેશ્વર ડિમોલિશન દરમિયાન કરવામાં આવેલા ખર્ચ મુદ્દે મહાપાલિકા તંત્ર વગોવાઈ ગયું છે ત્યારે ખરડાયેલી આ છાપને કેવી રીતે સુધારવી અને ભવિષ્યમાં બીજી વખત આવું ન બને તે માટે શું વ્યવસ્થા કરી શકાય તે સહિતના મુદ્દા ઉપરાંત ખર્ચનું `પોસ્ટમોર્ટમ’ કરવા માટે આજે શાસકો તેમજ અધિકારીઓ વચ્ચે એક મહત્ત્વની બેઠક મળનાર હોવાનું અને તેમાં મોટો નિર્ણય લેવામાં આવનાર હોવાનું જાણવા મળ્યું છે.

આ અંગે વધુમાં જાણવા મળ્યા પ્રમાણે મહત્તમ એજન્સીઓને ૨૦૨૩ દરમિયાન રેઈટ કોન્ટ્રાક્ટ આપવામાં આવ્યા છે જે પાછલા પદાધિકારીઓના કાર્યકાળમાં અપાયા હોય જે બિલના ચૂકવણા કરી દેવામાં આવ્યા છે તે પરત લઈ શકાય તેમ નથી પરંતુ હજુ ઘણાખરા બિલ બાકી હોય તેનું ચૂકવણું કેવી રીતે કરવું અને આ બિલમાં જે વસ્તુની ખરીદી કરવામાં આવી છે તે ખરેખર માર્કેટ રેટ પ્રમાણે જ કરવામાં આવી છે કે પછી વધુ ભાવ ચૂકવવામાં આવ્યા છે તે સહિતના મુદ્દે સમીક્ષા કરવામાં આવશે. સમીક્ષા કર્યા બાદ આ મુદ્દે મોટો નિર્ણય લેવાઈ શકે છે.

આ પણ વાંચો: ફ્રી રિટર્ન’ ની આધુનિક આદત પાછળ છુપાયેલી છે ભયાનક આર્થિક અને પર્યાવરણીય બરબાદી!

મેયર ડૉ.નેહલ શુક્લ, સ્ટેન્ડિંગ કમિટી ચેરમેન પરેશ પીપળીયા આજે મ્યુનિસિપલ કમિશનર તુષાર સુમેરા સહિતના અધિકારીઓ સાથે આ મુદ્દે બેઠક કરશે અને તેમાં રેઈટ કોન્ટ્રાક્ટ કઈ કઈ એજન્સીને આપવામાં આવ્યો છે તે સહિતના મુદ્દે ચર્ચા કરશે. જરૂર પડ્યે રેઈટ કોન્ટ્રાક્ટ રદ્દ પણ કરવામાં આવી શકે છે. નવા શાસકો માટે રાહતની વાત એ છે કે તેમના કાર્યકાળમાં એક પણ રેઈટ કોન્ટ્રાક્ટ અપાયો ન હોય પાછલા પદાધિકારીઓએ કરેલી `કામગીરી’ની જ સમીક્ષા કરવાની રહેશે.

આ વિવાદ જ્યાંથી શરૂ થયો તે જંગલેશ્વર ડિમોલિશન દરમિયાન ચા-નાસ્તા-ભોજનના ૨૭.૪૦ લાખ રૂપિયાના ખર્ચની દરખાસ્ત પાછલી સ્ટેન્ડિંગ કમિટીની બેઠક દરમિયાન પેન્ડીંગ રાખવામાં આવી હોય બુધવારે મળનારી કમિટીની બેઠકમાં ફરી આવશે ત્યારે આ વખતે પણ તે મંજૂર થવાની શક્યતા નહીંવત્ રહેલી છે ત્યારે તે મુદ્દે શું નિર્ણય લેવાય છે તે જોવું પણ રસપ્રદ બની રહેશે.