ચેક ડેમમાં એક બાળક લપસ્યું, બચાવવા પડેલા ત્રણ ડૂબ્યા: ચારેયના મોત

બેડી ગામથી હડમતીયા રોડ પર વીડીવાળા પીરની દરગાહે દર્શન કરવા ગયા બાદ હાથ-પગ ધોતી વખતે બનેલી દૂર્ઘટના

૭ અને ૧૧ વર્ષના બે સગા ભાઈ, ૯ વર્ષની કૌટુંબિક બહેન અને ૧૭ વર્ષીય કાકાના મૃત્યુ

૧૧ વર્ષનું બાળક ચેક ડેમ નજીક હાથ-પગ ધોવા ગયું ત્યારે પગ લપસી જતાં અંદર ખાબક્યું

રાજકોટની ભાગોળે બેડી ગામથી હડમતીયા તરફ જવાના રસ્તે આવેલા વીડીવાળા પીરની દરગાહથી થોડે જ દૂર આવેલા ચેક ડેમમાં રવિવારે હાથ-પગ ધોવા ગયેલુ ૧૧ વર્ષનું બાળક લપસી જતાં તેને બચાવવા પડેલાં અન્ય બે બાળક તેમજ એક સગીરના પણ ડૂબી જવાથી ગણતરીના મિનિટોમાં જ ચારેય લોકોના મોત નિપજ્યાની ઘટના પ્રકાશમાં આવતાં સનસનાટી મચી જવા પામી હતી.

આ અંગે વધુમાં જાણવા મળેલી વિગત પ્રમાણે રાજકોટના ૧૫૦ ફૂટ રિંગરોડ પર ખોડિયારનગર શેરી નં.૬માં રહેતા અને પાનની દુકાન ધરાવતા સાજીદભાઈ અભેશોરાના ૧૧ વર્ષીય પુત્ર સોહાન અભેશોરાનો જન્મદિવસ હોય તે નિમિત્તે સોહાન ઉપરાંત તેનો ૭ વર્ષીય નાનો ભાઈ સેફાન, સાજીદની ભત્રીજી અને રોણકી ગામે રહેતી કૌટુંબિક બહેન આલિફા અક્રમભાઈ અભેશોરા (ઉ.વ.૯) તેમજ સાજીદના પિતરાઈ ભાઈ સાહિલ જમાલભાઈ અભેશોરા (ઉ.વ.૧૭) ઉપરાંત સોહાનના માતા સુહાનાબેન એમ પાંચેય લોકો હડમતીયા રોડ પર વીડીવાળા પીરની દરગાહે દર્શન કરવા માટે ગયા હતા. દરગાહે દર્શન કર્યા બાદ તમામે સાથે ભોજન લીધું હતું.

આ પછી સોહાન હાથ-પગ ધોવા માટે દરગાહ પાસે જ આવેલા ચેકડેમમાં પહોંચ્યો હતો. આ વેળાએ પગ લપસી જતાં તે ડેમના ઉંડા પાણીમાં ખાબક્યો હતો. સોહાનને ડૂબતો જોઈ સેફાન પણ પાણીમાં કુદયો હતો અને ત્યારબાદ આલીફા પણ પાણીમાં પડી હતી. એકંદરે ત્રણેય બાળકો પાણીમાં ગરકાવ થઈ રહ્યાનું જોઈ ૧૭ વર્ષીય સાહિલે પણ પાણીમાં કૂદકો માર્યો હતો પરંતુ પાણી ખૂબ જ ઉંડું હોય તે બાળકોને તો બચાવી શક્યો ન્હોતો સાથે સાથે તે પણ ડૂબી જતાં ચારેયના મૃત્યુ નિપજ્યું હતું. આલીફાના પિતા અક્રમભાઈ ખેતમજૂરી કરતા હોવાનું તેમજ રોણકી ગામે રહેતા હોવાનું જાણવા મળ્યું હતું. આલીફા ત્રણ ભાઈ-બહેનમાં મોટી હતી. જ્યારે સાહિલ બે ભાઈનમાં નાનો હોવાનું અને રિક્ષા ચલાવી ગુજરાન ચલાવતો હતો.

