કોલકાતાની હોટલમાં મોડી રાત્રે લાગી ભીષણ આગ: સારવાર માટે આવેલા 9 બાંગ્લાદેશી નાગરિકોના મોત, 6 ઘાયલ

પશ્ચિમ બંગાળના પાટનગર કોલકાતામાંથી એક અત્યંત હૃદયદ્રાવક અને કમકમાટી ઉપસાવતી ઘટના સામે આવી છે. મેડિકલ સારવાર માટે બાંગ્લાદેશથી ભારત આવેલ કેટલાક નાગરિકો માટે આ સફર આખરી સફર સાબિત થઈ ગઈ. કોલકાતાની એક હોટલમાં મોડી રાત્રે અચાનક ભીષણ આગ ફાટી નીકળતા 9 નિર્દોષ બાંગ્લાદેશી નાગરિકોના મોત નિપજ્યા છે, જ્યારે અન્ય કેટલાક લોકો ગંભીર રીતે ઈજાગ્રસ્ત થયા છે. રાજ્યમાં છેલ્લા 48 કલાકની અંદર બનેલી આ બીજી મોટી આગની દુર્ઘટનાએ હોટલોમાં ફાયર સેફ્ટીના કડક પાલન સામે ગંભીર સવાલો ખડા કર્યા છે.

મોડી રાત્રે 2 વાગ્યે ગાઢ નિંદ્રામાં ફાટી નીકળી આગ

મળતી માહિતી મુજબ, કોલકાતાની એક હોટલમાં આ ભીષણ આગ મંગળવારે મોડી રાત્રે આશરે 2 વાગ્યાની આસપાસ લાગી હતી. જ્યારે આ દુર્ઘટના ઘટી ત્યારે હોટલમાં રોકાયેલા મોટાભાગના લોકો ગાઢ ઊંઘમાં હતા. અચાનક આગ ભભૂકી ઉઠતા સમગ્ર બિલ્ડિંગમાં ધુમાડાના ગોટેગોટા ફેલાઈ ગયા હતા અને ભારે નાસભાગ મચી ગઈ હતી. ઘટનાની ગંભીરતાને જોઈને તાત્કાલિક ફાયર એન્ડ ઈમરજન્સી સર્વિસિસનો કાફલો તથા ડિઝાસ્ટર મેનેજમેન્ટની ટીમ 4 ફાયર ટેન્ડર સાથે સ્થળ પર દોડી આવી હતી અને યુદ્ધના ધોરણે બચાવ કામગીરી હાથ ધરી હતી.

આ પણ વાંચો: ગાંધી અને સરદારના ગુજરાતમાં ડ્રગ્સ માફિયાઓની ‘મોજ’: હજારો કિલો નશાનો જથ્થો ઝડપાયો છતાં સજાનું પ્રમાણ નહિવત

સારવાર માટે આવેલા 9 નાગરિકોના મોત અને 6 ઈજાગ્રસ્ત

આ ભયાનક અગ્નિકાંડમાં કુલ 9 બાંગ્લાદેશી નાગરિકોના કરુણ મોત થયા છે. આ તમામ દુર્ભાગ્યપૂર્ણ મૃતકો પોતાના વિવિધ સ્વાસ્થ્ય સંબંધી રોગોની મેડિકલ સારવાર કરાવવા માટે કોલકાતા આવ્યા હતા અને આ હોટલમાં રોકાયા હતા. આ દુર્ઘટનામાં દાઝી ગયેલા અન્ય 6 લોકોને ગંભીર હાલતમાં તાત્કાલિક નજીકની હોસ્પિટલમાં ખસેડવામાં આવ્યા છે, જ્યાં તેમની સારવાર ચાલી રહી છે. પ્રાથમિક તપાસમાં આ હોટલ અત્યંત ગીચ બાંધકામ ધરાવતા વિસ્તારમાં આવેલી એક જૂની ઈમારતમાં કાર્યરત હોવાનું સામે આવ્યું છે.

પશ્ચિમ બંગાળમાં માત્ર 48 કલાકમાં બીજો મોટો અગ્નિકાંડ

રાજ્યમાં આગની આ ઘટનાએ તંત્રની ચિંતા વધારી દીધી છે કારણ કે છેલ્લા માત્ર બે દિવસમાં જ પશ્ચિમ બંગાળમાં આ પ્રકારની બીજી મોટી હોટેલ દુર્ઘટના બની છે. અગાઉ 17 ઓગસ્ટના રોજ તારાપીઠ મંદિર નજીક પવિત્ર કુંડ પાસે આવેલી પાંચ માળની ‘હોટેલ બિદેશિની’માં વહેલી સવારે લાગેલી આગમાં 8 લોકોના મોત થયા હતા અને અનેક લોકો ઈજાગ્રસ્ત થયા હતા. માત્ર 48 કલાકના ટૂંકા ગાળામાં બે મોટી હોટેલોમાં આગ લાગવાની ઘટનાઓએ હોટલ સંચાલકોની બેદરકારી અને ફાયર સેફ્ટીના નિયમોની ધજાગી ઉડતી હોવાની પોલ ખોલી નાખી છે.

કોલકાતાની આ કરુણાંતિકાએ માનવજીવનની સુરક્ષા અને વહીવટી તંત્રની નિષ્ક્રિયતા સામે લાલબતી ધરી છે. વિદેશથી સારવાર અર્થે આવતા નાગરિકો જો આ પ્રકારે હોટલોમાં સુરક્ષિત ન રહી શકે, તો તે ખૂબ જ શરમજનક અને ચિંતાનો વિષય છે. વહીવટી તંત્ર દ્વારા આ અગ્નિકાંડનું ચોક્કસ કારણ જાણવા ટેકનિકલ ઈન્સ્પેક્શન સાથે ઝીણવટભરી તપાસ શરૂ કરવામાં આવી છે. હવે જોવાનું એ રહેશે કે તંત્ર દ્વારા આવી જોખમી હોટલો સામે શું કડક દાખલારૂપ પગલાં લેવામાં આવે છે જેથી ભવિષ્યમાં આવી નિર્દોષ જિંદગીઓ હોમાતી અટકી શકે.