બિહારમાં આંદોલનકારી વિદ્યાર્થીઓ પર AK-47થી ફાયરિંગ: પોલીસકર્મી સસ્પેન્ડ
પોલીસ દમનનો મામલો સુપ્રીમ કોર્ટ સુધી પહોંચ્યો
બિહાર બંધ દરમિયાન વિદ્યાર્થીઓના આંદોલન પર પોલીસ દમનનો વિવાદ વધુ ઘેરો બન્યો છે. સિવાન જિલ્લામાં વિરોધ પ્રદર્શન દરમિયાન એક પોલીસકર્મી AK-47 રાઇફલથી ફાયરિંગ કરતો હોવાનો વીડિયો સોશિયલ મીડિયામાં વાયરલ થતાં બિહાર પોલીસ મુખ્યાલયે તેને તાત્કાલિક સસ્પેન્ડ કરી દીધો છે. સમગ્ર ઘટનાની ઉચ્ચ સ્તરીય વિભાગીય તપાસ શરૂ કરવામાં આવી છે, જ્યારે પોલીસના બળપ્રયોગ સામેનો મુદ્દો સુપ્રીમ કોર્ટ સુધી પણ પહોંચી ગયો છે.
૨૫ જુલાઈએ યોજાયેલા રાજ્યવ્યાપી ‘બિહાર બંધ’ દરમિયાન અનેક જિલ્લાઓમાં વિદ્યાર્થી સંગઠનોના વિરોધ પ્રદર્શન થયા હતા. સિવાન જિલ્લામાં વિદ્યાર્થીઓ અને પોલીસ વચ્ચે ઘર્ષણ સર્જાતાં સ્થિતિ તંગ બની હતી. આ દરમિયાન એક પોલીસકર્મી AK-47 રાઇફલથી ફાયરિંગ કરતો હોવાનું વીડિયોમાં દેખાતા ભારે વિવાદ ઊભો થયો છે.
વીડિયો વાયરલ થયા બાદ બિહાર પોલીસ મુખ્યાલયે સમગ્ર ઘટનાની ગંભીર નોંધ લીધી અને સંબંધિત પોલીસકર્મીને સસ્પેન્ડ કરવાનો આદેશ આપ્યો. સાથે જ વિભાગીય તપાસ શરૂ કરી છે.
આ પણ વાંચો: RAF જવાને પેલેટ ગનના એક બે નહીં પણ સાત રાઉન્ડ ફાયરિંગ કર્યા હોવાનો તપાસમાં ધડાકો
વિરોધ પ્રદર્શન દરમિયાન મોટી સંખ્યામાં વિદ્યાર્થીઓ ગાંધી મેદાન તરફ કૂચ કરી રહ્યા હતા. સૂત્રોચ્ચાર વચ્ચે પોલીસ સાથે બોલાચાલી થતાં વાતાવરણ ઉગ્ર બન્યું અને ત્યારબાદ બળપ્રયોગ થયો હોવાનું સામે આવ્યું છે.
વિપક્ષના નેતા તેજસ્વી યાદવે ઘટનાનો વીડિયો સોશિયલ મીડિયા પર શેર કરીને જવાબદાર અધિકારીઓ સામે કડક કાર્યવાહી કરવાની માંગ કરી છે. બીજી તરફ પોલીસનું કહેવું છે કે કાયદો અને વ્યવસ્થા જાળવવી તેમની પ્રથમ જવાબદારી છે, પરંતુ કોઈપણ કર્મચારી દ્વારા નક્કી કરાયેલી પ્રક્રિયાનું ઉલ્લંઘન થશે તો તેને ગંભીરતાથી લેવામાં આવશે.
ફાયરિંગમાં ત્રણ વિદ્યાર્થીઓ ઘાયલ, 15 વર્ષના કિશોરના ગળામાંથી ગોળી કાઢી
બિહાર બંધ દરમિયાન થયેલા ફાયરિંગમાં ત્રણ વિદ્યાર્થીઓ ઘાયલ થયા હતા. તમામની સારવાર પટનાની જયપ્રભા મેડાંતા હોસ્પિટલમાં ચાલી રહી છે અને તેમની હાલત સ્થિર હોવાનું જણાવાયું છે. ઘાયલોમાં 15 વર્ષનો મોહમ્મદ આરિફ પણ સામેલ છે. પરિવારના જણાવ્યા મુજબ આરિફ દુકાન બંધ કરીને ઘરે પરત ફરી રહ્યો હતો ત્યારે ગોળી તેના ગળામાં વાગી હતી. ડૉક્ટરોએ સર્જરી કરીને ગોળી બહાર કાઢી છે અને હાલ તેની તબિયત સ્થિર હોવાનું હોસ્પિટલ સૂત્રોએ જણાવ્યું છે.
