મનુ ભાકર થી લઈને દેશના અનેક ચેમ્પિયન્સના ગુરુ જસપાલ રાણા એ લીધા અંતિમ શ્વાસ

ભારતીય શૂટિંગ જગત આજે શોકમાં ગરકાવ છે. દેશના સૌથી સફળ પિસ્તોલ શૂટર અને કોચ જસપાલ રાણાએ માત્ર 49 વર્ષની ઉંમરે દુનિયાને અલવિદા કહી દીધી. જર્મનીથી ISSF વર્લ્ડ કપ પૂર્ણ કરી પરત ફરતી વખતે તબિયત લથડતા નવી દિલ્હી એરપોર્ટ પરથી તેમને હોસ્પિટલ લઈ જવામાં આવ્યા, જ્યાં તેમણે અંતિમ શ્વાસ લીધા. ત્રણ દાયકાથી વધુ સમય સુધી બંદૂકથી મેડલ અને પછી ખેલાડીઓના જીવન ઘડનાર આ દ્રોણાચાર્યના જવાથી ભારતીય શૂટિંગે એક યુગ ગુમાવ્યો છે.

નેશનલ રાઈફલ એસોસિએશન ઓફ ઈન્ડિયા NRAIએ શુક્રવારે જસપાલ રાણાના નિધનની સત્તાવાર પુષ્ટિ કરી છે. મ્યુનિખમાં યોજાયેલા ISSF વર્લ્ડ કપથી ભારત આવતા રસ્તામાં તેમને અચાનક શારીરિક અસ્વસ્થતા અને પીડા થઈ હતી. નવી દિલ્હી એરપોર્ટ પર લેન્ડ કર્યા બાદ તેમને તાત્કાલિક સાકેતની મેક્સ હોસ્પિટલમાં દાખલ કરવામાં આવ્યા, પરંતુ ત્યાં જ તેમનું અવસાન થયું.

90ના દાયકાનો સુવર્ણ ચહેરો

જસપાલ રાણા 90ના દાયકામાં ભારતીય શૂટિંગની ઓળખ હતા. એશિયન ગેમ્સ, કોમનવેલ્થ ગેમ્સ અને એશિયન ચેમ્પિયનશિપમાં તેમણે અસંખ્ય ગોલ્ડ મેડલ જીતીને આંતરાષ્ટ્રીય મંચ પર ભારતનો ડંકો વગાડ્યો હતો. જ્યારે દેશમાં શૂટિંગ રમત હજુ વિકાસની શરૂઆતમાં હતી, ત્યારે રાણાની સિદ્ધિઓએ લાખો યુવાનોને આ રમત તરફ આકર્ષ્યા હતા.

આ પણ વાંચો: ટેકનિકલ ખામીને લીધે જ વિમાન તૂટી પડ્યુ હોવાની ધારણા વધુ મજબુત : અમેરિકી વકીલ

કોચ તરીકે ચેમ્પિયન્સની ફેક્ટરી

2012માં ખેલાડી તરીકે નિવૃત્તિ બાદ રાણાએ કોચિંગની ધુરા સંભાળી અને જુનિયર પિસ્તોલ પ્રોગ્રામને વૈશ્વિક સ્તરે પહોંચાડી દીધો. સૌરભ ચૌધરી, અનીશ ભાનવાલા અને ચિંકી યાદવ જેવા વિશ્વસ્તરીય શૂટર્સ તેમની જ ટ્રેનિંગ હેઠળ તૈયાર થયા. હાઈ-પ્રેશર મેચમાં ખેલાડીઓને શાંત રાખવાની તેમની કળાએ ભારતીય જુનિયર ટીમને સુપરહિટ બનાવી દીધી.

મનુ ભાકરના ઓલિમ્પિક સફળતાના સારથી

રાણાની કોચિંગ કારકિર્દીનું સૌથી ઉજ્જવળ પ્રકરણ મનુ ભાકર સાથે જોડાયેલું છે. મનુની કારકિર્દીના સૌથી મુશ્કેલ સમયમાં રાણાએ તેમને માર્ગદર્શન આપ્યું. તેમની સખત ટ્રેનિંગનું પરિણામ 2024 પેરિસ ઓલિમ્પિકમાં મળ્યું, જ્યાં મનુ ભાકરે 10 મીટર એર પિસ્તોલ અને મિક્સ ટીમ ઇવેન્ટમાં બ્રોન્ઝ મેડલ જીતીને ઇતિહાસ રચ્યો. આ યોગદાન બદલ ભારત સરકારે 2020માં તેમને દ્રોણાચાર્ય એવોર્ડથી સન્માનિત કર્યા હતા.

છેલ્લી ઘડી સુધી દેશ માટે સમર્પિત

NRAIએ ફેબ્રુઆરી 2025માં જસપાલ રાણાને 25 મીટર પિસ્તોલના હાઈ-પર્ફોર્મન્સ કોચ તરીકે નિયુક્ત કર્યા હતા. તેઓ અંતિમ શ્વાસ સુધી ભારતના શૂટર્સને તૈયાર કરવામાં લાગેલા હતા. એક મહાન ખેલાડી, એક મહાન કોચ અને ભવિષ્યના ચેમ્પિયન્સ ઘડનાર ગુરુના જવાથી ભારતીય શૂટિંગે ક્યારેય ન પુરાય તેવી ખોટ સહન કરી છે.