લોકમેળાના ફોર્મ ઉપાડવામાં ભારે ઘસારો: બે દિવસમાં ૧૫૦થી વધુ ફોર્મ ઉપડી ગયા
રાજકોટના રેસકોર્સ મેદાનમાં જન્માષ્ટમીના તહેવાર નિમિત્તે ભાતીગળ લોકમેળાના આયોજનની તડામાર તૈયારીઓ ચાલી રહી છે ત્યારે ગઈકાલથી ફોર્મ વિતરણ શરૂ થયું છે જેમાં પ્રથમ બે દિવસમાં ફોર્મ લેવા માટે ભારે ઘસારો જોવા મળ્યો છે. ૨૨૮ સ્ટોલ અને પ્લોટ માટે અત્યાર સુધીમાં ૧૫૦થી વધુ ફોર્મ ઉપડી ગયા છે ત્યારે આ વર્ષે રમકડા, ખાણીપીણી, યાંત્રિક રાઈડના સ્ટોલ-પ્લોટ માટે ભારે હરિફાઈ જોવા મળે તેવું લાગી રહ્યું છે.
રાજકોટના રેસકોર્સ ગ્રાઉન્ડ ખાતે દર વર્ષે લોકમેળા સમિતિ દ્વારા જન્માષ્ટમીના તહેવાર નિમિત્તે ભાતીગળ લોકમેળાનું આયોજન કરવામાં આવે છે જેમાં સૌરાષ્ટ્રભરમાંથી દર વર્ષે ૧૫ લાખથી વધુ લોકો મેળામાં ઉમટી પડે છે. આ વર્ષે પણ ૨ સપ્ટેમ્બરથી ૬ સપ્ટેમ્બર દરમિયાન લોકમેળાનું આયોજન કરવામાં આવ્યું છે.
ત્રિકોણબાગ તોરલ બિલ્ડિંગ ખાતે આવેલ ઈન્ડિયન બેન્ક ખાતે વહીવટી તંત્રએ ગઈકાલથી ફોર્મ વિતરણ શરૂ કર્યું છે જેમાં રમકડાના સ્ટોલ, ખાણીપીણીના સ્ટોલ, આઈસ્ક્રીમના ચોકઠા, યાંત્રિક રાઈડના પ્લોટ માટેના ફોર્મની કિંમત રૂા.૨૦૦ રાખવામાં આવી છે.
આ પણ વાંચો: 23 જુલાઈ ગુરૂવારે નાગરિકોની ફરિયાદોનું ઓનલાઈન નિવારણ કરવામાં આવશે
પ્રથમ બે દિવસમાં મેળાના ફોર્મ ઉપાડવામાં ભારે ઘસારો જોવા મળ્યો છે જેમાં પ્રથમ દિવસે ૮૬ ફોર્મ ઉપડ્યા બાદ બીજા દિવસે બપોર સુધીમાં ૬૦ ફોર્મ ઉપડ્યા હતા અને સાંજ સુધીમાં ૧૫૦થી વધુ ફોર્મ ઉપડી ગયા હોવાનું જાણવા મળ્યું છે.
રાજકોટના લોકમેળાનો લે-આઉટ પ્લાન જાહેર કરવામાં આવ્યો છે જેમાં રમકડાના ૧૦૦ સ્ટોલ, નાના ખાણીપીણીના ૪૮ સ્ટોલ જ્યારે ૨૬ આઈસ્ક્રીમના ચોકઠા રાખવામાં આવ્યા છે. આ ઉપરાંત નાની, મધ્યમ અને મોટી યાંત્રિક રાઈડ તેમજ મોટા ખાણીપીણીના પ્લોટ મળી કુલ ૨૨૮ પ્લોટ ફાળવવામાં આવ્યા છે.
લોકમેળાના ફોર્મ ૨૮ જુલાઈ સુધીમાં ભરીને પરત કરવાના રહેશે સાથે ડિમાન્ડ ડ્રાફ્ટ અને એડવાન્સ રકમ ભાડા સાથે ભરવાની રહેશે ત્યારબાદ રમકડાના સ્ટોલ, નાના ખાણીપીણીના સ્ટોલ, નાની અને મધ્યમ ચકરડીના પ્લોટનો ડ્રો કરવામાં આવશે અને આઈસ્ક્રીમના ચોકઠા, મોટા ખાણીપીણીના સ્ટોલ અને મોટી યાંત્રિક રાઈડના પ્લોટની હરાજી કરવામાં આવશે.
લોકમેળાના ફોર્મ માટે નાયબ મામલતદાર, તલાટી અને કારકુનની ૩ ટીમ તોરલ બિલ્ડિંગ ઈન્ડિયન બેન્ક ખાતે ફાળવવામાં આવી છે. બીજીબાજુ વહીવટી તંત્રએ મોંઘવારીને ધ્યાને લઈને આ વર્ષે નાના-મોટા સ્ટોલ, યાંત્રિક રાઈડ, આઈસ્ક્રીમના ચોકઠામાં રૂા.૧૨૦૦૦થી લઈને ૧૫૦૦૦નું ભાડુ વધારી દેવામાં આવ્યું છે.
