એનર્જી ડ્રિંક્સને લાગી FSSAI ની બ્રેક: Red Bull, Sting પર ખોટા દાવાનો આરોપ, ‘ઉર્જા આપે છે’ લખવું ભારે પડશે
‘પાંખો આપે’ એવું કહેતી એનર્જી ડ્રિંક્સની પાંખો જ FSSAI એ કાપી નાખી છે. ફૂડ સેફ્ટી ઓથોરિટીએ Red Bull, Sting, એડ્રેનાલિન રશ અને હેલ એનર્જી જેવી જાણીતી બ્રાન્ડ્સને નોટિસ ફટકારી છે. આરોપ છે કે કંપનીઓ ગ્રાહકોને ‘એનર્જી ડ્રિંક’ કહીને ગેરમાર્ગે દોરી રહી છે, જ્યારે કાયદામાં એનર્જી ડ્રિંક્સ માટે કોઈ ધોરણ જ નથી.
કેમ ફટકારાઈ નોટિસ?
FSSAIનું કહેવું છે કે ભારતમાં ‘એનર્જી ડ્રિંક્સ’ નામની કોઈ ફૂડ કેટેગરી માટે સત્તાવાર ધોરણો નક્કી કરાયા જ નથી. છતાં કંપનીઓએ પોતાના ઉત્પાદનોને ‘એનર્જી ડ્રિંક્સ’ તરીકે લોન્ચ કરીને માર્કેટિંગ કર્યું. એટલું જ નહીં, પ્રોડક્ટના લેબલ પર ‘ઉર્જા સ્તર વધારવા’, ‘ધ્યાન વધારવા’ અને ‘શરીરને ઉર્જા આપે છે’ જેવા કાર્યાત્મક અને ઉપચારાત્મક દાવાઓ કર્યા હતા. FSS એક્ટ 2006 અને સંબંધિત નિયમો હેઠળ આવા દાવા માન્ય નથી. એટલે ફૂડ કેટેગરી સિસ્ટમનો ઉપયોગ નામકરણ કે લેબલિંગ માટે કરી શકાય નહીં.
કેફીનનો ઓવરડોઝ બની શકે જોખમી
આ એનર્જી ડ્રિંક્સમાં કેફીન અને અન્ય ઉત્તેજકો મોટા પ્રમાણમાં હોય છે. FSSAIએ ચેતવણી આપી છે કે વધુ પડતા સેવનથી આ ઉત્પાદનો સ્વાસ્થ્ય માટે હાનિકારક સાબિત થઈ શકે છે. ખાસ કરીને યુવાનોએ આવા પીણાથી દૂર રહેવું જોઈએ. ગ્રાહકોએ લેબલ પર લખેલા દાવાઓ પર આંખ બંધ કરીને ભરોસો ન કરવો જોઈએ.
કંપનીઓ સામે કાનૂની દંડની તલવાર
નિષ્ણાતો માને છે કે જો બ્રાન્ડ્સ FSSAIની નોટિસનો સંતોષકારક જવાબ નહીં આપે તો તેમને કાનૂની દંડનો સામનો કરવો પડશે. એટલું જ નહીં, આ વિવાદથી બ્રાન્ડની છબીને પણ મોટો ફટકો પડી શકે છે. હાલ પૂરતી મોટાભાગની કંપનીઓએ આ મુદ્દે કોઈ સત્તાવાર નિવેદન જારી કર્યું નથી. જોકે ઉદ્યોગ જગતમાં ચર્ચા છે કે બ્રાન્ડ્સ હવે પોતાની જાહેરાત વ્યૂહરચના બદલવા મજબૂર બનશે.
ગ્રાહકોનો ભરોસો તૂટ્યો, સોશિયલ મીડિયા પર રોષ
નોટિસના સમાચાર બાદ ગ્રાહકોમાં ચિંતા વધી છે. સોશિયલ મીડિયા પર ઘણા યુઝર્સે પ્રતિક્રિયા આપતા કહ્યું કે પહેલા આ બ્રાન્ડ્સ પર ભરોસો હતો પણ હવે નથી. સલામતીને પ્રાથમિકતા આપીને ઘણા લોકોએ આ ઉત્પાદનો પીવાનું બંધ કરવાનો નિર્ણય પણ લીધો છે.
FSSAI કડક: ગ્રાહકોના સ્વાસ્થ્ય સાથે ચેડાં નહીં ચલાવીએ
FSSAIએ સ્પષ્ટ કર્યું છે કે ગ્રાહકોના સ્વાસ્થ્ય સાથે કોઈપણ પ્રકારની બેદરકારી સહન કરવામાં આવશે નહીં. હવે જોવાનું એ રહ્યું કે કંપનીઓ પોતાના પ્રોડક્ટના પ્રમોશનમાં શું ફેરફાર કરે છે અને ઉદ્યોગના નિયમોનું પાલન કરે છે કે નહીં.