એકંદરે ગોઝારી દૂર્ઘટનાની જાણ થતાં જ ડીસીપી ઝોન-૧ હેતલ પટેલ, કૂવાડવા રોડ પોલીસ મથકના પીઆઈ જાની સહિતના અધિકારીઓ હોસ્પિટલે દોડી ગયા હતા. બાળકો મૃત્યુ પામ્યાની જાણ થતાં જ પરિવારજનો પણ હોસ્પિટલે પહોંચ્યા હતા અને રોકક્કળ કરી મુકતા વાતાવરણ ગમગીન બની ગયું હતું.

આ પણ વાંચો: ઝારખંડની સરકારને આપેલો ટેકો કોંગ્રેસ પાછો ખેંચે: આંદોલનકારીઓની માંગ

મારી જિંદગી અહીં પૂરી થઈ ગઈ, હવે મારે એક સેક્નડ નથી જીવવું: પિતાનો વલોપાત

પોતાના વ્હાલસોયા બન્ને પુત્રના ડૂબી જવાની જાણ થતાં જ સાજીદભાઈ અભેશોરાની રડી રડીને હાલત ખરાબ થઈ ગઈ હતી અને તેમણે હવે મારી જિંદગી પૂરી થઈ ગઈ છે, મારા પુત્રો પાંચ મિનિટ પણ દૂર નથી રહેતા પરંતુ હવે તો બન્ને કાયમ માટે દૂર થઈ ગયા છે એટલા મારે પણ હવે સેક્નડ માટે પણ નથી જીવવું, મેં આ લોકોને પાણીમાં જવાની ના જ પાડી હતી. આજે સોહાનનો જન્મદિવસ હોય રાત્રે તેની ઉજવણીની તૈયારી પણ કરી હતી જે હવે માતમમાં ફેરવાઈ ગઈ છે. એકંદરે પિતાના આ શબ્દો સાંભળી હોસ્પિટલ ખાતે ઉપસ્થિત સૌ કોઈની આંખો ભીની થઈ ગઈ હતી.

૧૭ વર્ષની ઉંમરે જ સાહિલ રિક્ષા ચલાવી દરગાહે લઈ ગયો

ડૂબી જવાથી મૃત્યુ પામેલા સાહિલ જમાલભાઈ અભેશોરાની ઉંમર ૧૭ વર્ષની હોવા છતાં તે રિક્ષા ચલાવી પરિવારને મદદરૂપ થતો હતો. હજુ તો તેનું ડ્રાઈવિંગ લાયસન્સ પણ નીકળ્યું ન્હોતું તે પહેલાં તે રિક્ષા ચલાવી રહ્યો હતો. રવિવારે સાહિલ જ રિક્ષા ચલાવીને સેફાન, સોહાન, આલીફા તેમજ કૌટુંબિક ભાભી સુહાનાબેનને દરગાહે લઈ ગયો હતો.

જન્મદિવસે જ ૧૧ વર્ષના સોહાને દુનિયા છોડી દીધી

સોહાન સાજીદભાઈ અભેશોરાનો રવિવારે જન્મદિવસ હોવાથી વીડીવાળા પીરની દરગાહે ભાઈ-બહેન તેમજ માતા સાથે દર્શનાર્થે ગયો હતો. આમ તેણે જન્મદિવસે જ દુનિયા છોડી દીધી હતી. સોહાનના પિતા સાજીદભાઈ ખોડિયારનગરમાં જ પાનની દુકાન ધરાવે છે. તેમને બે પુત્ર હતા જે બન્નેના મૃત્યુ થતા આભ ફાટી પડ્યું હતું.