ન્યૂઝ ક્લિક સામે EDની કાર્યવાહી નિષ્પક્ષ પત્રકારત્વ ઉપરનો હુમલો: હાઇકોર્ટ
લોન્ડરીંગ તપાસ ફગાવી,આરોપોને બેબુનિયાદ ગણાવ્યા
દિલ્હી હાઈકોર્ટે ડિજિટલ ન્યૂઝ પોર્ટલ ન્યૂઝક્લિક અને તેના સ્થાપક પ્રબીર પુરકાયસ્થ સામે ચાલી રહેલી મની લોન્ડરિંગ કાર્યવાહી રદ કરીને એન્ફોર્સમેન્ટ ડિરેક્ટોરેટ (ED) પર કડક પ્રહાર કર્યો છે. ન્યાયમૂર્તિ નીના બંસલ કૃષ્ણાએ 29 મેના ચુકાદામાં ઇકોનોમિક ઓફેન્સિસ વિંગ (EOW) દ્વારા નોંધાયેલી FIR તથા તેના આધારે શરૂ કરાયેલી PMLA કાર્યવાહી ફગાવી દીધી હતી. કોર્ટે જણાવ્યું કે આ કાર્યવાહી માત્ર દુર્ભાવનાપૂર્ણ જ નહીં પરંતુ મુક્ત અને નિષ્પક્ષ પત્રકારત્વ સામે સત્તાનો મનસ્વી દુરુપયોગ પણ હતી.
કોર્ટે નોંધ્યું કે લગભગ દોઢ વર્ષ સુધી વ્યાપક તપાસ, અનેક પૂછપરછ અને દરોડા છતાં ED કોઈપણ પ્રકારનો દોષારોપણને સમર્થન આપતો પુરાવો રજૂ કરી શકી નથી. 2018માં અમેરિકાની કંપની દ્વારા મળેલા FDI રોકાણને લઈને કરવામાં આવેલા આરોપો અંગે પણ કોર્ટે કહ્યું કે શેરનું મૂલ્યાંકન એક આર્થિક નિર્ણય છે, તેને ગુનાહિત કૃત્ય ગણાવી શકાય નહીં. FDIના નાણાં પગાર, ભાડું અને કામગીરીના ખર્ચમાં વપરાયા હોવાના આક્ષેપો પણ કોર્ટે ફગાવી દીધા. અદાલતે FIR અને સમગ્ર કાર્યવાહી કાયદાકીય પ્રક્રિયાનો ઘોર દુરુપયોગ હોવાની આકરી ટિપ્પણી કરીને રદ કરી દીધી હતી.આ ચુકાદાને પગલે ન્યૂઝક્લિક અને સ્થાપક પ્રબીર પુરકાયસ્થને મોટી કાનૂની રાહત મળી છે.
આ પણ વાંચો: કાલથી વિમેન્સ ટી-૨૦ વર્લ્ડકપ: રવિવારે ભારત-પાકિસ્તાન વચ્ચે જંગ
હાઈકોર્ટની મહત્વની ટિપ્પણીઓ
“આ કાર્યવાહી દુર્ભાવનાપૂર્ણ અને મુક્ત પત્રકારત્વ પર મનસ્વી હુમલો છે.”
“શેડ્યુલ્ડ ઓફેન્સ હોવાનો EDનો દાવો સંપૂર્ણપણે ગેરસમજભર્યો અને બેબુનિયાદ છે.”
“દોઢ વર્ષની તપાસ છતાં કોઈ પણ દોષારોપણ સમર્થન આપતો પુરાવો મળ્યો નથી.”
“તપાસનો સમગ્ર અભિગમ ‘ફિશિંગ એન્ડ રોવિંગ એક્સરસાઇઝ’ સમાન હતો.”
“FIRમાં ગુનો જ દેખાતો ન હોય અથવા આરોપો સ્પષ્ટપણે દુર્ભાવનાપૂર્ણ હોય તો તપાસ ચાલુ હોવાનું કારણ FIR રદ ન કરવાની અડચણ બની શકતું નથી.”
“શેરનું મૂલ્યાંકન આર્થિક નિર્ણય છે, તેને ગુનાહિત કૃત્ય ગણાવી શકાય નહીં.”
